Read Tzeltal Ezequiel 27 Bible Online

Ezequiel 27 - Tzeltal bible

Ezequiel 27

¹Tal ta jtojol te sc'op Jehová, hich la yal:

²Snich'anat winic, c'ayojtaya ta stojol Tiro c'ayoj scuenta mel-o'tan.

³Halbeya te Tiro te hucul ta ti'mar, te ya ya'iy mambajel chombajel soc bayel mach'atic ayic ta ti'ti'mar: Hich yaloj te Jehová, te Ajwalil: Ha'at Tiro, hich awaloj: C'ax t'ujbilon, xchihat.

⁴Te mojonetic awu'un ayic ta yohlil te mar; te mach'atic la spasat, t'ujbil hilat yu'un.

⁵Spisil te atablahul la spasic ta ciprés yu'un te wits Senir; la yich'ic cedro yu'un Líbano scuenta snahtil te'el te apac'al.

⁶Te atijojibaletic awu'un la spasic ta jihte' yu'un Basán; te amahquil la spasic ta taj yu'un te ti'ti'mar yu'un Chipre, soc ch'albil ta marfil.

⁷Te apac'al pasbil ta ch'albil lequil lino yu'un Egipto, yu'un ya xtuhun awu'un ta bandera; te awaxib-pac' yax soc chi'in-yax yu'un te ti'ti'mar yu'un Elisa.

⁸Te mach'atic nahinemic ta Sidón soc Arvad ha'ic te la stijic te barcohetic awu'un; te p'ijil winiquetic awu'un, Tiro, ayic ta awohlil, ha jtojobtes-barco awu'un.

⁹Te mamaletic yu'un Gebal soc te mach'atic yu'un te ya sna'ic ta lec a'tel, la ya'beyic xuch'il banti stahoj sbahic te ste'ele; spisil te barcohetic yu'un te mar soc te mach'atic ya stijic bahel talic ta banti ayat yu'un ya sjoquinat ta mambajel soc chombajel.

¹⁰Te winiquetic te talemic ta Persia, Lidia soc Libia, ha soldadohetic awu'un yu'un guerra; la sjohc'bat ta atojol mahquilaletic soc smahquil jolaletic yu'unic; la ya'bat awutsilal.

¹¹Te snich'nab Arvad soc te soldadohetic yu'un, ayic ta sba ts'ahc awu'un soc ta sjoyobal; soc te mach'atic yu'un Gamad ayic ta toyol ilo-q'uinaletic awu'un. La sjohc'anic te mahquilaletic yu'unic ta sjoyobal te ts'ahquetic awu'un; ha'ic la sts'acaytesbat at'ujbilal.

¹²Te Tarsis la ya'iy mambajel chombajel ta atojol yu'un te bayel ac'ulejal; la stojbat ta plata, hierro, estaño soc plomo yu'un te bintic ay awu'une.

¹³Te Grecia, Tubal soc Mesec la ya'iy mambajel chombajel ta atojol, la sjelbat ta mosohetic soc bintic pasticlambil ta bronce te bintic ay awu'un.

¹⁴Te mach'atic yu'un Bet-togarma la ya'bat j'a'tel-cawuhetic, cawuhetic yu'un guerra soc mulahetic yu'un stojol abiluc.

¹⁵Te mach'atic yu'un Dedán[11] la ya'iyic mambajel chombajel ta atojol; tsobol pueblohetic ta ti'ti'mar la smambat abiluc; la stojbat ta colmillohetic yu'un marfil soc ta ébano-te'.

¹⁶Te Edom la ya'iy mambajel chombajel ta atojol yu'un te ay bayel bintic ay awu'un, la sjelbat ta perlahetic te paq'uetic bombil ta chi'in-yax, ch'albil paq'uetic, lequil lino, t'ujbil tonetic ta ye'tal mar, soc tsajal tonetic.

¹⁷Te Judá soc te sq'uinal Israel la ya'iyic mambajel chombajel ta atojol, la sjelbat abiluc ta trigo yu'un Minit, pastel, chab, aceite soc bálsamo-te'.

¹⁸Te Damasco la ya'iy mambajel soc chombajel ta atojol yu'un ay bayel abiluc soc ac'ulejal; la sjelbat abiluc ta vino yu'un Helbón soc saquil stsotsel tuminchij.

¹⁹Te Dan soc Javán la sjelbat abiluc ta uhltesbil taq'uin, canela soc jalal te sumet yic'.

²⁰Te Dedán la sjelbat abiluc ta t'ujbil sempat yu'un cawu.

²¹Te Arabia soc spisil te jcuentahinwanejetic yu'un Cedar la sjelbat abiluc ta tut tuminchijetic, tat tuminchijetic soc tentsunetic; ta spisil ini la ya'iyic mambajel chombajel ta atojol.

²²Te jmambajeletic soc jchombajeletic yu'un Sabá soc Raama la ya'iyic mambajel chombajel ta atojol, la sjelbat abiluc ta lequil perfume, spisil ta chahp t'ujbil tonetic soc oro yu'un te abiluque.

²³La ya'iyic mambajel chombajel ta atojol te Harán, Cane, Edén soc te jmambajel jchombajeletic ta Sabá, ta Asiria soc Quilmad.

²⁴Ha'ic ini la schombat bintic t'ujbil: ha yaxal pac', ch'albil pac', paq'uetic te ya yich' limel te bayel sch'ahlel, soc lazohetic te tulan jalbilique.

²⁵Te barcohetic yu'un Tarsis la yich'bat tal te biluquetic awu'une. Nojelat soc bayel ihcatsil ta yohlil te maretic.

²⁶Te mach'atic ya stijbat abarco la yic'at bahel ta banti c'ubul te mar; pero te ic' te ya xtal ta stojol banti ya xloc' tal c'ahc'al la swuyat ta yohlil te mar.

²⁷Te ac'ulejal, te achombajel, te bintic ya xloc' awu'un, te jtij-barcohetic soc te jtojobtes-barcohetic awu'un, te mach'atic ya ya'beyic xuch'il banti stsacoj sbahic, te jchombajeletic awu'un, spisil te soldadohetic awu'un, soc spisil te yantic te tey ayic a, ya xmulot cohel ta ye'tal mar te bin ora ya xmulat.

²⁸C'alal ya x'awonic te j'a'teletic ta barco awu'un ya me snihquic te ti'ti'mar.

²⁹Spisil te mach'atic ya stijic bahel te barco ya me xloq'uic ta barcohetic yu'unic; te j'a'teletic ta barco soc jtojobtes-barcohetic ya me stehc'an sbahic ta lumq'uinal.

³⁰Ya me yaq'uic ta a'iyel sc'op ta atojol, soc pich'il yo'tanic ya x'awonic; ya me yac' ts'u'lum ta sjolic, soc ya me sbal sbahic ta tan.

³¹Ya squits' stsotsel sjolic ta acuenta, ya slapic sc'u'ul mel-o'tan, soc pich'il yo'tanic ya x'oq'uic ta acuenta.

³²Yaquic ta ahcan a ya sc'ayojtaybat c'ayoj scuenta mel-o'tan; hich me ya yalic c'alal ya yoq'uetayat: ¿Mach'a pajal soc Tiro, mach'a pajal soc te mach'a jihn ta yohlil te mar?

³³Te c'alal loq'uic bahel ta mar te bintic yac achon, bayel bintic la stahic awu'un te nacionetic; la ac'ulejubteslan ajwaliletic ta bahlumilal ta scuenta bayel ac'ulejal soc te bintic yac achone.

³⁴Yo'tic jimbilat yu'un te mar, ta sc'ubulil te ha'etic; te bintic yac achon soc spisil te jtij-barcohetic awu'un pajal mulotat cohel soc.

³⁵Spisil te mach'atic ya xnahinic ta ti'ti'mar xcham yo'tanic ta acuenta; te ajwaliletic yu'un ya xnihquic yu'un xiwel, soc ya xyanij yelawic yu'un.

³⁶Te jchombajeletic ta pueblohetic ya xuxubajic ta atojol; c'atp'ujatix ta bin xiweltic sba, sbahtel q'uinal ma xchicnajat, xchi te Jehová.