Read Tzeltal Ezequiel 29 Bible Online

Ezequiel 29 - Tzeltal bible

Ezequiel 29

¹Ta slahchayebal (12) c'ahc'al ta slajunebal u yu'un te slajunebal ha'bil, tal ta jtojol te sc'op Jehová, hich la yal:

²Snich'an winic, ac'a asit awelaw ta stojol faraón te ajwalil yu'un Egipto, halbeya sc'op-jalwanej ta scontrahinel soc spisil Egipto.

³Hich me xawalbe: Hich yaloj te Jehová, te Ajwalil: Jcontrahinejat, Faraón, ajwalilat yu'un Egipto, te muc'ul dragón te metsel ta muc'ul-ha' yu'un, te hich ya yal: Ho'on cu'un te muc'ul-ha' Nilo, ho'on jpasoj, te xchihe.

⁴Ya cac' ganchohetic ta awahlan-e, soc ya cac' lohp'ajuc ta asuhlil te chayetic yu'un te muc'ul-ha' awu'une. Ya jloq'uesat ta muc'ul-ha' awu'un, soc spisil te chayetic te lop'ajtic ta asuhlil ya xloq'uic tal soc.

⁵Pajal ya cac'at hilel ta jochol taquin q'uinal soc spisil te chayetic yu'un te muc'ul-ha'etic awu'une; ya xbuchat ta yohl q'uinal, ma ba yac awich' tsobel o tamel. Ya cac' sti'at ti'awal chambahlametic ta q'uinal soc te mutetic te ya xwihlic ta toyol.

⁶Spisil te mach'atic nahinemic ta Egipto ya me sna'ic te ho'on Jehovahon; como bastón jalal c'ohemat ta stojol te sna Israel.

⁷Te c'alal la stsacat ta sc'abic, wac'at, la awac'be snehquelic; te c'alal la yich'ic yip ta atojol, wac'at, soc la awac'be scubic.

⁸Ha yu'un hich yaloj te Jehová, te Ajwalil: Ya cac' scontrahinat te espada, soc ya jmilticlambat te ants-winiquetic soc chambahlametic,

⁹hich jochol ya xhil te sq'uinal Egipto. Ya me sna'ic te ho'on Jehovahon, te bin ut'il hich la awal: Ho'on cu'un te muc'ul-ha' Nilo, ho'on la jpas, te xchihate.

¹⁰Ha yu'un ya jcontrahinat soc ya jcontrahin te muc'ul-ha' awu'une. Ya jc'atp'un ta jimbil jochol q'uinal te sq'uinal Egipto, c'alal Migdol c'alal ta Sevene, c'alal ta sti'il Etiopía.

¹¹Ma ba ya xc'ax yoc ants-winic o yoc chambahlam tey a; cha'winic (40) ha'bil mayuc mach'a ya xnahin tey a.

¹²Ya cac' te c'ax hich jochol ya xhil a te sq'uinal Egipto te bin ut'il spisil te q'uinaletique, soc cha'winic (40) ha'bil jimbil ya xhilic te pueblohetic yu'un ta yohlil te jimbil pueblohetique. Ya jpucticlan te egipciohetic ta yohlil te nacionetic soc ta yohlil te yantic q'uinaletique.

¹³Como hich yaloj te Jehová, te Ajwalil: Te c'alal ya xc'ax te cha'winic (40) ha'bil ya jcha'tsob tal te egipciohetic te banti la yich'ic jpucticlanel bahele;

¹⁴ya quic' suhtel tal te egipciohetic te bahtic ta chuquel, ya cac' te ya xnahinic ta sq'uinal Patros, te q'uinal te banti hahchemique. Ha peq'uel nación ya xc'oht.

¹⁵C'ax hich peq'uel ya xc'oht a te bin ut'il te yantic nacionetic, soc mayuquix bin ora te toyol ya xc'oht ta stojol te nacionetic, como ya jtutubtes scuenta yu'un ma ba ya scuentahinix xan te nacionetique.

¹⁶Te sna Israel mayuquix bin ora ya smuc'ulin yo'tan te Egipto; ha ya x'a'bot sna'ic te la stahic smulic yu'un te la sc'ambeyic coltayele. Ya me sna'ic te ho'on Jehovahon, te Ajwalil, xchi te Jehová.

¹⁷Ta shahchibal c'ahc'al ta shahchibal u yu'un te shuquebal scha'winic (27) ha'bil tal ta jtojol te sc'op Jehová, hich la yal:

¹⁸Snich'anat winic, te Nabucodonosor ajwalil yu'un Babilonia la ya'beyic spas tulan a'tel te soldadohetic ta scontrahinel Tiro; luhbaj stsotsel sjolic soc uhlem snehquel spisilic yu'un. Pero mayuc bin la sta a o te la stahic te soldadohetic yu'un te ya'telic ta scontrahinel.

¹⁹Ha yu'un hich yaloj te Jehová, te Ajwalil: Ya ca'be yu'untay Egipto te Nabucodonosor ajwalil yu'un Babilonia; ya me yich'be bahel te sc'ulejal, ya spojbe sbiluc soc ya yelc'ambe te bintic ay yu'une, ha stojol te soldadohetic yu'une.

²⁰La jca'be yu'untay te sq'uinal Egipto scuenta stojol te ya'tel ta scontrahinel Tiro, como a'tejic ta jcuenta, xchi te Jehová, te Ajwalil.

²¹Ta hich ora ya cac' ach'ubuc te yip te sna Israel soc ya cac' jahmuc awe ta yohlilic. Ya me sna'ic te ho'on Jehovahon, xchi.