Read Tzeltal Ezequiel 3 Bible Online

Ezequiel 3 - Tzeltal bible

Ezequiel 3

¹Hich la yalbon: Snich'anat winic, we'an te bin ay ta atojol, we'an te balbil hun ini, patil bahan, c'opona te sna Israel, xchi.

²Hich la jam que, la ya'bon jwe' te balbil hune.

³Hich la yalbon: Snich'anat winic, we'a te balbil hun te ya ca'bat, nojesa ach'uht a, xchi. Hich la jwe', mero chi', pajal soc chab.

⁴Hich la yalbon: Snich'anat winic, bahan ta stojol te sna Israel, halbeya te jc'ope.

⁵Como ma ba ticombilat ta stojol jun pueblo te chuhcul sc'op o te wocol ta a'iyele, pero ta stojol te sna Israel;

⁶ma ha'uc ta stojol bayel pueblohetic te ma na'biluc bin ya yalic o te wocol ta a'iyel, te ma xhu' awu'un sna'beyel scuentahile. Te yacuc jticonat bahel ta stojolic, ya ya'iybat ac'op te hichuque.

⁷Pero te sna Israel ma ba ya sc'an ya ya'iybat ac'op, como ma sc'an ya ya'iybonic te jc'ope; como spisil te sna Israel tulan sit yelawic soc macal yo'tanic.

⁸Ilawil, la jcac' te tulan ya xc'oht asit awelaw ta stojol te sit yelawique.

⁹Hich stulanil la jca'bat asit awelaw te bin ut'il stulanil te diamante-ton, te c'ax hich stulanil a te bin ut'il yantic tonetic. Ma xaxi', ma xiwat ta stojolic, como ha jun toyba pueblo, xchi.

¹⁰Hich la yalbon: Snich'anat winic, ac'a ta awo'tan spisil te bin ya calbat, a'iya me awa'iy ta lec.

¹¹Patil bahan ta stojol alumal te ic'otic bahel ta chuquel, c'opona; hich me xawalbe: Hich yaloj te Jehová, te Ajwalil, xchihat, teme ya ya'iyic o teme ma ba ya ya'iyique.

¹²Te espíritu la slicon hahchel, ta jpat la jca'iy c'op te mero tulan, te hich la yal: ¡Ac'a yich' halbeyel sc'oblal te yutsilal Jehová c'alal ta banti ay te yawile! xchi.

¹³Soc la jca'iy te sc'op te xiq'uic te bintic cuxajtic te ya stahticlan sbahic, soc sc'opic te yoc carretahetic te ayic ta stojolic, hich sc'opic te bin ut'il chahwuc.

¹⁴Te espíritu la slicon hahchel, la yic'on bahel; pich'il co'tan soc ilin co'tan bahel, tulan stsacojon a te sc'ab Jehová.

¹⁵C'ohon ta stojol te jchuqueletic te ayic ta Tel-abib, te nahinemic ta sti'il te muc'ul-ha' Quebar, la juhcan jba ta yohlilic. Tey hilon huqueb c'ahc'al a, ma ba la jna' bin ya jpas.

¹⁶C'alal ts'acay te huqueb c'ahc'al, tal ta jtojol te sc'op Jehová, hich la yalbon:

¹⁷Snich'anat winic, ho'on la jcac'atix ta j'il-q'uinal yu'un te pueblo Israel; ha yu'un a'iybon awa'iy te jc'op soc tsitsa te pueblo ta jcuenta.

¹⁸Teme ya calbe te mach'a chopol yo'tan: Ya me xlajat, teme xchihone, teme ma ba yac awalbe te ya yihquitay hilel te schopol a'tel, yu'un hich ya xhu' ya xcuxaj a, te mach'a chopol yo'tan ya me xlaj ta scaj te smule, pero ya ca'bat ta acuenta te sch'ich'ele.

¹⁹Pero teme yac atsits te mach'a chopol yo'tan, pero ma ba ya sc'an ya yihquitay hilel te schopolil soc te chopol be yu'une, ya me xlaj ta scaj te smule, pero ha'at ya xcolat ta libre.

²⁰Soc te mach'a toj yo'tan, teme ya yihquitay hilel te tojil-o'tanil yu'un, teme ya spas te bin chopole, teme ya cac' te bin ya sc'ohchin yoc a, ya me xlaj, como ma ba la atsits. Ya me xlaj ta scaj te smule, te bintic toj la spasticlan ma ba ya x'ich'otic ta cuenta; pero ya ca'bat ta acuenta te sch'ich'ele.

²¹Pero teme yac atsits te mach'a toj yo'tan scuenta yu'un ma ba ya sle smul, teme ma ba ya sle smule, ya me xcuxaj, como la yich' tsitsel, soc te ha'ate ya xcolat la libre, xchi.

²²Tal sc'ab Jehová ta jtojol tey a, hich la yalbon: Hahchan, loc'an bahel ta spamlej, tey me ya jc'oponat a, xchi.

²³Hich hahchon bahel, loc'on bahel ta spamlej. Tey ay a te yutsilal te Jehová, hich te bin ut'il te yutsilal la jquil ta sti'il te muc'ul-ha' Quebar; la jpahcan jba c'alal ta lum, la jca'be sta lum te jti'bahe.

²⁴Hich te espíritu och ta co'tan, la yac' tehc'ajucon, la sc'oponon, hich la yalbon: Bahan, maca aba ta ana.

²⁵Ha'at, snich'anat winic, ya me schucat ta lazo, ya me awich' chuquel yu'unic scuenta yu'un ma xhu' ya xloc'at bahel ta yohlilic.

²⁶Ya cac' te ya slap' sba awac' ta apajaj, hich uma' ya xc'ohat, ma ba ya xhu' yac atsitsticlan, como ha jun pueblo te stoyoj sbahe.

²⁷Pero teme ay bin ya calbat, ya jambat awe soc hich me xawalbe: Hich yaloj te Jehová, te Ajwalile. Te mach'a ya sc'an ya ya'iy, ac'a ya'iy; te mach'a ma sc'an ya ya'iy, manchuc, como ha jun pueblo te stoyoj sba, xchi te Jehová.