Read Tzeltal Ezequiel 30 Bible Online

Ezequiel 30 - Tzeltal bible

Ezequiel 30

¹Tal ta jtojol te sc'op Jehová, hich la yal:

²Snich'anat winic, hich me xawal ta sc'op-jalwanej: Hich yaloj te Jehová: Hich me xawal ta oq'uel: ¡Ay wocolil ta hich c'ahc'al! xchihex.

³Como nopolix te c'ahc'ale, nopolix te sc'ahc'alel yu'un Jehová; ha sc'ahc'alel yu'un tocal, ha sc'ahc'alel yu'un yich'el castigo te nacionetique.

⁴Ya xtal espada ta stojol Egipto, soc ay me xiwel ta Etiopía te c'alal ya xlajic ta espada ta Egipto, te c'alal ya x'elc'ambot sc'ulejal soc ya yich' jimbeyel te yich'o-ip.

⁵Te Etiopía, Fut, Lud, spisil Arabia, Lidia, soc te yantic pueblohetic te schapoj sc'opic soc, pajal ya xlajic soc ta espada.

⁶Hich yaloj te Jehová: Soc ya xyahlic te mach'atic ya scoltayic te Egipto, ya xch'ay te stoybahil yu'un te yipe; c'alal Migdol c'alal ta Asuán ya xlajic ta espada tey a, xchi te Jehová, te Ajwalil.

⁷C'ax hich jochol ya xhil te bin ut'il te yantic q'uinaletic, soc te pueblohetic yu'un jimbil ya xhilic ta yohlil te jimbil pueblohetique.

⁸Ya me sna'ic te ho'on Jehovahon, te c'alal ya ca'be sc'ahc'al te Egipto soc te ya xlajic spisil te mach'atic ya xcoltayot yu'une.

⁹Ta hich ora ya xloc' bahel ta jtojol jal c'opetic ta barcohetic yu'un ya xiwtesic te Etiopía te jun yo'tan ay. Ya me xiwic hich te bin ut'il ta yorahil laj te Egipto, como ya me xtal.

¹⁰Hich yaloj te Jehová, te Ajwalil: Ya jlajimbe sc'ulejal te Egipto ta scuenta sc'ab Nabucodonosor te ajwalil yu'un Babilonia.

¹¹Te ajwalil soc te pueblo yu'un, te c'ax hich chopol a te bin ut'il te yantic nacionetic, ya x'ic'otic tal yu'un ya sjinic te q'uinale. Ya sloq'uesic ta sna te espadahetic yu'unic ta scontrahinel Egipto, soc ya snojesic te q'uinal ta mach'atic lajemic.

¹²Ya cac' taquijuc te muc'ul-ha'etic soc ya cac' te q'uinal ta sc'ab mach'atic chopol yo'tanic; soc ta scuenta sc'ab jyanlumetic ya cac' lajuc te q'uinal soc spisil bintic ay tey a. Ho'on Jehovahon c'opojonix.

¹³Hich yaloj te Jehová, te Ajwalil: Ha nix hich ya jinticlan te loc'ombahetic, soc ya jinticlan te loc'ombahetic yu'un Menfis; mayuquix bin ora te ay jcuentahinwanej ta sq'uinal Egipto, soc ya cac' xiwel tey a.

¹⁴Jochol ya xhil cu'un te Patros, ya ca'be sc'ahc'al te Zoán, soc ya ca'be castigo te Tebas.

¹⁵Ya jmal cohel quilimba ta stojol Sin, te ahnibal yu'un Egipto, soc ya jlajinlan te bayel ants-winiquetic yu'un Tebas.

¹⁶Ya ca'be sc'ahc'al te Egipto, te Sin ya me ya'iy bayel sc'uxul, ya me yich' jinel te Tebas, soc te Menfis spisil ora ay me swocol.

¹⁷Te queremetic yu'un Avén soc yu'un Pibeset ya me xlajic ta espada; soc ya xbahtic ta chuquel te antsetique.

¹⁸Ya x'ihc'ub te c'ahc'alel ta Tafenes te c'alal ya jlajimbe yip te Egipto soc te ya xlaj te stoybahil yu'un te yipe; ya xmacot ta yihc'al q'uinal, soc te mach'atic nahinemic ta tut pueblohetic yu'un ya x'ic'otic bahel ta chuquel.

¹⁹Hich ya ca'be castigo te Egipto, ya me sna'ic te ho'on Jehovahon, xchi te Jehová.

²⁰Ta shuquebal c'ahc'al ta shahchibal u yu'un te sbuluchebal (11) ha'bil, tal ta jtojol te sc'op Jehová, hich la yal:

²¹Snich'anat winic, la jwac'be sc'ab te faraón ajwalil yu'un Egipto; ma ba potsbil yu'un la yich' poxtayel, soc ma ba la yich' chucbeyel, scuenta yu'un ya yich' xan yip a yu'un ya xhu' ya stsac te espada.

²²Ha yu'un hich yaloj te Jehová, te Ajwalil: Ya jcontrahin te faraón ajwalil yu'un Egipto, ya jwac'be sc'ab, ha te ay yip soc te yan te waq'uemix, soc ya cac' te ya xluhbaj cohel ta sc'ab te espadahe.

²³Ya jpucticlan bahel te egipciohetic ta stojol te nacionetic, ya jpucticlan bahel ta q'uinaletic.

²⁴Ya ca'be yip sc'ab te ajwalil yu'un Babilonia, soc ya ca'be ta sc'ab te espada cu'une; pero ya jwac'be sc'ab te faraón, soc ya x'ahcanaj ta stojol hich te bin ut'il mach'a ehchenaj yu'un lajel.

²⁵Ya ca'be yip sc'ab te ajwalil yu'un Babilonia, ya xlaj yip te sc'ab faraón. Ya me sna'ic te ho'on Jehovahon, te c'alal ya ca'be ta sc'ab te ajwalil yu'un Babilonia te espada cu'un, soc ya shach te espada ta scontrahinel te sq'uinal Egipto.

²⁶Ya jpucticlan bahel ta stojol te nacionetic soc ya jpucticlan bahel ta stojol te q'uinaletique. Ya me sna'ic te ho'on Jehovahon, xchi.