Read Tzeltal Ezequiel 31 Bible Online

Ezequiel 31 - Tzeltal bible

Ezequiel 31

¹Ta shahchibal c'ahc'al ta yoxebal u yu'un te sbuluchebal (11) ha'bil, tal ta jtojol te sc'op Jehová, hich la yal:

²Snich'anat winic, halbeya te faraón ajwalil yu'un Egipto soc te pueblo yu'une: ¿Mach'a a te pajal c'ohat soc te amuc'ule?

³Ilawil te Asirio, te ha cedro yu'un Líbano, buen t'ujbil sc'abc'ab, pim ya'binal, soc mero toyol, te sni'il c'ohem c'alal tocal.

⁴La yac' muc'ubuc te ha'al, te c'ubul sch'enal ha' la yac' tohyuc mohel; oquin muc'ul-ha'etic ta sjoyobal, la sticon bahel ya'lel ta stojol spisil te'etic ta q'uinal.

⁵Hich toyol xan c'oht yu'un spisil te yantic te'etic ta q'uinal, p'ohl te sc'abc'ab soc la slim sba, ta scaj te ay bayel ha'etic.

⁶Spisil te mutetic te ya xwihlic ta toyol la spas spechechic ta sc'abc'ab; soc spisil te chambahlametic ta q'uinal tohc yalatac ta ye'tal, soc ta yaxinal nahinic bayel nacionetic.

⁷Buen t'ujbil smuc'ul c'oht yu'un te sc'abc'ab te slimoj bahel, como te slohp' ay ta banti ay bayel ha'etic.

⁸Te cedrohetic ta ts'umbil te'etic yu'un Dios mayuc banti pajal soc; te taj mayuc banti pajal sc'abc'ab soc, te castaño-te' mayuc banti pajal sc'abc'ab soc; mayuc junuc te' ta ts'umbil te'etic yu'un Dios te pajal st'ujbilal soc.

⁹T'ujbil la jpas yu'un bayel sc'abc'ab c'oht; spisil te yantic te'etic yu'un Edén te ayic ta ts'umbil te'etic yu'un Dios la yil-o'tantayic.

¹⁰Ha yu'un hich la yal te Jehová, te Ajwalil: Te bin ut'il mero toyol c'oht te te' soc te tohy mohel sni'il c'alal ta tocaletic, te la stoy sba yu'un,

¹¹ya ca'be ta sc'ab te jcuentahinwanej yu'un te nacionetic, te hich ya xpasbot yu'un ha chican te schopolile. La jquihlayix.

¹²Ya xts'etot hilel yu'un jyanlumetic te bayel ya x'uts'inwanic. Te sc'abc'ab ya me xyahlic cohel ta witsiltic soc ta spisil spamlejetic, soc ta spisil sjuclejtic yu'un te q'uinal waq'uem ya xhilic sc'abc'ab. Spisil te pueblohetic ta q'uinal ya xloq'uic bahel ta yaxinal, ya x'ihquitayot hilel yu'unic.

¹³Spisil te mutetic te ya xwihlic ta toyol ya me xtalic ta nahinel ta banti puch'em, soc spisil chambahlametic ta q'uinal ya x'ayinic ta yohlil te sc'abc'ab,

¹⁴scuenta yu'un spisil te te'etic ta ti'ha'etic ma ba ya stoy sbahic yu'un te stoyolil, ma ba ya stoy sni'ilic ta yohlil te tocaletic, soc spisil te te'etic te ya yuch'ic ha' ma ha'uc ya smuc'ulin yo'tanic te stoyolile; como spisilic ya xbahtic ta lajel, ta sc'ubulil te lumq'uinal, ta yohlil te yal-snich'nab ants-winiquetic, ya sjoquinic te mach'atic ya xcohic bahel ta hotbil ch'en.

¹⁵Hich yaloj Jehová, te Ajwalil: Te bin c'ahc'alil te co bahel ta stsobojibal mach'atic chamenic, la jca'be mel-o'tan soc te ya xmucot yu'un te xahabe. La jcom te muc'ul-ha'etic, hich bayel ha'etic la yich'ic comel. Ta scuenta te te' la jmuc ta yihc'al q'uinal te Líbano, soc sayubic spisil te te'etic ta q'uinal.

¹⁶La jcac' nihcuc te nacionetic yu'un te xnilet te yahl cohel, te c'alal pajal la jcac' cohel ta stsobojibal mach'atic chamenic soc te mach'atic ya xcohic bahel ta muquenal. Spisil te tsahbil te'etic yu'un Edén, te t'ujbil te'etic yu'un Líbano, spisilic te ya yuch'ic ha', muc'ub q'uinal la ya'iyic ta sc'ubulil te q'uinale.

¹⁷Ha'ic nix pajal cohic bahel soc ta stsobojibal mach'atic chamenic, ta stojol te mach'atic lajic ta espada, te mach'atic coltayot yu'unic, te mach'atic nahinic ta yaxinal ta yohlil te nacionetique.

¹⁸Te te'etic ta Edén ¿bin pajal soc amuc'ul soc awutsil? Pajal me ya xcohat bahel soc te te'etic yu'un Edén ta sc'ubulil te q'uinale; ya me xhilat ta yohlil te mach'atic ma ba yich'ojic circuncisión, te mach'atic lajic ta espada. Ha te faraón ini soc spisil te pueblo yu'une, xchi te Jehová, te Ajwalil.