Read Tzeltal Ezequiel 32 Bible Online

Ezequiel 32 - Tzeltal bible

Ezequiel 32

¹Ta shahchibal c'ahc'al ta slahchayebal (12) u yu'un te slahchayebal (12) ha'bil tal ta jtojol te sc'op Jehová, hich la yal:

²Snich'anat winic, c'ayojtaybeya c'ayoj yu'un mel-o'tan te faraón ajwalil yu'un Egipto, hich yac awalbe: Pajalat soc choj ta stojol nacionetic, hichat te bin ut'il dragón ta maretic; yac atijulan aba ta muc'ul-ha', yac atijulan ta awoc te ha'etic soc yac atatubtes te yacan ha'.

³Hich yaloj te Jehová, te Ajwalil: Ta scuenta bayel pueblohetic te stsoboj sbahic ya jlim bahel ta atojol te tsaco-chay cu'un, ya jtsacat loq'uel a.

⁴Ya jch'ojat ta lum, pacal ya xhilat cu'un ta yohl q'uinal, ya cac' luhtsajuc ta aba spisil mutetic te ya xwihlic ta toyol, soc ya snojes sch'uhtic ta abaq'uetal spisil ti'awal chambahlametic.

⁵Ya jpuc bahel abaq'uetal ta witsiltic soc ya jnojes te spamlejetic ta chamen baq'uetetic awu'un.

⁶Ya cahts'es ta ach'ich'el te lum c'alal ta witsiltic, soc te uc'umetic ya xnojic ta abaq'uetal.

⁷C'alal jc'axel jihnematix cu'un, ya jmuc te ch'ulchan soc ya cac' x'ihc'ub te eq'uetique; ya cac' mahcuc ta tocal te c'ahc'al, soc te u ma ba ya yaq'uix sc'ahc'al.

⁸Ha'at ta acuenta ya cac' x'ihc'ub spisil te bintic ya xtihl ta ch'ulchan, soc ya cac' te ya x'ihc'ub ta alumal, xchi te Jehová te Ajwalil.

⁹Ya cac' te ya smel yo'tanic bayel pueblohetic te c'alal ya quic'ticlan bahel ta chuquel te mach'atic awu'un ta yohlil te nacionetic, ta yantic q'uinaletic te ma ba la ana'be sbahe.

¹⁰Ya cac' te xcham yo'tanic bayel pueblohetic ta acuenta, soc te ajwaliletic yu'unic ya me xtal bayel xiwel ta yo'tanic ta acuenta te c'alal ya cac' chicnajuc sts'anabul te espada cu'un ta stojolic; soc spisil ora ya me xnihquic yu'un xiwel te c'alal ya xch'ayat.

¹¹Como hich yaloj te Jehová, te Ajwalil: Te espada yu'un te ajwalil yu'un Babilonia ya me xc'oht ta atojol.

¹²Ya cac' yahluc te pueblo awu'un ta espada yu'un te mach'atic ay yipic, spisilic te ay yipic ta yohlil te nacionetic. Ya me slajimbe te stoybahil Egipto, soc spisil te yipal ants-winiquetic yu'un jimbil ya xhilic.

¹³Ya jlajinlan spisil te chambahlametic yu'un te ayic ta sti'il bayel ha'etic; ma ba ya yich'iquix tijulanel ta yoc winic o ta slots' chambahlam.

¹⁴Hich ya cac' lahmajuc te ha'etic yu'unic, soc ya cac' behenuc hich te bin ut'il aceite te muc'ul-ha'etic yu'unique, xchi te Jehová, te Ajwalil.

¹⁵Te c'alal ya jc'atp'un ta jochol q'uinal te Egipto, soc te jochol ya xhil te q'uinal yu'un spisil bintic ay tey a; te c'alal ya jmil spisil te mach'atic nahinem tey a, ya me sna'ic te ho'on Jehovahon.

¹⁶Ha te c'ayoj yu'un mel-o'tan ini te ya xc'ayojinic. Te yantsil-nich'nab te nacionetic ya sc'ayojtayic; ya sc'ayojtayic te c'ayoj yu'un mel-o'tan ta stojol Egipto soc ta stojol spisil yipal ants-winiquetic yu'un, xchi te Jehová, te Ajwalil.

¹⁷Ta yo'lajunebal (15) c'ahc'al yu'un te u ta slahchayebal (12) ha'bil, tal ta jtojol te sc'op Jehová, hich la yal:

¹⁸Snich'anat winic, c'ayojtaya c'ayoj yu'un mel-o'tan ta stojol tsobolic yu'un Egipto; ac'a cohuc bahel ta sc'ubulil te lumq'uinal soc te yal-snich'nab te nacionetic te ay yipic, te ya sjoquinic te mach'atic ya xcohic bahel ta muquenal. Hich yac awalbe:

¹⁹¿C'ax bal hich t'ujbilat a te bin ut'il yantic? ¡Cohan bahel, lima aba soc te mach'atic ma ba yich'ojic circuncisión!

²⁰Ya me xyahlic ta yohlil te mach'atic ya xlajic ta espada; ac'otic ta stojol te espada. ¡Ic'a tal soc spisil te pueblohetic yu'une!

²¹Ta yohlil te stsobojibal mach'atic chamenic, te jtsobawetic te ay yipic hich ya yalbe sc'oblal soc te mach'atic coltayotic yu'un: Cohic talel soc limil hilic soc te mach'atic ma ba yich'ojic circuncisión te lajic ta espada, xchihic.

²²Tey ay a te Asiria soc spisil yipal mach'atic yu'un, joytaybilic yu'un te muquenaletic yu'un; spisilic lajic ta espada.

²³Te muqueletic yu'unic ayic ta mero sc'ubulil te ch'en, soc te soldadohetic yu'un ayic ta sjoyobal te muquenal yu'une; spisilic lajic ta espada, ha te mach'atic la yaq'uic xiwel ta stojol te mach'atic cuxulic.

²⁴Tey ay a te Elam soc spisil te yipal ants-winiquetic yu'un ta sjoyobal te smuquenale. Spisilic lajic ta espada, ma ba yich'ojic circuncisión a cohic bahel ta sc'ubulil te q'uinal, yu'un la yaq'uic xiwel ta stojol te mach'atic cuxulic. Pajal ya yich'ic bahel sq'uexlalic soc te mach'atic ya xcohic bahel ta muquenal.

²⁵Ta yohlil te mach'atic chamenic la schahpambeyic swayib soc spisil yipal mach'atic yu'un; joytaybil ta muquenaletic yu'un. Spisilic ma ba yich'ojic circuncisión, lajemic ta espada, como la yaq'uic xiwel ta stojol te mach'atic cuxulic; pero pajal ya yich'ic bahel sq'uexlalic soc te mach'atic ya xcohic bahel ta muquenal; ac'otic ta yohlil te mach'atic chamenique.

²⁶Tey ayic a te Mesec soc Tubal, soc spisil yipal mach'atic yu'un; joytaybilic ta muquenaletic yu'unic. Spisilic ma ba yich'ojic circuncisión, lajic ta espada, como la yaq'uic tulan xiwel ta stojol mach'atic cuxulic.

²⁷Ma ba limilic soc te soldadohetic te yahlemic te ma ba yich'ojic circuncisión, te cohic bahel ta stsobojibal mach'atic chamenic soc ya'tejibic yu'un guerra, soc ac'otic ta ye'tal sjolic te espadahetic yu'unique. Pero te schopolilic ayic ta sba te sbaquelic, como te xiwel te la yaq'uic te soldadohetic ay ta stojol te mach'atic cuxulique.

²⁸Ha yu'un ya me awich' jinel ta yohlil te mach'atic ma ba yich'ojic circuncisión, soc limil ya xhilat soc te mach'atic lajic ta espada.

²⁹Tey ayic a te Edom soc te ajwaliletic soc spisil te yal-snich'nab ajwalil. Aunque bayel yipic, ac'otic hilel ta yohlil te mach'atic lajemic ta espada; limil ya xhilic soc te mach'atic ma ba yich'ojic circuncisión, te mach'atic ya xcohic bahel ta muquenal.

³⁰Tey ayic a te jcuentahinwanejetic te talemic ta stojol norte, spisilic, soc spisil te mach'atic yu'un Sidón, te soc xiwel cohic bahel soc te mach'atic lajemic; q'uexawic yu'un te yipic, ma ba yich'ojic circuncisión a limil ya xhilic soc te mach'atic lajemic ta espada, soc pajal yich'ojic sq'uexlalic soc te mach'atic ya xcohic bahel ta muquenal.

³¹Ya x'ilotic yu'un te faraón, ya xmuc'ub q'uinal ya'iy yu'un spisil yipal mach'atic yu'un te lajemic: te faraón soc spisil te soldadohetic yu'un lajic ta espada, xchi te Jehová, te Ajwalil.

³²Aunque la jcac' te la yac' tulan xiwel ta stojol te mach'atic cuxulic, te faraón soc spisil te yipal mach'atic yu'un limil ya xhilic ta yohlil te mach'atic ma ba yich'ojic circuncisión, ya sjoquinic te mach'atic lajemic ta espada, xchi te Jehová, te Ajwalil.