Read Tzeltal Ezequiel 33 Bible Online

Ezequiel 33 - Tzeltal bible

Ezequiel 33

¹Tal ta jtojol te sc'op Jehová, hich la yal:

²Snich'anat winic, c'opona te alumal, hich xawalbe: Te c'alal ya cac' tal espada ta q'uinal, soc te ants-winiquetic yu'un te q'uinal ya slehic jtuhl slumal yu'un ya ya'be ya'tel ta il-q'uinal;

³teme ya yil te ya xtal te espada ta scontrahinel te q'uinal soc ya yoq'uesin te cornetahe,

⁴te mach'a ya ya'iybe sc'op te corneta pero ma ba ya yich' ta cuenta, teme ya xtal te espada soc ya xmilot yu'une, ha nix ay ta scuenta te ya xlaje.

⁵La ya'iybe sc'op te corneta, pero ma ba la yich' ta cuenta: ha nix ay ta scuenta te laje. Pero te mach'a ya yich' ta cuenta, ya scoltay sba, cuxul ya xhil.

⁶Pero teme ya yil te j'il-q'uinal te yac ta talel te espada pero ma ba ya yoq'uesin te corneta, hich ma ba ya schahpan sba te pueblo, teme ya xtal te espada, teme ay mach'a ya xlajinot yu'une, ha nix ya xlaj ta scaj te smul, pero ya cac' te j'il-q'uinal ya smulimbe te sch'ich'ele.

⁷Ha'at snich'anat winic, cac'ojat ta j'il-q'uinal ta stojol te sna Israel: ha'at yac awa'iybon te jc'op soc ya me awa'be sna' ta jcuenta.

⁸C'alal hich ya calbe te mach'a chopol: ¡Ha'at te chopolat, ya me xlajat! ya cut, teme ma ba yac awalbe te yacuc xhil te be yu'une, te mach'a chopol ya me xlaj yu'un te smule, pero ya ca'bat amulimbe te sch'ich'ele.

⁹Pero teme yac awalbe te mach'a chopol te yacuc xhil te be yu'une, pero teme ma ba ya yihquitay, ha nix ay ta scuenta smul te ya xlaj, pero ha'at ya xhilat ta libre.

¹⁰Snich'anat winic, halbeya te sna Israel: Hich awalojic te ha'exe: Te jtoybahilcotic soc te jmulcotic ay ta jtojolcotic, soc ha ta scuentahic te yacotic ta ch'ayel bahel, ¿bin ut'il ya xcuxajotic hiche? xchihex.

¹¹Hich me xawalbe: Ho'on cuxulon, xchi te Jehová te Ajwalil, ma jc'an te ya xlaj te mach'a chopol, ha ya jc'an te ya yihquitay hilel te be yu'un soc te ya xcuxaj. ¡Ihquitayahic, ihquitayahic te chopol behetic awu'unic! ¿Bin yu'un te ya xlajex, snahex Israel? xchihat.

¹²Soc ha'at, snich'anat winic, halbeya te alumal: Te bin toj ya spas te mach'a toj yo'tan, ma ba ya x'ac'ot ta libre yu'un te bin ora ya sc'axuntay mandar; soc te schopolil te mach'a chopol yo'tan ma ba ya xmacot yu'un te bin ora ya suhtes yo'tan. Te mach'a toj yo'tan ma ba ya xcuxaj yu'un te bin toj spasoj te bin ora ya sta smul.

¹³Te c'alal ya calbe te mach'a toj yo'tan te ya me cuxaj, pero teme ha smuc'ulinej yo'tan te bin toj spasoj, teme ya spas te bin chopole, spisil te bintic toj spasticlanej ma ba ya xna'ot; ya xlaj yu'un ta scuenta te bin chopol la spase.

¹⁴Te c'alal ya calbe te mach'a chopol yo'tan te ya me xlaj, pero teme ya suhtes yo'tan yu'un te smul soc ya spas te bin lec soc te bin stojil ta pasele,

¹⁵teme ya sut te bin a'bot yu'un te mach'a ay bin la smajan, teme ya sut te bin yelc'anej, soc ya st'un te mandariletic yu'un te cuxlejal, teme ma ba ya spas te bin chopole, ya me xcuxaj, ma ba ya xlaj.

¹⁶Ma ba ya xna'ot ni junuc te smul te spasoje; la spas te bin lec soc te bin stojil ta pasel, ya me xcuxaj.

¹⁷Pero hich ya yal te alumal: ¡Ma ba toj te be yu'un te Cajwaltique! xchihic. ¡Pero ma ba toj te be yu'unique!

¹⁸Te c'alal ya yihquitay hilel te bin toj ta pasel te mach'a toj yo'tan soc ya spas te bin ma lecuc, ya me xlaj yu'un.

¹⁹Soc te c'alal ya yihquitay hilel schopolil te mach'a chopol yo'tan, soc ya spas te bin lec soc te bin stojil ta pasele, ya me xcuxaj yu'un.

²⁰Pero ha'ex hich awalojic: Ma ba toj te be yu'un te Cajwaltic, xchihex. Pero ya quich'ex ta c'op, snahex Israel, tuhlultuhl ha chican bin yilel te behetic yu'une, xchi te Jehová.

²¹Ta yo'ebal c'ahc'al ta slajunebal u yu'un te slahchayebal (12) ha'bil te ac'otic bahel ta chuquel, tal ta jtojol jtuhl winic te ahn loq'uel ta Jerusalén, hich la yalbon: ¡Tsalbilix te pueblo! xchi.

²²C'ohem ta jtojol te sc'ab Jehová ta tibiltic te ma to ba c'ohem ta jtojol a te j'ahnel winique; la sjambonix que a te c'alal tal te winique; jamalix te que, hich ma uma'ubonix.

²³Tal ta jtojol te sc'op Jehová, hich la yal:

²⁴Snich'anat winic, te mach'atic nahinemic ta banti jihnem te sq'uinal Israel, hich ya yalic: Jtuhl nax te Abraham, pero la yu'untay te q'uinale; te ho'otic tsobolotic, a'bibilotic cu'untaytic te q'uinale, xchihic.

²⁵Ha yu'un hich xawalbeyic: Hich yaloj te Jehová, te Ajwalil: Yac ati'ic ti'bal soc sch'ich'el, soc yac awil mohel te loc'ombahetic awu'unic soc yac amalic ch'ich', ¿yu'un bal yac awu'untayic te q'uinale?

²⁶Ha smuc'ulinej awo'tanic te espadahetic awu'unic, yac apasic te bintic ilobtic sba soc jujutuhl yac abohlobtesbe sc'oblal yihnam apat-axuhc, ¿yu'un bal yac awu'untayic te q'uinale? xchihat.

²⁷Hich me xawalbe: Hich yaloj te Jehová, te Ajwalil: Ho'on cuxulon, ya cal ta jamal, te mach'atic ayic ta banti jimbilic ya me xlajic ta espada, soc te mach'atic ayic ta yohl q'uinal ya cac' te ya xlajinotic yu'un ti'awal chambahlametic; soc te mach'atic ayic ta toyol ahnibal ts'ahquetic soc ta ch'enetic, ya me xchamic yu'un jmilawal-chamel.

²⁸Ya cac' te jochol soc jihnem ya xhil te q'uinal, soc ya xlaj te stoybahil yu'un te yipe; soc te witsiltic yu'un Israel jochol ya xhilic, mayuc mach'a ya xc'ax tey a.

²⁹Ya me sna'ic te ho'on Jehovahon, c'alal ya cac' te jochol soc jimbil ya xhil te q'uinal ta scaj te bintic ilobtic sba la spasique, xchihat.

³⁰Yan te ha'at, snich'anat winic, ay bin ya yalbat ac'oblal te alumal ta sts'ehl te paq'uetic soc te puertahetic yu'un te nahetic, talel c'axel hich ya yalbe sbahic: La'ic, a'iya awa'iyic te c'op talem ta stojol Jehová, xchihic.

³¹Ya xtalic ta atojol hich te bin ut'il c'ahyemic ta spasel te ants-winiquetic, ya xhuhcajic ta atojol scuenta pueblo cu'un. Ya ya'iybat ac'op, pero ma ba ya sch'uhunic spasel; ya yalic te ya sc'anic, pero te yo'tanic ya st'unic te sbic'tal yo'tanique.

³²Hich c'ohemat yu'unic te bin ut'il mach'a ya xc'ayojin c'ayojetic scuenta c'ux-o'tanil, te buen t'ujbil ac'op soc ya xc'ayojinat ta lec. Ya ya'iybat ac'op, pero ma ba ya sch'uhunic spasel.

³³Pero c'alal hich ya xc'oht ta pasel (yaquix ta talel), ya me sna'ic te ay jalwanej ta yohlilic, xchi te Jehová.