Read Tzeltal Ezequiel 34 Bible Online

Ezequiel 34 - Tzeltal bible

Ezequiel 34

¹Tal ta jtojol te sc'op Jehová, hich la yal:

²Snich'anat winic, hala sc'op-jalwanej ta scontrahinel te jcanan-tuminchijetic yu'un Israel, hich me xawalbe te jcanan-tuminchijetic: Hich yaloj te Jehová, te Ajwalil: ¡Obol sbahic te jcanan-tuminchijetic yu'un Israel te ha nax ya smac'lin sbahique! ¿Ma bal yacuc smac'linic te jtsohb tuminchijetique?

³Yac awuch'beyic sleche te tuminchijetic, yac ac'u'imbeyic stsotsel, soc yac amilic te banti juhp'enic, pero ma ba yac amac'linic.

⁴Ma ba la awa'beyic yip te mayuc yipic soc ma ba la apoxtayic te ayic ta chamel; ma ba la apotsic te banti waq'uem, ma ba la awiq'uic suhtel tal te howiyemic bahel, ma ba la alehic te ch'ayemique, tulan la acuentahinic soc la awuts'inic.

⁵Bayuc ya xbahtic ta scaj te mayuc jcanan yu'unic, soc ya xlajic ta ti'el yu'un spisil te ti'awal chambahlametic ta q'uinal. ¡Puhquemic bahel!

⁶Te tuminchijetic cu'un howiyemic ta behel ta spisil te witsiltic soc spisil te toyol tsehletique. Puhquic bahel ta spahmal bahlumilal te tuminchijetic cu'un, mayuc mach'a la sle soc mayuc mach'a la sjoc'oy ta scuenta.

⁷Ha yu'un, jcanan-tuminchijetic, a'iybeya awa'iyic te sc'op Jehová:

⁸Ho'on cuxulon, xchi te Jehová te Ajwalil, te bin ut'il ayic ta elc'anel te jtsohb tuminchijetic cu'un soc te ti'otic yu'un spisil te ti'awal chambahlametic ta scaj te mayuc jcanan yu'unique; te jcanan-tuminchijetic cu'un ma ba la slehic te tuminchijetic cu'un, ha la scanantay sbahic stuquelic;

⁹ha yu'un, jcanan-tuminchijetic, a'iybeya awa'iyic te sc'op Jehová.

¹⁰Hich yaloj te Jehová, te Ajwalil: ¡Ho'on ya jcontrahin te jcanan-tuminchijetic, soc ya quich'be ta cuenta yu'un te tuminchijetic cu'une! Ya jloq'ues ta scanantayel te tuminchijetic cu'un, soc te jcanan-tuminchijetic ma ba ha nax ya scanantay sbahic, ya jcoltay ta yehic te tuminchijetic cu'un, ma ba ya xti'otiquix yu'unic, xchi.

¹¹Como hich yaloj te Jehová, te Ajwalil: Ho'on, ho'on nix ya jle te tuminchijetic cu'un soc ya jcanantay.

¹²Hich te bin ut'il bayel sc'oblal ta yo'tan te jcanan-tuminchij te ya stsob tal te jtsohb tuminchijetic yu'un te puhquemic, hich bayel sc'oblal ta co'tan te tuminchijetic cu'un soc ya cac'ticlan ta libre ta bayuc banti puhquemic bahel ta yorahil macal q'uinal soc yihc'al q'uinal.

¹³Ya jloq'ueslan tal ta pueblohetic, ya jtsobticlan tal ta q'uinaletic; ya quic'ticlan tal ta sq'uinalic soc ya cac'ticlambe swe'elic ta witsiltic yu'un Israel, ta uc'umetic soc ta spisil te q'uinal banti ay yajwal.

¹⁴Ya cac'ticlambe swe'elic ta lequil aquiltic, soc ta toyol witsetic yu'un Israel tey ya xc'oht a te lequil aquiltic yu'unique. Tey ya scux yo'tanic a ta lequil aquiltic, soc ya me swe'ic te mero lequil ac ta witsiltic yu'un Israel.

¹⁵Ho'on ya jcanantay te tuminchijetic cu'un, soc ya ca'be scux yo'tanic, xchi te Jehová, te Ajwalil.

¹⁶Ya jle te tuminchij te ch'ayem, ya jsuhtes tal te howiyemic bahel, ya jpotsbe te banti waq'uem soc ya ca'be yip te banti mayuc yip; pero ya jlajin te juhp'en soc te ay yipe. Stojil me ya jcanantay.

¹⁷Te ha'ex, tuminchijetic cu'un, hich yaloj te Jehová, te Ajwalil: Ya jchahpan ta yohlil te tuminchijetic, ta yohlil te tat tuminchijetic soc te tat tentsunetic.

¹⁸¿Ma bal tic'uquex a te yac awe'ic te lequil ac, ya bal ats'o'ts'o'teq'uic te ac awu'unic te hilem, soc te c'alal yac awuch'ic te lequil ha', ya bal atijic ta awacanic te ha' te hileme?

¹⁹Te tuminchijetic cu'un ya swe'ic te ac tec'ticlambil awu'un soc ya yuch'ic te ha' te tijbil ta awoquique.

²⁰Ha yu'un, hich ya xhalbotic yu'un Jehová, te Ajwalil: Ho'on nix ya jchahpan ta yohlil te juhp'en tuminchij soc te yahuben tuminchij,

²¹te bin ut'il la acotp'inic ta anehquel soc ta amochbaquelic, soc la acujticlanic ta axulubic spisil te mayuc yipic, ha to c'alal la aloq'uesic soc la apucticlanic bahel.

²²Ya me jcoltaylan te tuminchijetic cu'un, ma ba ya xlajiquix ta ti'el; soc ya jchahpan ta yohlil te tuminchijetique.

²³Ya ca'beyic jtuhl jcanan te ya scanantay, ha te ca'bat David; ya scanantay, ha jcanan yu'unic ya xc'oht.

²⁴Ho'on Jehovahon, Dioson yu'unic ya xc'ohon, soc te ca'bat David ha jcuentahinwanej ya xc'oht yu'unic. Ho'on Jehovahon, c'opojonix.

²⁵Ya jpas chapbil-c'op yu'un lamal q'uinal ta stojolic soc ya jloq'ues ta q'uinal te ti'awal chambahlametique; jun yo'tanic ya xnahinic ta jochol taquin q'uinal soc ya xwayic ta tohyem te'etic.

²⁶Ya ca'be bendición ta stojolic soc ta sjoyobal te tsehl cu'un, soc ya cac' te ya xtal ha'al ta yorahil; ha'al yu'un bendición ya xc'oht.

²⁷Te te'etic ta q'uinal ya me yac' sitic soc ya me yac' sit te ts'unub-awalil ta q'uinal. Jun yo'tanic ya xnahinic ta sq'uinalic, soc ya me sna'ic te ho'on Jehovahon, te c'alal ya jtuch'be schucojibal te yugo yu'unic soc ya jcoltay ta libre ta sc'abic te mach'atic smosohinejique.

²⁸Mayuquix bin ora ya yich'ic pojel yu'un te nacionetic soc ma ba ya xlajinotiquix yu'un te ti'awal chambahlametic, jun yo'tan ya xnahinic, mayuquix mach'a ya xiwtesotic yu'un.

²⁹Ya jchahpambe q'uinal te na'bil sba ta lec yu'un te bin ya xcol tey a, ma ba ya xlajiquix ta wi'nal, soc ma ba ya x'ac'otiquix ta q'uexlal yu'un te nacionetique.

³⁰Ya me sna'ic te ho'on Jehovahon, te Dioson yu'unic, te joquinejic, soc te ha pueblo cu'un te sna Israel, xchi te Jehová, te Ajwalil.

³¹Ha'ex tuminchijex cu'un, tuminchijex yu'un te aquiltic cu'un, ha ants-winiquetiquex, soc Ho'on Dioson awu'unic, xchi te Jehová, te Ajwalil.