Read Tzeltal Ezequiel 35 Bible Online

Ezequiel 35 - Tzeltal bible

Ezequiel 35

¹Tal ta jtojol te sc'op Jehová, hich la yal:

²Snich'anat winic, ac'a asit awelaw ta stojol te wits Seir, halbeya sc'op-jalwanej ta scontrahinel,

³hich me xawalbe: Ilawil, ya jcontrahinat, wits Seir, ya jach jc'ab ta scontrahimbelat soc ya jc'atp'ujat ta jochol jimbil q'uinal.

⁴Ya jimbat te pueblohetic awu'un, jimbil ya xhilat, ya me ana'ic te ho'on Jehovahon.

⁵Te bin ut'il spisil ora acontrahinej te snich'nab Israel soc la awa'be ta stojol te yip te espada ta yorahil swocolic, ta yorahil te la yich'ic te slajibal castigo yu'un te schopolile,

⁶ha yu'un, xyilon, xchi te Jehová, te Ajwalil, ya cac'at ta malbeyel ach'ich'el, hich ya me snutsat te malbeyel ach'ich'ele. Te bin ut'il ma ba la ap'aj smalel ch'ich', ha me ya st'unat.

⁷Ya jc'atp'un ta jochol jimbil q'uinal te wits Seir, soc ya jloq'ues tey a te mach'atic ya xloq'uic bahel soc te ya x'ochic talel.

⁸Ya jnojes ta chamen baquetic te witsiltic yu'une; ya xyahlic ta tsehletic, spamlejtic soc spisil te uc'umetic te mach'atic ya xlajic ta espada.

⁹Ya cac' te stalel jochol jimbil q'uinal ya xhilat, soc ma ba ya scha'ich'ic pasel te pueblohetic awu'un. Ya me ana'ic te ho'on Jehovahon.

¹⁰Te bin ut'il hich la awal: Cu'un ya xc'oht te cheb nacionetic soc te scha'sehpel q'uinale, ya me cu'untay, te xchihat, aunque tey a te Jehová;

¹¹ha yu'un, ho'on cuxulon, xchi te Jehová, te Ajwalil, te hich ya jpasbat te bin ut'il te ilinel awu'un soc te xut'et awo'tan te la awac' ta ilel ta stojolic ta scaj te la awil-o'tantay ta scontrahinel; soc ya xna'ot jba ta stojolic te c'alal ya jchahpanate.

¹²Ya me ana' te ho'on, Jehovahon, la jca'iybat spisil te chopol c'opetic la awalbe ta scontrahinel te witsiltic yu'un Israel, te hich la awal: Jimbilic, ac'otic ta jcuentatic yu'un ya jlajintic, xchihat.

¹³Toyol la awac' aba ta jtojol ta scuenta te bin la awale, bayel p'ohl te bin la awal ta scontrahimbelon, ho'on la jca'iy.

¹⁴Hich yaloj te Jehová, te Ajwalil: Scuenta yu'un tse'el yo'tan spisil te q'uinal, ho'on ya cac'at ta jinel.

¹⁵Te bin ut'il tse'el awo'tan yu'un te bin a'bot yich' te sna Israel, como la yich' jinel, ha yu'un hich ya jpasbat: ¡jimbil ya xhilat, wits Seir, ha'at soc spisil Edom! Ya me sna'ic te ho'on Jehovahon, xchi.