Read Tzeltal Ezequiel 36 Bible Online

Ezequiel 36 - Tzeltal bible

Ezequiel 36

¹Ha'at, snich'anat winic, hala sc'op-jalwanej ta stojol te witsiltic yu'un Israel, hich xawalbe: ¡Witsiltic yu'un Israel, a'iybeya awa'iyic te sc'op Jehová!

²Hich yaloj te Jehová, te Ajwalil: Te bin ut'il hich la yalbeyex ac'oblalic te acontra: ¡Ea! ¡Ac'ot quich'tic hilel te toyol q'uinaletic te stalel ay! te xchihique,

³ha yu'un hich xawalbe sc'op-jalwanej: Hich yaloj te Jehová, te Ajwalil: Te bin ut'il jochol hilat yu'unic soc te la sjinex ta bayuc scuenta yu'un la yu'untayex te yantic nacionetic, soc te la awich'ic labanel soc p'ajel yu'un te pueblohetic,

⁴ha yu'un, witsetic yu'un Israel, a'iybeya awa'iyic te sc'op Jehová, te Ajwalil: Hich yaloj te Jehová, te Ajwalil, ta stojol te witsetic soc tsehletic, te uc'umetic soc te spamlejtic, te bintic jimbilic soc te pueblohetic te mayuc mach'atic nahinemic tey a, te c'atp'ujic ta bintic pojbilic soc te labanot yu'un te yantic nacionetic ta sjoyobal,

⁵ha yu'un hich yaloj te Jehová, te Ajwalil: C'opojon soc xut'et co'tan ta scontrahinel te yantic nacionetic soc spisil Edom, te ta scuenta tse'el yo'tanic soc sc'ahc'al yo'tanic la yich'bonic te q'uinal cu'un, scuenta yu'un ya yu'untayic te mach'atic tembilic loq'uel tey a.

⁶Ha yu'un hala sc'op-jalwanej ta stojol te sq'uinal Israel, soc halbeya te witsiltic soc tsehletic, te uc'umetic soc te spamlejetic te hich yaloj te Jehová, te Ajwalil: C'opojonix ta xut'et co'tan soc ta sc'ahc'al co'tan te bin ut'il la awich'ic p'ajel yu'un te yantic nacionetique.

⁷Ha yu'un, hich yaloj te Jehová, te Ajwalil: Jachoj jc'ab, caloj ta jamal te bin ut'il te nacionetic te ayic ta ajoyobal ya me yich'ic q'uexlaltesel.

⁸Pero ha'ex, witsetic yu'un Israel, ya me awac' bahel ac'abc'ab soc ya me awa'be te pueblo Israel cu'un te sit awu'une, como nopol ya suhtic talel.

⁹Como, ilawil, ayon ta atojolic, ya suhton tal ta atojolic soc yac awich' chahpanel soc ts'unel.

¹⁰Ya cac' p'ohluc te ants-winiquetic ta atojolic, spisil te sna Israel. Ay mach'atic ya xnahinic ta pueblohetic soc ya yich'ic cha'pasel te banti jihnemique.

¹¹Ya cac' p'ohluc ta atojolic ants-winiquetic soc chambahlametic, bayel ya xp'ohlic. Ya cac' te ya xnahinic ta atojolic hich te bin ut'il ta namey, soc ya cac' te c'ax hich awutsilic a te bin ut'il ta shahchibal. Ya me ana'ic te ho'on Jehovahon.

¹²Ya cac' behenuc ants-winiquetic ta atojolic, ha te pueblo Israel cu'un. Ya me yu'untayat, yu'unic ya xc'ohat, soc mayuquix bin ora te yac alajimbeyic yal-snich'nabic.

¹³Hich yaloj te Jehová, te Ajwalil: Te bin ut'il hich ya yalbat ac'oblalic: Ha jti'aw yu'un ants-winiquetic soc jmilawal c'ohat yu'un te yal-snich'nabic te nación awu'un, te xchihique,

¹⁴ha yu'un ma ba yac ati'ix te ants-winiquetic soc ma ba yac amilbeyix te yal-snich'nabic te nación awu'une, xchi te Jehová, te Ajwalil.

¹⁵Soc ma ba ya caq'uix te yac awa'iy te labanel yu'un te nacionetic soc ma ba ya xc'axix awocol yu'un te ixta'c'op yu'un te pueblohetic, soc ma ba yac awaq'uix te ya sc'ohchin sba te nación awu'une, xchi te Jehová, te Ajwalil.

¹⁶Tal ta jtojol te sc'op Jehová, hich la yal:

¹⁷Snich'anat winic, te c'alal nahinem ta sq'uinal a te sna Israel, la sbohlobtesbeyic sc'oblal ta scuenta te bin la spasic soc te ya'telique. Te bin la spasic hich c'ohem ta jtojol te bin ut'il te ya xbohlob sc'oblal te ants c'alal ya yil schamel ta jujun u.

¹⁸Hich la jmal cohel quilimba ta stojolic ta scaj te ch'ich' la smalic ta q'uinal soc ta scaj te loc'ombahetic te la sbohlobtesbe sc'oblal a te q'uinale.

¹⁹La jpucticlan bahel ta nacionetic, hich puhquic bahel ta yantic q'uinaletic; la jca'be castigo ha chican bin yilel te bintic la spasique.

²⁰Te c'alal c'ohtic ta nacionetic te banti bahtic, la sbohlobtesbonic sc'oblal te jch'ul bihile, como hich halbot sc'oblalic: Ha pueblo yu'un Jehová ini, pero fuersa loq'uic tal ta sq'uinal, xchihic.

²¹C'ux la jca'iy te c'alal la jquil te la sbohlobtesbe sc'oblal te jch'ul bihil te sna Israel ta nacionetic ta banti c'ohtique.

²²Ha yu'un, halbeya te sna Israel: Hich yaloj te Jehová, te Ajwalil: Te bin ya jpas, ma ha'uquex ta acuentahic, sna Israel, pero ta scuenta te jch'ul bihil, te la abohlobtesbeyic sc'oblal ta yohlil te nacionetic te banti c'ohemexe.

²³Ya jch'ultes te jmuc'ul bihil, te bohlobtesbil sc'oblal ta yohlil te nacionetic, ha te la abohlobtesbeyic sc'oblal ta yohlilique. Ya me sna'ic te nacionetic te ho'on Jehovahon, xchi te Jehová, te Ajwalil, te c'alal ya quich' ch'ultesel ta acuentahic ta stojol te sitique.

²⁴Ho'on ya jloq'uesex tal ta nacionetic, ya jtsobex talel ta spisil te q'uinaletic, ya quiq'uex tal ta alumalic.

²⁵Ya jtsihtsinex ta lequil ha', hich pocbil ya xc'ohex yu'un spisil abohlilic, soc ya jpocbeyex ta spisil te loc'ombahetic awu'unique.

²⁶Ya ca'beyex yach'il awo'tanic, soc ya ca'beyex yach'il espíritu. Ya jloq'uesbeyex te o'tanil yu'un ton, ya ca'beyex o'tanil yu'un baq'uet.

²⁷Ya ca'beyex ta awo'tanic te espíritu cu'un, ya cac' te yac at'unic te chahpambil mandariletic cu'un, soc te yac ach'uhunic spasel te mandariletic cu'une.

²⁸Ya xnahinex ta q'uinal te la jca'be te ame'atatique; ha'ex pueblohex cu'un ya xc'ohex soc ho'on Dioson awu'unic ya xc'ohon.

²⁹Ya caq'uex ta libre yu'un spisil te bintic chopol ay awu'unic. Ya quic' tal te trigo soc ya cac' p'ohluc, ma ba ya cac' te ya xc'axix awocolic ta wi'nal.

³⁰Ya cac' te bayel ya sitin te te'etic soc bintic ts'unticlambil ta q'uinal, scuenta yu'un ma ba yac atahiquix q'uexlal yu'un wi'nal ta yohlil te nacionetique.

³¹Hich yac ana'ic a te achopol talelic soc te awa'telic te ma lecuc, soc ha'ex nix ya xq'uexawex yu'un te amulic soc te bintic ilobtic sba awu'unique.

³²Na'a me te ma ha'uc hich ya jpas ta acuentahic, xchi te Jehová, te Ajwalil. ¡Q'uexawanic soc mela awo'tanic yu'un te achopolilique!

³³Hich yaloj te Jehová, te Ajwalil: Te bin ora ya jpoquex yu'un spisil achopolilic, ya cac' te ya xnahinex ta pueblohetic soc te ya xcha'ich'ic xan pasel te banti jihnemique.

³⁴Te q'uinal te jochol hil ya yich' chahpanel, ma ba jochol ya xhil ta stojol spisil mach'atic ya xc'axic tey a.

³⁵Hich me ya yalic: Te q'uinal ini te jochol hil, hich c'oht te bin ut'il ts'umbil te'etic ta Edén; soc te pueblohetic ini te jimbilic soc jocholic, yo'tic ayix ts'ahquetic yu'unic soc ay mach'atic ya xnahinic tey a, xchihic.

³⁶Hich te nacionetic ta ajoyobal ya me sna'ic te ho'on Jehovahon la jcha'pas xan te bin jihnem soc la jts'unticlan te banti jochol hil; ho'on, Jehovahon, calojix, soc hich me ya jpas.

³⁷Hich yaloj te Jehová, te Ajwalil: Ya to cac' te ya sc'ambon te sna Israel te hich ya jpasbe: ha te ya cac' p'ohluc te ants-winiquetic hich te bin ut'il ya xp'ohl te jtsohb tuminchijetique.

³⁸Te jihnem pueblohetic ya xnojic ta ipal ants-winiquetic hich te bin ut'il te tuminchijetic te ya yich'ic aq'uel ta stojol Dios, hich te bin ut'il te tuminchijetic ta Jerusalén ta yorahil te q'uinetique. Hich me ya sna'ic a te ho'on Jehovahon, xchi.