Read Tzeltal Ezequiel 37 Bible Online

Ezequiel 37 - Tzeltal bible

Ezequiel 37

¹C'oht ta jtojol te sc'ab Jehová, la yic'on bahel ta scuenta te espíritu yu'un Jehová, la yac'on hilel ta yohlil spamlej te nojel ta baquetic.

²La yac' behenucon ta yohlilic; la jquil te c'ax bayelic ta sba te spamlej, soc mero taquijic.

³Hich la yalbon: Snich'anat winic, ¿ya bal xcuxajic te baquetic ini? xchi. La jac'be: Cajwal, Jehová, ha'at ana'oj atuquel, xchihon.

⁴Ha yu'un hich la yalbon: Hala sc'op-jalwanej ta stojol te baquetic ini, hich xawalbe: ¡Taquin baquetic, a'iybeya awa'iyic te sc'op Jehová!

⁵Te Jehová, te Ajwalil, hich yalbeyej te baquetic ini: Ya ca'beyex awich'ic ic', hich ya xcha'cuxajex a.

⁶Ya ca'beyex achihalic, ya cac' coluc baq'uet, ya jmuquex ta nuhcul soc ya ca'beyex awich'ic ic', hich ya xcha'cuxajex a. Hich me yac ana'ic a te ho'on Jehovahon, xchi.

⁷Ha yu'un la jcal sc'op-jalwanej hich te bin ut'il la spason ta mandar. Te c'alal yacon ta yalel sc'op-jalwanej a ay bin xnilet sc'op, la syuq'uilan sbahic, ¡hahch stsob sbahic te baquetic, jujun bac la stahticlan sbahic!

⁸La jquil, ayix schihalic, noj ta baq'uet soc potsot ta nuhcul. Pero ma ba yich'ojic ic'.

⁹Hich la yalbon te Jehová: Snich'anat winic, hala sc'op-jalwanej ta stojol te ic', hala sc'op-jalwanej, hich me xawalbe te ic': Hich yaloj te Jehová, te Ajwalil: ¡Ic', la' ta schanxuhcul q'uinal soc hu'xiya te baq'uetetic ini te lajemic, scuenta yu'un ya xcha'cuxajic! xchi.

¹⁰Ha yu'un la jcal sc'op-jalwanej hich te bin ut'il la spason ta mandar; la yich'ic ic', hich cha'cuxajic soc la stehc'an sbahic. ¡C'ax bayelic!

¹¹Patil hich la yalbon: Snich'anat winic, spisil te baquetic ini ha te sna Israel. Hich ya yalic: Taquijemix te jbaqueltic soc ch'ayix te bin ya jmahliytique. ¡Jc'axel jimbilotic! xchihic.

¹²Ha yu'un hala sc'op-jalwanej, halbeya te hich yaloj te Jehová, te Ajwalil: Pueblo cu'un, ya jambeyex amuquenalic; ya cac' te ya xloq'uex tal tey a soc te ya suhtex tal ta sq'uinal Israel.

¹³Ya me ana'ic te ho'on Jehovahon, te c'alal ya jambeyex amuquenalic, te ya jloq'uesex talel tey a, pueblo cu'un.

¹⁴Ya ca'beyex te ic' cu'un, hich ya xcha'cuxajex a, soc ya cac' te ya xnahinex ta aq'uinalique. Hich me yac ana'ic a te ho'on Jehovahon la jcalix soc ya jpas, xchi te Jehová.

¹⁵Tal ta jtojol te sc'op Jehová, hich la yal:

¹⁶Snich'anat winic, tsaca jun te', hich me xats'ihbay tey a: Yu'un Judá soc yu'un Israel te jun yo'tan sbahic soc, xchi. Patil tsaca yan te', hich me xats'ihbay tey a: Yu'un José, ha te te' yu'un Efraín, soc yu'un spisil Israel te jun yo'tan sbahic soc, xchi.

¹⁷Patil tsoba schebalic, scuenta yu'un junax ya xc'ohtic ta ac'ab.

¹⁸Te c'alal hich ya sjoc'obat te alumal: ¿Ya bal awa'botcotic jna'cotic bin scuentahil awu'un ini? te xchihique,

¹⁹hich xawalbe: Hich yaloj te Jehová, te Ajwalil: Ya jtsac te te' yu'un José te ay ta sc'ab Efraín soc te chahpalchahp Israel te jun yo'tan sbahic soc, jun ya cac' soc te te' yu'un Judá, hich junax te' ya xc'oht ta jc'ab, xchi.

²⁰Te te'etic te ay bin la ats'ihbay tey a, c'alal ayic ta ac'ab ta stojol sitic,

²¹hich xawalbe: Hich yaloj te Jehová, te Ajwalil: Ya jloq'ues tal te israeletic ta yohlil te nacionetic te banti c'ohemic; ya jtsobic ta bayuc ayic, ya cac' te ya xcha'suhtic tal ta sq'uinalic.

²²Ya cac' te junax nación ya xc'ohtic ta witsiltic yu'un Israel; soc junax ajwalil yu'unic ya xc'ohtic. Mayuquix bin ora te cheb nacionetic ya xc'oht.

²³Ma ba ya sbohlobtesix xan sbahic ta scuenta te loc'ombahetic yu'unic, te bintic ilobtic sba soc te toybahil yu'unique. Ya jcoltay loq'uel ta spisil te toybahil yu'unic te la sta smulic yu'un, ya jpocticlan. Ha pueblo cu'un ya xc'ohtic, ho'on Dioson yu'unic ya xc'ohon.

²⁴Ha ajwalil yu'unic ya xc'oht te ca'bat David, jtuhl nax jcanan ay yu'unic spisilic. Ya st'unic te mandariletic cu'un soc ya sch'uhunic spasel te chapbil mandariletic cu'une.

²⁵Ya xnahinic ta q'uinal te la jca'be te ca'bat Jacob, te banti nahinic te ame'atatique. Stalel me ya xnahiniquix tey a soc te yal-snich'nabic soc te smamataque; soc ha príncipal yu'unic ya xc'oht sbahtel q'uinal te ca'bat David.

²⁶Ya jpas chapbil-c'op scuenta lamal q'uinal ta stojolic; ha chapbil-c'op sbahtel q'uinal ta stojolic. Ya ca'be yich' yipic soc ya cac' te ya xp'ohlic, soc ya cac' ta yohlilic te ch'ul awilal cu'un sbahtel q'uinal.

²⁷Ay ta yohlilic te banti ya xnahinon; ho'on Dioson yu'unic ya xc'ohon, soc ha pueblo cu'un ya xc'oht.

²⁸Ya me sna'ic te nacionetic te ho'on Jehovahon ya jch'ultes te Israel, como sbahtel q'uinal ay ta yohlilic te ch'ul awilal cu'une, xchi te Jehová.