Read Tzeltal Ezequiel 38 Bible Online

Ezequiel 38 - Tzeltal bible

Ezequiel 38

¹Tal ta jtojol te sc'op Jehová, hich la yal:

²Snich'anat winic, ac'a asit awelaw ta stojol Gog ta sq'uinal Magog, te toyol príncipal yu'un Mesec soc Tubal, hala sc'op-jalwanej ta scontrahinel,

³hich xawalbe: Hich yaloj Jehová, te Ajwalil: Ya jcontrahinat, Gog, te toyol príncipalat yu'un Mesec soc Tubal.

⁴Ya cac' te ya suhtat ta apat, ya cotsesbat ganchohetic ta awe, ya jloq'uesat tal soc te soldadohetic awu'un, te cawuhetic soc te jmoheletic ta cawu te ts'acal chapalic soc a'tejibaletic yu'un guerra, c'ax bayelic te yich'ojic tut soc muc'ul mahquilaletic, soc spisilic yich'ojic espada.

⁵Joquimbilic soc Persia, Cus soc Fut; spisilic ay smahquilic soc smahquil sjolic;

⁶joquimbilic soc Gomer soc spisil soldadohetic yu'un; Bet-togarma te talem ta namal ta stojol norte, soc spisil te soldadohetic yu'un. Bayel pueblohetic te ya sjoquinate.

⁷Chahpana aba, ha'at soc bayelic te stsoboj sbahic ta atojol, ha jtsobaw ya xc'ohat yu'unic.

⁸Bayel c'ahc'al ta patil yac awich' iq'uel; ta slajibal te ha'biletic yac awa'be guerra te q'uinal te c'axix yu'un te guerra, ha te mach'atic te la yich'ic tsobel tal ta yohlil bayel nacionetic, te c'ohtic ta witsiltic yu'un Israel, te bayel ha'bil jimbilique. La yich'ic loq'uesel ta yohlil te nacionetic soc spisilic jun yo'tanic ya xnahinic tey a.

⁹Ya xmohat bahel hich te bin ut'il ic'al-ha'al; hich te bin ut'il tocal te ya smac te q'uinal ya xc'ohat soc spisil te soldadohetic awu'un, soc te bayel pueblohetic sjoquinejat.

¹⁰Hich yaloj te Jehová, te Ajwalil: Ta hich ora ay bin ya xtal ta awo'tan, yac anop te bin chopole.

¹¹Hich yac awal: Ya ca'be guerra te jsehp q'uinal te mayuc bin ya scoltay sba a, ya jcontrahin ants-winiquetic te jun yo'tanic soc te jun yo'tan nahinemic ta q'uinal. Spisilic mayuc ts'ahc banti ya xnahinic soc mayuc puertahetic soc sc'atal-te'eletic, xchihat.

¹²Hich ya xmohat bahel yu'un yac apojbe sbiluquic soc yac awelc'ambe bintic ay yu'unic, yu'un yac acontrahin te banti jimbil te ayix yajwal, soc yu'un yac acontrahin ants-winiquetic te la yich'ic stsobel ta yohlil te nacionetic, te ay chambahlametic soc yantic biluquetic yu'un, te nahinemic ta yohlil te jsehp q'uinale.

¹³Sabá soc Dedán, te jchombajeletic yu'un Tarsis soc spisil te príncipaletic yu'un, hich me ya yalbat: ¿Talat bal ta elec'? ¿Atsoboj bal te soldadohetic awu'un yu'un yac apoj biluquetic, yu'un yac awich' bahel plata soc oro, chambahlametic soc yantic biluquetic, yu'un yac awich' bahel c'ax bayel biluquetic? xchihic.

¹⁴Ha yu'un, snich'anat winic, hala sc'op-jalwanej, hich xawalbe te Gog: Hich yaloj te Jehová, te Ajwalil: Ta hich ora, te c'alal jun yo'tan nahinem a te pueblo Israel cu'un, ¿ma bal hichuc yac ana' ha'at?

¹⁵Ya xloc'at tal ta alumal te namal ay ta stojol norte, ha'at soc bayel pueblohetic te sjoquinejat, spisilic mohemic ta cawu, c'ax bayelic, ipal soldadohetic;

¹⁶ya xmohat tal ta scontrahinel te pueblo Israel cu'un hich te bin ut'il tocal te ya smac te q'uinale. C'alal ya sts'acay te sc'ahc'alel, ya quic'at tal ta jq'uinal scuenta yu'un ya me sna'bonic jba te nacionetic te c'alal ha'at ta acuenta, Gog, ya cac' ta ilel ta stojolic te Ch'ul Dioson.

¹⁷Hich yaloj te Jehová, te Ajwalil: ¿Ma bal ha'ucat te la jcalbat ac'oblal ta namey ta scuenta te jalwanejetic cu'un ta Israel, te la yalic ta hich ora te ya xbaht quic'at tal ta scontrahinel te Israel?

¹⁸Ta hich ora, te c'alal ya xtal scontrahin Israel te Gog, xchi te Jehová, te Ajwalil, ya xhahch quilimba soc sc'ahc'al co'tan.

¹⁹Como ta scuenta xut'et co'tan soc ta quilimba caloj te ta hich ora ay tulan nihquel ta sq'uinal Israel,

²⁰te chayetic ta mar, te mutetic ta toyol, te chambahlametic ta q'uinal, spisil te bintic staslajan ya xbehenic ta lumq'uinal, soc spisil te ants-winiquetic ta bahlumilal, ya me xnihquic ta jtojol. Ya xhemts'ujic cohel te witsiltic, ya xhemts'ujic cohel te tontiquil, soc spisil te ts'ahquetic ya xhemts'ujic cohel ta lum.

²¹Ta spisil te witsiltic cu'un ya quic' tal te espada ta scontrahinel te Gog, xchi te Jehová, te Ajwalil; te espada yu'un jujutuhl ya scontrahin te spat-xuhc.

²²Ya ca'be castigo te Gog ta jmilawal-chamel soc malel ch'ich'; ya cac' tulan ha'al te ay yic'al, ay bat, c'ahc' soc azufre ta stojol Gog, ta stojol te soldadohetic yu'un soc te bayel pueblohetic te sjoquineje.

²³Hich ya cac' ta ilel te smuc'ul cu'el soc te Ch'ul Dioson, soc ya cac' te ya xna'ot jba ta stojol bayel nacionetic. Ya me sna'ic te ho'on Jehovahon, xchi.