Read Tzeltal Ezequiel 39 Bible Online

Ezequiel 39 - Tzeltal bible

Ezequiel 39

¹Ha'at, snich'anat winic, hala sc'op-jalwanej ta scontrahinel te Gog, hich xawalbe: Hich yaloj te Jehová, te Ajwalil: Ya jcontrahinat, Gog, toyol príncipalat yu'un Mesec soc Tubal.

²Ya cac' te ya suhtat ta apat, ya jtenat bahel, ya cac' te ya xmohat tal ta namal ta stojol norte, ya quic'at talel ta witsiltic yu'un Israel.

³Ya jwac'bat te t'ihmalte' ay ta aq'uexam-c'ab, soc ya jch'aybat cohel te a'tejibaletic yu'un at'ihmalte' ta awa'el-c'ab.

⁴Ha'at soc spisil te soldadohetic awu'un soc te pueblohetic ajoquinej ya me xlajex ta witsetic yu'un Israel. Ya cac'at ta ti'el yu'un spisil ta chahp mutetic te ya sti'ic baq'uet, soc te ha'mal ti'awal chambahlametique.

⁵Ya me xyahlat cohel ta yohl q'uinal, como hich caloj, xchi te Jehová, te Ajwalil.

⁶Ya jticon bahel c'ahc' ta stojol Magog soc ta stojol te mach'atic jun yo'tanic nahinemic ta ti'ti'mar. Hich me ya sna'ic a te ho'on Jehovahon.

⁷Ya cac' ta na'el te jch'ul bihil ta yohlil te pueblo Israel cu'un, mayuquix bin ora ya cac' te ya sbohlobtesbon te jch'ul bihile; soc te nacionetic ya me sna'ic te ho'on Jehovahon, te Ch'ul Dios ta Israel.

⁸Ya xtalix, ya me xc'ohtix ta pasel, xchi te Jehová, te Ajwalil. Ha'ix sc'ahc'alel ini te la jcalbe sc'oblale.

⁹Te mach'atic nahinemic ta pueblohetic yu'un Israel ya me xloq'uic bahel ta schic'ticlanel te a'tejibaletic yu'un guerra, ha te tut soc muc'ul mahquilaletic, t'ihmalte'etic soc ya'tejibalul t'ihmalte'etic, mazohetic soc lanzahetic. Ya stuhunic ta si' huqueb ha'bil.

¹⁰Ma ba ya yich'ic tal si' ta q'uinal soc ma ba ya sts'etic te tohyem te'etic, yu'un ya schiq'uic te a'tejibaletic yu'un guerra. Ya me spojbeyic sbiluc te mach'atic pojticlambot sbiluc yu'unic, xchi te Jehová, te Ajwalil.

¹¹Ta hich ora ya ca'be te Gog jun lugar ta Israel scuenta smuquenal, ha te spamlej yu'un te mach'atic ya xc'axic bahel ta stojol banti ya xloc' tal c'ahc'al yu'un te mar. Ya smacbe sbe te mach'atic ya xc'axic bahel tey a, como tey ya smuquic a te Gog soc spisil te soldadohetic yu'une; ya ya'beyic sbihilin Spamlej yu'un Hamón-Gog.

¹²Te sna Israel ya xhalaj huqueb u ta smuquel te chamen baq'uetetic, yu'un lec ya xhil yu'unic te sq'uinalique.

¹³Spisil te ants-winiquetic yu'un te q'uinal ya me smuquic; soc te bin c'ahc'alil ya cac' ta ilel te cutsilal, ha c'ahc'al yu'un tse'el-o'tanil ya xc'oht yu'unic, xchi te Jehová, te Ajwalil.

¹⁴Ya stsahic winiquetic te ya yocliyic te q'uinal ta slehel te mach'atic limilic hilel ta lumq'uinal, yu'un ya smuquic, scuenta yu'un lec ya xhil te q'uinale. C'alal ts'acay te huqueb u, ya xhahchic ta lehel.

¹⁵Ya yocliyic te q'uinal, te mach'a ya yil te sbaquel jtuhl winic ya ya'be hilel seña ta sts'ehl, ha to c'alal ya xmucot yu'un te jmuquenajeletic ta Spamlej yu'un Hamón-Gog.

¹⁶Ha nix hich Hamona ya xc'oht sbihil te muc'ul pueblo; hich lec ya xhil te q'uinale.

¹⁷Ha'at, snich'anat winic, hich yaloj te Jehová, te Ajwalil: Halbeya spisil ta chahp te mutetic soc spisil te ti'awal chambahlametic: La'ic, tsoba abahic ta bayuc ta stojol te milbil mahtanil te ya ca'beyex ta atojolic, jun muc'ul milbil mahtanil ta witsiltic yu'un Israel; ya me ati'ic baq'uet soc ya me awuch'ic ch'ich'.

¹⁸Ya me ati'beyic sbaq'uetal te mach'atic ay yipic soc ya me awuch'beyic sch'ich'el príncipaletic ta q'uinal: hich c'ohemic te bin ut'il tat tuminchijetic soc tut tuminchijetic, tentsunetic soc torohetic, spisilic juhp'enic ta Basán.

¹⁹Ta banti te milbil mahtanil te ya ca'beyex yac awe'beyic sjuhp'el ha to c'alal ya xnoj ach'uhtic, soc yac awuch'beyic sch'ich'el ha to c'alal ya xyacubex.

²⁰Ta mesa cu'un ya xnoj ach'uhtic ta cawuhetic, jmoheletic ta cawu soc spisil te winiquetic yu'un guerra, xchi te Jehová, te Ajwalil.

²¹Ya cac' ta ilel te cutsilal ta yohlil te nacionetic, soc spisil te nacionetic ya me yilic te castigo ya ca'be soc te jc'ab te la jcac' ta stojolique.

²²Ta hich ora soc ta patil ya me sna' te sna Israel te ho'on Jehovahon, te Dioson yu'une.

²³Soc te nacionetic ya me sna'ic te ic'otic bahel ta chuquel te sna Israel ta scaj smulic, como ma junuc yo'tanic ta jtojol. Ha yu'un la jmuc jsit quelaw ta stojolic, la jcaq'uic ta sc'ab te scontratac, soc spisilic lajic ta espada.

²⁴Hich la jpasbeyic te bin ut'il ay te schopolilic soc te toybahil yu'unic, hich la jmuc jsit quelaw ta stojolic.

²⁵Ha yu'un, hich yaloj te Jehová, te Ajwalil: Yo'tic ya cac' suhtuc talel te jchuqueletic yu'un Jacob, soc ya jna'be yo'bolil sba spisil te sna Israel; soc ya cac' ta ilel te xut'et co'tan yu'un te jch'ul bihile.

²⁶Te c'alal jun yo'tan nahinemic ta q'uinal soc mayuquix mach'a ya xiwtesot yu'un, ya xch'ay ta yo'tanic te sq'uexlalic soc te ma ba jun yo'tan la yac' sbahic ta jtojol;

²⁷te c'alal la jloq'ues tal ta yohlil te pueblohetic soc la jtsobticlan tal ta yohlil te sq'uinal te scontratac, soc ta scuentahic ya cac' ta ilel ta stojol bayel nacionetic te Ch'ul Dioson.

²⁸Ya me sna'ic te ho'on Jehovahon, te Dioson yu'unic, te c'alal ic'biliquix bahel cu'un ta chuquel ta yohlil a te nacionetic, la jtsob tal ta sq'uinalic, te mayuc ni jtuhluc hilic tey a.

²⁹Ma ba ya jnaq'uix jsit quelaw ta stojolic, como ya jmal cohel te Espíritu cu'un ta stojol te sna Israel, xchi te Jehová, te Ajwalil.