Read Tzeltal Ezequiel 40 Bible Online

Ezequiel 40 - Tzeltal bible

Ezequiel 40

¹Ta yo'ebal scha'winic (25) ha'bil te ayotic ta chuquel a, ta shahchel te ha'bil, ta slajunebal c'ahc'al yu'un te u, ta schanlajunebal (14) ha'bil a te tsalot te muc'ul pueblo, ha nix ta sc'ahc'alel a te la yac' tal sc'ab ta jtojol te Jehová, la yic'on bahel tey a.

²Ta scuenta nahalsitil yu'un Dios la yic'on bahel ta sq'uinal Israel, la yac'on hilel ta sba mero toyol wits te banti ay nahetic te hich yilelic te bin ut'il jun pueblo, ta stojol sur.

³Tey la yic'on bahel a, la jquil jtuhl winic te pajal soc bronce yilel. Teq'uel ta sti'il ochibal, yich'oj ta sc'ab jun p'is pasbil ta lino soc ay jalal-p'is.

⁴Te winic hich la yalbon: Snich'anat winic, ilawil ta lec soc a'iya me awa'iy ta lec, ac'a awo'tan a ta spisil te bintic ya ca'bat awil, como ic'otat li'i scuenta yu'un ya ca'bat awil. Halbeya te sna Israel spisil te bintic yac awil, xchi.

⁵La jquil te ay ts'ahc ta sjoyobal te templo. Te jalal-p'is te ay ta sc'ab te winic ha waqueb xuhc'ubil[12] (te jujun xuhc'ubil ha jun xuhc'ubil soc jtahn-c'abal). La sp'is te ts'ahc, ha jp'is te spimile, soc jp'is te stoyolile.

⁶Patil baht ta ochibal te ay ta stojol sloq'uib c'ahc'al, mo bahel ta cajalcaj mohibal yu'un, la sp'isbe te yich'o-ip te ochibal, jp'is te sjamalile.[13]

⁷Te jujutsahl te ay ta jehch ta jehch ta ochibal, jp'is te snahtil soc jp'is te sjamalil; soc te ts'ahc ta yohlil te jujutsahl ho'eb xuhc'ubil[14] te spimile. Te yich'o-ip te ochibal te ay ta stojol te shahchibal amac', jp'is te sjamalile.

⁸Soc la sp'is te ochibal te ay ta yutil, jp'is te sjamalile.

⁹La sp'is te slehch te ochibal, waxaqueb xuhc'ubil[15] snahtil soc te smarcohil cheb xuhc'ubil[16] te spimile. Te stsalul te ochibal ay ta stojol te templo.

¹⁰Ay oxtsahl ta jujujehch yu'un te ochibal te ay ta stojol banti ya xloc' tal c'ahc'al, pajal sp'isol te yoxebal; ha nix hich pajal sp'isol te jujun stsalul te ochibal.

¹¹La sp'is te ochibale, lajuneb xuhc'ubil[17] sjamalil, soc oxeb xuhc'ubil[18] te snahtile.

¹²Ta sti'il te jujutsahl ay tut ts'ahc, jun xuhc'ubil[19] te stoyolil; te jujutsahl, waqueb xuhc'ubil snahtil soc waqueb xuhc'ubil sjamalil.

¹³La sp'isbe te ochibal c'alal ta smuhquil te jtsahl c'alal ta smuhquil te yan jtsahl, ay ho'eb scha'winic (25) xuhc'ubil[20] te sjamalil te c'oht ta jun puerta ha to ta yan puerta.

¹⁴La sp'is te jujun smarcohil soc yoyal te yochibal te amac', ay oxwinic (60) xuhc'ubil[21]

¹⁵Ta jehch spat te yochibal c'alal ta jehch spat te yochibal ta yutil ay lajuneb yoxwinic (50) xuhc'ubil.[22]

¹⁶Ay tut ventanahetic ta sjoyobal te tsahlaltsahl soc te ts'ahquetic yu'un, ha nix hich te slehcheluletic ay ventanahetic ta sjoyobal ta yutil. Ta jujun oyetic ay lop'talambil xahnetic tey a.

¹⁷Patil la yic'on ochel ta shahchibal amac'. Tsahlaltsahl ay, soc limbil ton ta sjoyobal, ay lajuneb scha'winic (30) ta tsahl ta sjoyobal te amac'.

¹⁸Te limbil ton te ahlan ay, limil bahel c'alal ta ochibaletic, te sjamalil pajal soc te snahtil te ochibaletic.

¹⁹La sp'is c'alal ta yutil te ochibal ta ahlan c'alal ta spat te yochibal te amac' ay ta yutil, ay ho'winic (100) xuhc'ubil[23] ta stojol banti ya xloc' tal c'ahc'al soc ta stojol norte.

²⁰La sp'is te snahtil soc te sjamalil te ochibal te ay ta stojol norte yu'un te shahchibal amac'.

²¹Ay oxtsahl ta jujujehch, te oyetic soc te lehchetic yu'un pajal soc sp'isol te primero ochibal, ha lajuneb yoxwinic (50) xuhc'ubil snahtil soc ho'eb scha'winic (25) xuhc'ubil te sjamalile.

²²Te ventanahetic, te slehch soc te xanetic yu'un, pajal smuc'ul soc te ayic ta ochibal ta stojol banti ya xloc' tal c'ahc'al. Ay huqueb te cajalcaj mohibal yu'un, soc te stsalul ay ta yutil bahel.

²³Te yochibal te amac' ta yutsil snuhp'usitayej sba soc te ochibal ay ta stojol norte, hich te bin ut'il ay ta stojol banti ya xloc' tal c'ahc'al. La sp'is c'alal ta ochibal c'alal ta yan ochibal, ay ho'winic (100) xuhc'ubil.

²⁴Patil la yic'on bahel ta stojol sur, ay jun ochibal ta stojol sur. La sp'is te oyetic yu'un soc te slehch, pajal sp'isol soc te yantique.

²⁵Te ochibal soc te slehch ay ventanahetic yu'un ta sjoyobal, hich nix te bin ut'il te yantique. Te snahtil te ochibal lajuneb yoxwinic (50) xuhc'ubil soc ho'eb scha'winic (25) xuhc'ubil te sjamalile.

²⁶Ay huqueb cajalcaj mohibal yu'un, soc te stsalul ay ta yutil bahel. Ay xahnetic ta oy te ay ta jujujehch.

²⁷Ha nix hich te amac' ta yutil ay yochibal ta stojol sur. La sp'is c'alal te ochibal c'alal ta yan ochibal ay ta stojol sur, ay ho'winic (100) xuhc'ubil.

²⁸Patil la yic'on ochel ta amac' ta yutil ta ochibal ta stojol sur. La sp'is, ha pajal sp'isol soc te yantic ochibaletic.

²⁹Te stsahluletic, ts'ahquetic soc te slehcheluletic pajal sp'isolic soc te yantique. Te ochibal soc te slehch ay ventanahetic ta sjoyobal. Te snahtil te ochibal lajuneb yoxwinic (50) xuhc'ubil soc ho'eb scha'winic (25) xuhc'ubil te sjamalile.

³⁰Te slehcheluletic te ochibaletic ho'eb scha'winic (25) xuhc'ubil sjamalil soc ho'eb xuhc'ubil sc'ubulil.

³¹Te slehcheluletic te ayic ta stojol te shahchibal amac', ay xahnetic ta oyetic yu'un, soc ay waxaqueb cajalcaj mohibal yu'un.

³²La yic'on bahel ta amac' ta yutil ta stojol banti ya xloc' tal c'ahc'al. La sp'is te ochibal, pajal sp'isol soc te yantique.

³³Te stsahluletic, ts'ahquetic soc te slehcheluletic pajal sp'isolic soc te yantique. Te ochibal soc te slehch ay ventanahetic ta sjoyobal. Te snahtil te ochibal lajuneb yoxwinic (50) xuhc'ubil soc ho'eb scha'winic (25) xuhc'ubil te sjamalile.

³⁴Te slehcheluletic te ayic ta stojol te shahchibal amac', ay xahnetic ta oyetic yu'un, soc ay waxaqueb cajalcaj mohibal yu'un.

³⁵Patil la yic'on ochel ta ochibal te ay ta stojol norte. La sp'is, pajal sp'isol soc te yantique.

³⁶Te stsahluletic, ts'ahquetic soc te slehcheluletic pajal sp'isolic soc te yantique, soc ay ventanahetic ta sjoyobal. Te snahtil te ochibal lajuneb yoxwinic (50) xuhc'ubil soc ho'eb scha'winic (25) xuhc'ubil te sjamalile.

³⁷Te slehch ay ta stojol te shahchibal amac', ay xahnetic ta oyetic yu'un, soc ay waxaqueb cajalcaj mohibal yu'un.

³⁸Ay jun stsahlul soc sti'il te la sjam bahel ta stojol te slehch te ochibal, tey ya yich' poquel a te scohtol chic'bil mahtanil.

³⁹Ta yutil te slehch te ochibal, ta jujujehch ay cheb mesahetic te banti ya yich'ic milel te chambahlametic yu'un scohtol chic'bil mahtanil, mahtanil yu'un stojel mulil, soc mahtaniletic yu'un stahel falta.

⁴⁰Ta ochibal ta stojol norte, ta sts'ehl te cajalcaj yu'un, ay cheb mesahetic ta jujujehch.

⁴¹Ha yu'un ay chaneb mesahetic ta yutil soc ay chaneb mesahetic ta spat te ochibal, waxaqueb mesahetic banti ya yich' milel te chambahlametique.

⁴²Chaneb mesahetic yu'un te scohtol chic'bil mahtanil pasbilic ta walubil tonetic, ohlil scheb xuhc'ubil[24] snahtil soc ohlil scheb xuhc'ubil sjamalil, soc jun xuhc'ubil stoyolil. Tey ya yaq'uic a te biluquetic te ha ya smilic a te scohtol chic'bil mahtanil soc te yantic chic'bil mahtaniletique.

⁴³Ta sjoyobal ta yutil tey johc'ajtic a ganchohetic te jtahn-c'abal smuc'ul. Soc ta sba te mesahetic tey ay a te ti'bal yu'un te mahtaniletique.

⁴⁴Ta amac' ta yutil, ta spat te ochibal ay cheb stsalul, te tsahl ay ta sts'ehl te ochibal ay ta stojol norte te yiloj bahel ta stojol sur, te yane ay ta sts'ehl te ochibal ay ta stojol banti ya xloc' tal c'ahc'al[25] te yiloj bahel ta stojol norte.

⁴⁵Hich la yalbon te winic: Te jtsahl te ya yil bahel ta sur ha yu'un te sacerdotehetic te ya scuentahinic te templo.

⁴⁶Soc te jtsahl te ya yil bahel ta stojol norte ha yu'un te sacerdotehetic te ya scuentahinic te scajtajib ta chiq'uel mahtanil; ha te sts'umbal Sadoc, ha'ic nax te sts'umbal Leví te ya xhu' ya xnohpojic ta a'tel ta stojol Jehová, xchi.

⁴⁷La sp'is te amac' ta yutil, ho'winic (100) xuhc'ubil snahtil soc ho'winic (100) xuhc'ubil sjamalil, pajal schanxuhcul. Te scajtajib ta chiq'uel mahtanil ay ta stojol te templo.

⁴⁸La yic'on bahel ta slehch te templo, la sp'is te jujun yoyal te slehch, ho'eb xuhc'ubil ta jehch ta jehch; te sjamalil te yochibal ha oxeb xuhc'ubil ta jujujehch.[26]

⁴⁹Te snahtil te slehch jtahb xuhc'ubil[27] soc bulucheb xuhc'ubil[28] te sjamalile. Ay lajuneb cajalcaj mohibal yu'un, soc ay bahlal oyetic ta jehch ta jehch.