Read Tzeltal Ezequiel 41 Bible Online

Ezequiel 41 - Tzeltal bible

Ezequiel 41

¹Patil, la yic'on bahel ta yutil te templo, soc la sp'is te oyetic, waqueb xuhc'ubil[29] te sjamalil ta jehch ta jehch.

²Lajuneb xuhc'ubil[30] sjamalil te yochibal, soc ay ho'eb xuhc'ubil[31] ta jujujehch te yochibal. La sp'isbe snahtil te Ch'ul Awilal, cha'winic (40) xuhc'ubil[32] soc jtahb xuhc'ubil[33] sjamalil.

³Patil och bahel ta mero yutil soc la sp'isbe jujun yoyal te yochibal, cheb xuhc'ubil[34] spimil te jujune; te yochibal waqueb xuhc'ubil sjamalil, soc te oyetic ta jujujehch, huqueb xuhc'ubil[35] spimil te jujune.

⁴La sp'isbe snahtil, ha jtahb xuhc'ubil soc jtahb xuhc'ubil sjamalil. Hich la yalbon: Ha te Mero Ch'ul Awilal ini, xchi te winique.

⁵Patil la sp'isbe sts'ahcul te templo, waqueb xuhc'ubil spimil; soc chaneb xuhc'ubil[36] te stsahluletic ta sjoyobal te templo.

⁶Te tsahlaltsahl ay ta jujujehch oxcaj ayic, lajuneb scha'winic (30) ta jujucaj. Ta sjoyobal te sts'ahcul te templo ay tut sjamalil ta jujucaj banti yich'oj yip te jujutsahl, scuenta yu'un mayuc bin ya x'och ta sts'ahcul te templo banti ya yich' yip a.

⁷Te tsahlaltsahl muc'ubic bahel ta jujucaj; ya xmuc'ub bahel ta jujucaj mohel ta sjoyobal te templo. Ay mohibal te ya xc'oht c'alal ta toyol, hich ya xhu' mohel bahel c'alal ta scha'cajal soc ta yoxcajal.

⁸Soc la jquil te ay toyol scajtajib ta sjoyobal te templo, tey pasbil hahchel a te tsahlaltsahl, jun jalal te sp'isol te stoyolil, te snahtil waqueb xuhc'ubil.

⁹Te sts'ahcul ta spat te stsahluletic ho'eb xuhc'ubil spimil; soc te banti jamal ta ohlil yu'un te stsahluletic te templo

¹⁰soc te stsahlaltsahl ay ta amac' ay jtahb (20) xuhc'ubil sjamalil ta sjoyobal te templo.

¹¹Te sti'il te jujutsahl jahm bahel ta banti jamal, jun sti'il ta stojol norte soc jun sti'il ta stojol sur. Te sjamalil banti jochol hil ha ho'eb xuhc'ubil.

¹²Te na te snuhp'usitayej sba soc te yamaq'uil te ay ta stojol smahlib c'ahc'al yu'un te templo lajuneb schanwinic (70) xuhc'ubil[37] sjamalil; te sts'ahcul ho'eb xuhc'ubil spimil ta sjoyobal, soc lajuneb yo'winic (90) xuhc'ubil[38] snahtil.

¹³Patil la sp'is te templo, ho'winic (100) xuhc'ubil[39] snahtil. Te sjamalil te amac' macale, te na soc te sts'ahcule, ho'winic (100) xuhc'ubil.

¹⁴Te sjamalil te slehch te templo soc te yamaq'uil ta stojol banti ya xloc' tal c'ahc'al ho'winic (100) xuhc'ubil.

¹⁵La sp'isbe snahtil te na te ay ta spat te templo te snuhp'usitayej sba soc te yamaq'uil, soc te stsahluletic ta jujujehch, ha ho'winic (100) xuhc'ubil. Te yutil te templo, te lehchetic yu'un te amac',

¹⁶te smarcohil, ventanahetic te tut sjamalil soc te stsahluletic ta sjoyobal ta yoxcajal, spisil macajtic ta te' c'alal ta piso c'alal ta ventanahetic, ha nix hich te ventanahetic macajtic ta te',

¹⁷ta yahc'olal te yochibal, ta yutil te templo soc ta spat, soc spisil te ts'ahc ta sjoyobal.

¹⁸Yich'oj pasticlanel sloc'omba querubinetic soc xahnetic, ay xahn ta yohlil te jujun querubín. Te jujun querubín ay cheb yelawic:

¹⁹te june ha yelaw winic ta stojol jun xahn, soc te yane ha yelaw choj ta stojol te yan xahne. Hich ay ta sjoyobal te templo.

²⁰C'alal ta lum c'alal te sba te yochibal ay pasticlambil sloc'omba querubinetic soc xahnetic ta spisil te spahc'ul te templo.

²¹Te marcohetic yu'un te templo chanxuhc ayic, soc ta stojol te Mero Ch'ul Awilal pajal yilel.

²²Te stoyolil scajtajib ta chiq'uel mahtanil pasbil ta te', oxeb xuhc'ubil,[40] soc cheb xuhc'ubil snahtil; te jujun xuhc, te yoc soc te jujujehch, pasbilic ta te'. Hich la yalbon te winique: Ha te mesa te ay ta stojol Jehová, xchi.

²³Te Ch'ul Awilal soc te Mero Ch'ul Awilal ay cha'lehch te puerta ta sti'il.

²⁴Te jujun sti'il ay cha'cha'lehch te ya sjam sbahic ta jehch ta jehch; cha'cha'lehch ta jujun sti'il.

²⁵Ta jujun sti'il te templo ay pasticlambil sloc'omba querubinetic soc xahnetic, pajal soc te ay ta spahc'ul. Ta yahlanul te slehch te templo ay yan slehch pasbil ta te'.

²⁶Soc ta jujujehch te slehch te templo ay ventanahetic te tut sjamalil soc ay sloc'omba xahnetic. Hich ay te stsahluletic te templo soc te marcohetic.