Read Tzeltal Ezequiel 42 Bible Online

Ezequiel 42 - Tzeltal bible

Ezequiel 42

¹Te winic la yic'on bahel ta shahchibal amac' ta stojol norte, la yic'on ochel ta tsahlaltsahl te ayic ta stojol norte, te snuhp'usitayej sba soc te amac' te ay ta stojol te templo.

²Te jehch te ay ta stojol norte ho'winic (100) xuhc'ubil[41] snahtil soc lajuneb yoxwinic (50) xuhc'ubil[42] sjamalil.

³Ay tsahlaltsahl te snuhp'usitayej sba soc te jtahb xuhc'ubil yu'un te amac' ta yutil, soc te snuhp'usitayej sba soc te limbil ton te ay ta shahchibal amac'; te jujuchohl tsahlaltsahl snuhp'usitayej sbahic, soc oxcajal ayic.

⁴Ay jamal jtsahl ta yohlil te cha'chohl tsahluletic, lajuneb xuhc'ubil[43] sjamalil soc ho'winic (100) xuhc'ubil te snahtile. Te puertahetic yu'un ayic ta stojol norte.

⁵Te tsahlaltsahl te ayic ta toyol ha tut sjamalil, como te jamal jtsahl c'ax hich ya stutubteslan a te bin ut'il te tsahlaltsahl ta ahlan soc ta scha'cajal.

⁶Como oxcaj pasbilic, soc mayuc oyetic hich te bin ut'il te oyetic yu'un te amaq'uetic; ha scuentahil te ha tutic xan te oxcajal tsahlaltsahl te bin ut'il te tsahlaltsahl ta ahlan soc ta cha'cajal.

⁷Ay ts'ahc te snuhp'usitayej sba soc te tsahlaltsahl soc te shahchibal amac', lajuneb yoxwinic (50) xuhc'ubil te snahtile.

⁸Como te tsahlaltsahl ta stojol te shahchibal amac' ha lajuneb yoxwinic (50) xuhc'ubil snahtil; te tsahlaltsahl ta stojol te templo ha lajuneb xuhc'ubil sjamalil soc ho'winic (100) xuhc'ubil te snahtile.

⁹Te tsahlaltsahl ta ye'tal ay yochibal ta stojol banti ya xloc' tal c'ahc'al scuenta ochel bahel c'alal ta shahchibal amac'.

¹⁰Ta stojol sur[44] ta snahtil te sts'ahcul te shahchibal amac', ta stojol te templo soc ta stojol te shahchibal amac', tsahlaltsahl ay.

¹¹Te jamal stsalul te ay ta stojolic pajal soc te tsahluletic ta stojol norte; pajal snahtil soc sjamalil, soc spisil te ochibaletic yu'une.

¹²Ha nix hich te ochibaletic yu'un te tsahlaltsahl ayic ta stojol sur; ay yochibal ta shahchibal te jamal jtsahl te snuhp'usitayej sba soc te ts'ahc te ay ta stojol sloq'uib c'ahc'al, yu'un ya x'ochic bahel ta tsahlaltsahl a.

¹³Hich la yalbon te winique: Te tsahlaltsahl te ayic ta stojol norte soc te ayic ta stojol sur, te snuhp'usitayej sba soc te shahchibal amac', ha ch'ul stsahluletic te banti ya swe'ic te ch'ul mahtaniletic te sacerdotehetic te ya xnohpojic ta stojol Jehová; tey ya yaq'uic a te ch'ul mahtaniletic, ha te mahtanil harina, te mahtanil yu'un stojel mulil, soc te mahtanil yu'un stahel falta, como ch'ultesbil te tsahlaltsahl.

¹⁴C'alal ya x'ochic bahel te sacerdotehetic ma ba ya xloq'uic ta ch'ul lugar yu'un ya xbahtic ta shahchibal amac', ya sc'an te nahil ya scholic hilel tey a te sc'u'ic yu'un spasel te ya'telic, como ch'uhltesbilic. Ya slapic yan sc'u'ic, hich ya xnohpojic bahel ta banti ay te ants-winiquetique, xchi.

¹⁵Te c'alal laj yo'tan ta sp'isel te yutil te templo, la yic'on bahel ta yochibal te ay ta stojol sloq'uib c'ahc'al, la sp'is spisil ta sjoyobal.

¹⁶La sp'is ta jalal ta stojol sloq'uib c'ahc'al, ho'winic scha'bahc' (500) xuhc'ubil[45] snahtil ta p'isel ta jalal.

¹⁷La sp'is ta stojol norte, ho'winic scha'bahc' (500) xuhc'ubil snahtil ta p'isel ta jalal.

¹⁸La sp'is ta stojol sur, ho'winic scha'bahc' (500) xuhc'ubil snahtil ta p'isel ta jalal.

¹⁹Patil baht sp'is ta stojol smahlib c'ahc'al, ho'winic scha'bahc' (500) xuhc'ubil snahtil ta p'isel ta jalal.

²⁰Ta schanxuhcul la sp'is; ay sts'ahcul ta sjoyobal, ho'winic scha'bahc' (500) xuhc'ubil snahtil soc ho'winic scha'bahc' (500) sjamalil. Te ts'ahc la yac' te parte ya xc'oht bin ch'ultesbil soc te bin ma ch'ultesbiluque.