Read Tzeltal Ezequiel 43 Bible Online

Ezequiel 43 - Tzeltal bible

Ezequiel 43

¹Te winic la yic'on bahel ta ochibal te ay ta stojol banti ya xloc' tal c'ahc'al.

²La jquil te yac ta talel ta stojol banti ya xloc' tal c'ahc'al te yutsilal te Dios yu'un Israel. Te sc'op pajal soc te sc'op bayel ha'etic, soc ay sts'anabul te lumq'uinal ta scaj te yutsilale.

³Te nahalsitil te la jquil ha pajal soc te nahalsitil la jquil te c'alal tal sjin Jerusalén te Jehová, soc pajal soc te nahalsitiletic te la jquil ta ti' muc'ul-ha' Quebar; hich la jpahcan jba c'alal ta lum.

⁴Te yutsilal te Jehová och bahel ta templo ta yochibal te ay ta stojol banti ya xloc' tal c'ahc'al.

⁵Ha yu'un te espíritu la slicon mohel, la yic'on bahel ta amac' ta yutil, la jquil te noj ta yutsilal Jehová te templo.

⁶C'alal teq'uel ta jts'ehl te winique, la jca'iy te ay mach'a ya sc'oponon c'alal ta templo.

⁷Hich la yal: Snich'anat winic, ha yawil te huctajibal cu'un ini, te banti ya cac' te coc, te banti ya xnahinon ta yohlil te israeletic sbahtel q'uinal. Te sna Israel o te ajwaliletic yu'un ma ba ya sbohlobtesboniquix sc'oblal te jch'ul bihil ta scuenta te antsinel yu'unic soc te schamen baq'uetetic yu'un te ajwaliletic yu'unic ta toyol awilaletic.

⁸Como te c'alal la ya'beyic smarcohil ta sts'ehl te marco cu'un, soc te oy yu'unic ta sts'ehl te oy cu'un, te junax ts'ahc ta yohlilic soc ho'on, la sbohlobtesbonic sc'oblal te jch'ul bihil ta scuenta te bintic ilobtic sba te la spasique; ha yu'un la jlajinlan ta scuenta te quilimba.

⁹Ac'a sch'ayic loq'uel ta namal ta jtojol te antsinel yu'unic soc te schamen baq'uetetic yu'un te ajwaliletic yu'unique, hich ya xnahinon ta yohlilic sbahtel q'uinal.

¹⁰Ha'at, snich'anat winic, halbeya te sna Israel bin ut'il ay a te templo, ac'a q'uexawuquic yu'un te smulic, soc ac'a sp'is yilic te splanohile.

¹¹Teme ya xq'uexawic yu'un spisil te bintic spasojique, a'beya sna'ic te splanohil te templo, bin ut'il chahpambil, banti ay te loq'uibaletic soc te ochibaletic yu'un, spisil bin ut'il ay, spisil te bin ut'il ac'ticlambil, soc spisil te leyetic yu'une. Ts'ihbaya ta stojolic scuenta yu'un ya sch'uhunic spasel spisil bin ut'il ay soc spisil te bintic ay ta pasel tey a.

¹²Ha te ley ini yu'un te templo: ta sjoyobal te sba wits mero ch'ultesbil ya xc'oht. Ha te ley ini yu'un te templo, xchi.

¹³Ha ini te sp'isol te scajtajib ta chiq'uel mahtanil ta xuhc'ubil, ha te nahtil xuhc'ubil te ha xuhc'ubil soc jtahn-c'abal: te scajtajib jun xuhc'ubil[46] stoyolil soc jun xuhc'ubil sjamalil; te sti'il ta sjoyobal jtahn-c'abal stoyolil. Hich ay te stoyolil te scajtajib ta chiq'uel mahtanil.

¹⁴Ta banti stahoj lum te scajtajib te c'alal ta lehchel ta ahlan, cheb xuhc'ubil[47] stoyolil soc jun xuhc'ubil sjamalil. Soc c'alal ta lehchel ta ahlan c'alal ta lehchel ta ahc'ol chaneb xuhc'ubil[48] stoyolil soc jun xuhc'ubil sjamalil.

¹⁵Ta sba te banti ya yich' chiq'uel te bintic milbil, chaneb xuhc'ubil stoyolil, soc ay chaneb xulubiletic ta sba.

¹⁶Te sba te scajtajib ta chiq'uel mahtanil pajal ta schanxuhcul, lahchayeb xuhc'ubil[49] jujuxuhc.

¹⁷Te lehchel yu'un ta ahc'ol pajal ta schanxuhcul, chanlajuneb xuhc'ubil[50] jujuxuhc, soc te sti'il ohlil xuhc'ubil[51] stoyolil ta sjoyobal; te sch'acomal jun xuhc'ubil sjamalil ta sjoyobal. Te cajalcaj mohel ay ta stojol banti ya xloc' tal c'ahc'al.

¹⁸Patil hich la yalbon: Snich'an winic, hich yaloj te Jehová, te Ajwalil: Hich ay te mandariletic ini yu'un te scajtajib ta chiq'uel mahtanil te bin ora ya yich' pasel yu'un ya yich' aq'uel scohtol chic'bil mahtaniletic tey a soc ya yich' tsihtsinel ta ch'ich'.

¹⁹Te sacerdote-levitahetic te sts'umbal Sadoc, te ya xnohpojic ta jtojol yu'un ya x'a'tejic ta jtojol, xchi te Jehová, te Ajwalil, ya me awac' jcoht colel toro scuenta milbil mahtanil yu'un stojel mulil.

²⁰Ya me awich'be jtebuc te sch'ich'el, ya me awac' ta schanebal te xulubiletic, ta schanxuhcul te lehchel ta ahc'ol soc te sti'il ta sjoyobal. Hich yac alecubtes soc yac atojbe smul a.

²¹Soc ya me atsac te toro scuenta stojel mulil, ya me achic' ta fuera yu'un te ch'ul awilal te tsahbile.

²²Ta schebal c'ahc'al yac awac' tentsun te mayuc banti jihnem scuenta mahtanil yu'un stojel mulil; soc ya me slecubtesic te scajtajib ta chiq'uel mahtanil hich te bin ut'il la slecubtesic ta scuenta te toro.

²³C'alal ya xlaj awo'tan ta slecubtesel, ya me awac' jcoht colel toro soc jcoht tat tuminchij te mayuc banti jihnem yu'un.

²⁴Ya me awac' ta stojol Jehová, te sacerdotehetic ya ya'beyic ats'am soc ya yaq'uic scuenta scohtol chic'bil mahtanil ta stojol Jehová.

²⁵Huqueb c'ahc'al ya me awaq'uic jujucoht tentsun ta jujun c'ahc'al scuenta mahtanil yu'un stojel mulil, soc ya me awaq'uic jcoht colel toro soc jcoht tat tuminchij te mayuc banti jihnem yu'un.

²⁶Huqueb c'ahc'al ya me yaq'uic mahtaniletic scuenta stojel mulil soc ya me slecubtesbeyic sc'oblal, hich ya sch'ultesic.

²⁷C'alal ya sts'acay te huqueb c'ahc'al, ta swaxaquebal c'ahc'al bahel te sacerdotehetic ya me yaq'uic ta sba te scajtajib ta chiq'uel mahtanil te scohtol chic'bil mahtaniletic soc te mahtaniletic scuenta lamal-o'tanil awu'unic. Hich lec ya xc'ohex ta jtojol a, xchi te Jehová, te Ajwalil.