Read Tzeltal Ezequiel 44 Bible Online

Ezequiel 44 - Tzeltal bible

Ezequiel 44

¹Te winic la scha'ic'on xan bahel ta ochibal ay ta pat templo, te ay ta stojol banti ya xloc' tal c'ahc'al, ha macal.

²Hich la yalbon te Jehová: Te ochibal ini macal ya xhil; ma ba ya yich' jamel, mayuc mach'a ya x'och tey a, como tey och tal a te Jehová, te Dios yu'un Israel; ha yu'un macal ya xhil.

³Ha nax te ajwalil, te bin ut'il ha ajwalil, ya xhu' ya shuhcan sba tey a ta we'el ta stojol Jehová. Ya x'och talel soc ya xloc' bahel ta stsalul te ochibal, xchi.

⁴La yic'on bahel ta ochibal ta stojol norte ta stojol te templo; la jquil te noj ta yutsilal Jehová te sna Jehová; la jpahcan jba c'alal ta lum.

⁵Hich la yalbon te Jehová: Snich'anat winic, a'iya awa'iy ta lec, ilawil ta lec, a'iya awa'iy ta lec spisil te bintic ya calbat sc'oblal spisil te chahpambil mandariletic yu'un te sna Jehová soc spisil te leyetic yu'une. Ilawil ta lec spisil te ochibaletic yu'un te templo soc spisil te banti ya xloq'uic bahele.

⁶Halbeya te jtoyba-o'tan sna Israel: Hich yaloj te Jehová, te Ajwalil: ¡Tic'aniquix a yu'un spisil bintic ilobtic sba awu'un, sna Israel!

⁷La awaq'uic ochel jyanlumetic ta ch'ul awilal cu'un, ha te mach'atic ma ba yich'ojic circuncisión ta yo'tanic soc ta sbaq'uetalic, la abohlobtesbeyic sc'oblal te ch'ul awilal cu'un c'alal yac awa'bonic jmahtanin we'elil, sjuhp'el soc ch'ich', soc la ajimbonic te chapbil-c'op cu'un ta scuenta spisil te bintic ilobtic sba awu'unique.

⁸Ma ba ach'uhunejic spasel te bintic chahpambil sc'oblal te bintic ch'uhltesbilic cu'un, la awa'beyic scuentahin jyanlumetic te templo cu'une.

⁹Hich yaloj te Jehová, te Ajwalil: Mayuc jtuhluc jyanlum te ma ba yich'ojic circuncisión ta yo'tanic soc ta sbaq'uetalic ya xhu' ya x'och ta ch'ul awilal cu'un, ta spisil te jyanlumetic te nahinemic ta yohlil te israeletique.

¹⁰Te levitahetic te loq'uic bahel ta jtojol te c'alal namij bahel ta jtojol te Israel, te la st'unic bahel te loc'ombahetic yu'unic, ya me stojic te smulique.

¹¹Ya yich'ic a'batinel ta ch'ul awilal cu'un ta jcanan-ochibaletic yu'un te templo soc ta yan a'telil ta templo. Ha'ic ya smilic te scohtol chic'bil mahtaniletic soc te chic'bil mahtaniletic yu'un te pueblo, soc ya yac' sbahic ta a'batinel yu'unic.

¹²Te bin ut'il la yac' sbahic ta a'batinel ta stojol te loc'ombahetic yu'unic soc te la yaq'uic sc'ohchin sbahic ta mulil te sna Israel, ha yu'un jachoj jc'ab soc la jcal ta jamal te ya me stojic te smulique, xchi te Jehová, te Ajwalil.

¹³Ma xhu' ya xnohpojic ta jtojol ta a'tel scuenta sacerdote, soc ma xhu' ya xnohpojic tal ta stojol te bintic ch'ultesbil cu'un o te bintic mero ch'ultesbil, ya me yich'ic sq'uexlalic soc te bintic ilobtic sba te la spasique.

¹⁴Ya ca'be ta scuentahic scanantayel te templo, spisil te bintic pasel ya sc'an tey a.

¹⁵Pero te sacerdote-levitahetic, te sts'umbal Sadoc, te la sch'uhunic spasel te bintic la sc'an pasel ta ch'ul awilal cu'un te c'alal la yihquitayonic hilel te israeletic, ha'ic ya xnohpojic ta a'tel ta jtojol, soc ya stehc'an sbahic ta jtojol yu'un ya ya'bonic te sjuhp'el soc te ch'ich', xchi te Jehová, te Ajwalil.

¹⁶Ha'ic ya x'ochic ta ch'ul awilal cu'un, ya xnohpojic tal ta mesa cu'un yu'un ya yac' sbahic ta a'batinel cu'un soc ya spasic te a'tel cu'une.

¹⁷Te c'alal ya x'ochic bahel ta ochibaletic yu'un te amac' ta yutil, ya me slapic sc'u'ic pasbilic ta lino; ma ba ya slapic sc'u'ic pasbilic ta tsots te c'alal ayic ta a'tel ta amac' ta yutil soc ta yutil te templohe.

¹⁸Potsbil sjolic ta lino, soc ya me slapic scomil wexic pasbilic ta lino. Ma me ayuc bin ya schuc sch'uhtic a te ya chiq'uin yu'une.

¹⁹Te c'alal ya xloq'uic bahel ta shahchibal amac' te banti ay te ants-winiquetic, ya me sloq'uesic te sc'u' spaq'uic te tuhun yu'unic ta a'tel, ya me yihquitayic hilel ta stsahluletic te ch'ul awilal, ya slapic yan c'u'ul, scuenta yu'un ma ba ya sch'ultesic te ants-winiquetic ta scuenta te sc'u'ique.

²⁰Ma me squits' stsotsel sjolic soc ma me xyac' nahtubuc, set'el nax ta set'el te stsotsel sjolic.

²¹Ma me ayuc jtuhl sacerdote te ya yuch' vino te c'alal ya x'och bahel ta amac' ay ta yutil.

²²Ma me xnuhpun soc me'ba' ants o ants te ihquitaybil hilel yu'un te smamalal, ya xnuhpun soc ach'ix te ha sts'umbal Israel, o me'ba' ants yu'un jtuhl sacerdote.

²³Ya me ya'beyic snop te pueblo cu'un te bin ch'ultesbil soc te bin ma ch'ultesbiluc, te bin lec sc'oblal soc te bin bohloben sc'oblale.

²⁴Ta banti ay pleito, hich me ya schahpanic te bin ut'il ya yal te mandariletic cu'une. Ya me sch'uhunic spasel te mandariletic soc te halbil mandariletic cu'un yu'un spisil te q'uinetic cu'un, soc ya me yich'ic ta muc' te c'ahc'aletic yu'un cux-o'tan cu'une.

²⁵Ma me xnohpojic ta stojol te mach'a chamen, scuenta yu'un ma ba ya sbohlobtes sc'oblal; yan teme stat, snan, squerem-nich'an, o yantsil-nich'an, sbanquil, swix o yihts'in te ma ba nuhpunem, ya xhu' ya sbohlobtes sc'oblal yu'un.

²⁶Te c'alal lecubtesbil sc'oblal, ya smahliyic huqueb c'ahc'al.

²⁷Te bin c'ahc'alil te ya x'och ta ch'ul awilal, ta amac' ta yutil, yu'un ya spas ya'tel, ya me yac' milbil mahtanil scuenta stojel mulil, xchi te Jehová, te Ajwalil.

²⁸Te bin ya x'a'bot yich'ic hilel: Ho'on abi. Ma ba ya x'a'bot yich'ic q'uinal ta Israel, ho'on me te bin ya yich'ic hilele.

²⁹Ya me swe'ic te mahtanil harina, te milbil mahtanil scuenta stojel mulil, soc te mahtanil yu'un stahel falta. Spisil te bintic ch'uhltesbilic ta Israel, ha yu'unic.

³⁰Ha yu'un te sacerdotehetic te sba sit spisil te sba sit te ts'unub-awaliletic, soc spisil te mahtaniletic te ya yich'ic aq'uel awu'unic. Soc ha nix hich ya me awa'beyic te sacerdote te shahchibal ta wots'el te harina awu'unic, scuenta yu'un ya xc'oht bendición ta anahic a.

³¹Te sacerdotehetic ma me swe'ic mutetic o yantic chambahlametic te hich nax chamenic, o te butsticlambil ta chambahlam.