Read Tzeltal Ezequiel 45 Bible Online

Ezequiel 45 - Tzeltal bible

Ezequiel 45

¹C'alal yac apucticlan te q'uinal ta scuenta seña ta na'el, ya me awac' jsehpuc q'uinal yu'un Jehová scuenta ch'ultesbil q'uinal oxpic soc lajunwinic yoxbahc' (25,000) xuhc'ubil[52] snahtil soc jpic soc ho'bahc' (10,000) xuhc'ubil[53] sjamalil. Ha ch'ultesbil q'uinal ya xc'oht ta spisil.

²Tey nix ta q'uinal ini ay me jsehp q'uinal yu'un te ch'ul awilal, ho'winic scha'bahc' (500) xuhc'ubil[54] ta schanxuhcul, soc ho'winic (100) xuhc'ubil[55] sjamalil ta sjoyobal te jochol ya xhile.

³Tey ta q'uinal ini ya me ap'is jsehp q'uinal, oxpic soc lajunwinic yoxbahc' (25,000) xuhc'ubil snahtil soc jpic soc ho'bahc' (10,000) xuhc'ubil sjamalil, tey ya xc'oht a te ch'ul awilal, ha te Mero Ch'ul Awilal.

⁴Te q'uinal ini ha ch'ultesbil q'uinal te sacerdotehetic te ya x'a'tejic ta ch'ul awilal, te ya xnohpojic ta a'tel ta stojol Jehová. Ya xtuhun yu'un lugar banti ya xnahinic soc ch'ul lugar yu'un te templo.

⁵Ha nix hich ya me ap'is oxpic soc lajunwinic yoxbahc' (25,000) xuhc'ubil snahtil soc jpic soc ho'bahc' (10,000) xuhc'ubil sjamalil te ha yu'un te levitahetic te ya x'a'tejic ta templo, scuenta pueblohetic yu'unic ta banti ya xnahinic.

⁶Scuenta sq'uinal te muc'ul pueblo ya me ap'isic ohlil yoxlajunbahc' (5,000) xuhc'ubil[56] sjamalil soc oxpic soc ohlil yoxbahc' (25,000) xuhc'ubil snahtil, ta sts'ehl te q'uinal yu'un te ch'ul awilal. Ha me yu'un spisil te sna Israel.

⁷Te príncipal ya yich' te q'uinal ta jujujehch te q'uinal yu'un te ch'ul awilal soc yu'un te muc'ul pueblo, te j'ohlil ay ta stojol banti ya xloc' tal c'ahc'al yu'un te sq'uinal te templo, te j'ohlil xan ay ta stojol smahlib c'ahc'al, ya xc'oht c'alal ta sti'il te q'uinal ta stojol banti ya xloc' tal c'ahc'al c'alal ta sti'il te q'uinal ta stojol smahlib c'ahc'al, pajal snahtil soc te jsehp q'uinal yich'oj a'beyel te jchahp sts'umbal Israel.

⁸Te q'uinal ini ha ya xhil ta scuenta Israel. Te príncipaletic cu'un ma ba ya yuts'imboniquix te pueblo cu'un; ya ya'beyic te sq'uinal te sna Israel, ha chican te jaychahp ayic.

⁹Hich yaloj te Jehová, te Ajwalil: ¡Tic'aniquix a, príncipaletic yu'un Israel! Ihquitayahic te uts'inwanej soc te elec'. Stojil me xawa'iy chahpanwanej soc stojil me bintic yac apasique. Ma xateniquix loq'uel ta sq'uinalic te pueblo cu'un, xchi te Jehová, te Ajwalil.

¹⁰Ts'acaluc me sp'isol yalal awu'unic, soc ts'acaluc me te efa soc te bato.

¹¹Pajal me sp'isol te efa[57] soc te bato:[58] Te jun bato ha jun ta slajunebal te homer,[59] ha nix hich te efa ha jun ta slajunebal te homer; ta schebalic ya yich'ic p'isel ta homer.

¹²Te siclo ha jtahb gera.[60] Te jun mina ha jtahb (20) siclo soc ho'eb scha'winic siclo (25) soc ho'lajuneb (15) siclo.

¹³Ha te mahtanil ini te yac awaq'uic: Ta jujun homer yu'un trigo ya me awaq'uic jun ta swaquebal te efa, soc ta jujun homer yu'un cebada ya me awaq'uic jun ta swaquebal te efa.

¹⁴Te jayeb aceite yac awaq'uic, hich ay: ta jujun coro ya me awaq'uic jun ta slajunebal te bato. (Te coro pajal soc lajuneb bato o jun homer, como te lajuneb bato pajal soc jun homer.)

¹⁵Ta lajlajunwinic ta coht tuminchij ya me awaq'uic jcoht ta lequil aquetic yu'un Israel. Ha ya xtuhun ta mahtanil harina, scohtol chic'bil mahtanil soc ta mahtanil scuenta lamal-o'tanil, yu'un ya yich' tojel mulil yu'unic a, xchi te Jehová, te Ajwalil.

¹⁶Spisil te ants-winiquetic ta q'uinal ya me ya'beyic ta mahtanil te príncipal yu'un Israel.

¹⁷Yan te príncipal ay ta scuenta yaq'uel te scohtol chic'bil mahtaniletic, mahtanil harina soc te malbil mahtanil ta yorahil te muc'ul q'uinetic, ta yuhninal u, ta sc'ahc'alel cux-o'tan soc ta spisil te q'uinetic yu'un Israel. Ha me ya yac' te milbil mahtaniletic yu'un stojel mulil, mahtaniletic harina, scohtol chic'bil mahtaniletic, soc te mahtaniletic yu'un lamal-o'tanil yu'un ya xpasbot perdón yu'un smul a te sna Israel.

¹⁸Hich yaloj te Jehová, te Ajwalil: Ta sba c'ahc'alil ta shahchibal u ya me awaq'uic jcoht jcolel toro te mayuc bin jihnem yu'un, ya me alecubtes a te ch'ul awilal.

¹⁹Te sacerdote ya me yich' jtebuc te sch'ich'el te mahtanil yu'un stojel mulil, ya me yac' ta smarcohil te yochibal te templo, ta schanxuhcul te slehchul ta ahc'ol ta scajtajib ta chiq'uel mahtanil, soc ta smarcohil te yochibal te amac' ay ta yutil.

²⁰Ha nix hich yac apas ta shuquebal c'ahc'al yu'un te u yu'un te mach'atic ma yolojuc la sta smulic o te ma ba la sna'ic; hich yac alecubtes a te templohe.

²¹Ta schanlajunebal c'ahc'al ta shahchibal u, ya me apasic te q'uin Pascua, huqueb c'ahc'al ya xhalaj te q'uine; ya me awe'ic pan te ma ba yich'oj levadura.

²²Ta c'ahc'al ini te príncipal ya me yac' jcoht jcolel toro scuenta milbil mahtanil yu'un stojel smul soc stojel smulic spisil te ants-winiquetic ta q'uinal.

²³Te huqueb c'ahc'al te ya xhalaj te q'uin, ta jujun c'ahc'al ya me yac' ta stojol Jehová huc-coht jcolel torohetic soc huc-coht tat tuminchijetic te mayuc bin jihnem yu'unic scuenta scohtol chic'bil mahtanil; soc ta jujun c'ahc'al ya me yac' jcoht tat tentsun scuenta milbil mahtanil yu'un stojel mulil.

²⁴Ta jujucoht jcolel torohetic soc ta jujucoht tat tuminchijetic ya me ya'be sjoquin jun efa[61] scuenta mahtanil harina, soc jun hin[62] aceite.

²⁵Ta yo'lajunebal (15) c'ahc'al ta shuquebal u, ta huqueb c'ahc'al yu'un te q'uin, ha nix hich ya me yac' mahtanil yu'un stojel mulil, scohtol chic'bil mahtanil, mahtanil harina, soc te aceite.