Read Tzeltal Ezequiel 46 Bible Online

Ezequiel 46 - Tzeltal bible

Ezequiel 46

¹Hich yaloj te Jehová, te Ajwalil: Te yochibal te amac' ta yutil te ay ta stojol banti ya xloc' tal c'ahc'al macal ya xhil te waqueb c'ahc'al yu'un a'tel, ya yich' jamel ta sc'ahc'alel cux-o'tan soc ta sc'ahc'alel yuhninal u.

²Te príncipal ya x'och tal ta stsalul te yochibal te shahchibal amac', ya stehc'an sba ta sts'ehl te smarcohil te ochibal, c'alal te sacerdotehetic ya yaq'uic te scohtol chic'bil mahtanil soc te mahtanil scuenta lamal-o'tanil yu'un, tey ya sch'uhuntay a ta smarohil te ochibal, patil ya xloc' bahel. Pero ma ba ya yich' maquel te ochibal ha to c'alal ta tibiltic.

³Ha nix hich te ants-winiquetic yu'un te q'uinal ya sch'uhuntayic te Jehová ta stojol te ochibal ta sc'ahc'alel cux-o'tan soc ta yuhninal u.

⁴Te scohtol chic'bil mahtanil te ya ya'be Jehová te príncipal ta sc'ahc'alel cux-o'tan ha wac-coht jcolel tuminchijetic soc jcoht tat tuminchij te mayuc bin jihnem yu'unic;

⁵soc ta jujucoht te tat tuminchij ya yac' jun efa[63] harina; soc ta jujucoht jcolel tuminchijetic chican jayeb harina ya xhu' ya yac', soc ta jujun efa harina ya yac' jun hin[64] aceite.

⁶Ta sc'ahc'alel yuhninal u ya me yac' jcoht jcolel toro soc wac-coht jcolel tuminchijetic soc jcoht tat tuminchij te mayuc bin jihnem yu'unique.

⁷Ya yac' jun efa harina soc te jcolel toro, soc jujun efa harina soc jujucoht tat tuminchij; pero chican jayeb harina ya xhu' ya yac' soc te jcolel tuminchijetique. Soc ya yac' jujun hin aceite soc jujun efa harina.

⁸Te c'alal ya x'och tal te príncipal, ya me x'och talel ta stsalul te ochibal, soc tey nix ya loc' bahel a.

⁹C'alal yax talic ta stojol Jehová ta jujun q'uinetic te ants-winiquetic yu'un te q'uinal, te mach'a ya x'och tal ta ochibal ta norte, ya xloc' bahel ta ochibal ta stojol sur, te mach'a ya x'och tal ta ochibal ta stojol sur, ya xloc' bahel ta ochibal ta stojol norte; ma ba ya xloc' ta ochibal ta banti och talel, ya me xloc' bahel ta ochibal te snuhp'usitayej sba soc.

¹⁰C'alal ya x'ochic talel, ha nix hich te príncipal ya sjoquin ochel, soc te c'alal ya xloq'uic bahel, ha nix ya sjoquin loq'uel.

¹¹Ta muc'ul q'uinetic soc ta yantic tsoblejetic ya me yich' aq'uel jun efa harina ta jujucoht jcolel toro, jun efa ta jujucoht tat tuminchij; soc ta jujucoht jcolel tuminchijetic chican ban c'alal ya xhu' ta aq'uel. Soc ta jujun efa harina ya me yich' aq'uel jun hin aceite.

¹²Te príncipal c'alal ya ya'be Jehová scohtol chic'bil mahtanil o mahtanil yu'un lamal-o'tanil ta scuenta sc'anojel yo'tan, ya yich' jambeyel te ochibal ta stojol banti ya xloc' tal c'ahc'al; hich me yac' te scohtol chic'bil mahtanil o te mahtanil yu'un lamal-o'tanil hich te bin ya spas ta sc'ahc'alel cux-o'tan, patil ya xloc' bahel. C'alal loq'uemix bahel a, ya yich' maquel te ochibal.

¹³Ta jujun c'ahc'al ya me awac' ta stojol Jehová jcoht tuminchij te ay jun ya'bilal soc te mayuc bin jihnem yu'un scuenta scohtol chic'bil mahtanil; ta jujun sahb hich yac apas.

¹⁴Ta jujun sahb ya me awa'be sjoquin jun ta swaquebal efa harina soc jun ta yoxebal hin aceite te ya yich' wots'el soc te lequil harina. Ha te mahtanil te spisil ora ya yich' a'beyel te Jehová, ha mandaril te stalel ay.

¹⁵Ta jujun sahb ya me awaq'uic te jcoht jcolel tuminchij, te mahtanil harina soc te aceite scuenta scohtol chic'bil mahtanil te ya yich' aq'uel spisil ora.

¹⁶Hich yaloj te Jehová, te Ajwalil: Te príncipal teme ya sq'uebembe jsehp sq'uinal jtuhluc te snich'an, ha yu'unic ya xc'oht, ha q'uinal te stalel ya xhil yu'unic.

¹⁷Pero teme ya ya'be jsehp sq'uinal te ya'bat, ha nax yu'un ya xc'oht c'alal ta ha'bil yu'un hilel ta libre; ta hich ora ya suht xan ta stojol te príncipal, como ha yu'un te snich'nab te q'uinale.

¹⁸Te príncipal ma ba ya yich'be sq'uinal te pueblo, ma ba ya spojbe te bintic ay yu'une. Te bintic ay yu'un ha te ya ya'be yich' te snich'nab, scuenta yu'un mayuc jtuhluc te pueblo cu'un te ya yich' tenel loq'uel ta sq'uinal, xchi.

¹⁹Patil te winic la yic'on ochel ta ochibal te ay ta stojol te ochibal yu'un te ch'ul tsahluletic yu'un te sacerdotehetic te ayic ta stojol norte, la jquil jun lugar tey ta slajibal te na ta stojol smahlib c'ahc'al.

²⁰Hich la yalbon: Ha te banti te sacerdotehetic ya sta'ajtesic te mahtanil yu'un stahel falta soc te mahtanil yu'un stojel mulil; soc tey ya spayic a te mahtanil harina, scuenta yu'un ma ba ya yich' loq'uesel bahel ta shahchibal amac', te hich ya yich' ch'ultesel a te ants-winiquetique, xchi.

²¹Patil la yic'on bahel ta shahchibal amac', la yic'on bahel ta schanebal xuhc te amac', ta jujun xuhc ay jun tut amac' tey a.

²²Ta schanebal xuhc te amac' ay tut amaq'uetic te macalic, cha'winic (40) xuhc'ubil[65] snahtil soc lajuneb scha'winic (30) xuhc'ubil[66] sjamalil; pajal sp'isol schanebal.

²³Ay pahc' pasbil ta ton ta sjoyobal schanebalic, ta ye'tal ta sjoyobal te pahc' ay yawil c'ahc'.

²⁴Hich la yalbon: Ha te cocinahetic te banti te mach'atic ya x'a'tejic ta templo ya spayic te mahtaniletic yu'un te ants-winiquetique, xchi.