Read Tzeltal Ezequiel 47 Bible Online

Ezequiel 47 - Tzeltal bible

Ezequiel 47

¹Patil te winic la yic'on suhtel ta yochibal te templo. La jquil yac ta loq'uel ha' ta ye'tal te smarcohil te templo, yac ta oc bahel ta stojol banti ya xloc' tal c'ahc'al, como te yochibal te templo ay ta stojol banti ya xloc' tal c'ahc'al; te ha' yac ta oc bahel ta ye'tal te swa'el te templo, ta stojol sur yu'un te scajtajib ta chiq'uel mahtanil.

²La yic'on loq'uel ta ochibal ta stojol norte, la ya'bon cac' buelta ta be ta spat ts'ahc c'alal ta ochibal ay ta stojol banti ya xloc' tal c'ahc'al; la jquil te yac ta loq'uel tal te ha' ta stojol sur.

³Te winic loc' bahel ta stojol banti ya xloc' tal c'ahc'al, yich'oj ta sc'ab lazo yu'un p'is. La sp'is ohlil yoxbahc' (1,000) xuhc'ubil,[67] la yac' c'axucon ta yacan ha', c'oht c'alal ta snuc' coc te ha'e.

⁴La sp'is xan ohlil yoxbahc' (1,000) xuhc'ubil, la yac' c'axucon ta yacan ha', c'oht c'alal ta sjol cacan. La scha'p'is xan ohlil yoxbahc' (1,000) xuhc'ubil, la yac' c'axucon ta yacan ha', c'oht c'alal ta jch'uyumba.

⁵La scha'p'is xan ohlil yoxbahc' (1,000) xuhc'ubil, muc'ul-ha'ix c'oht, ma ba hu'ix jc'axel a, como noj mohel te ha' te ma xhu' c'axel a, ha nax ta nuxel.

⁶Hich la yalbon: Snich'anat winic, ¿la bal awil? xchi. Patil la yic'on suhtel tal ta sti'il te muc'ul-ha'.

⁷C'alal suhton bahel tey a, la jquil ay bayel te'etic ta jujujehch.

⁸Hich la yalbon: Te ha' ini ya x'oquin bahel ta q'uinal ta stojol banti ya xloc' tal c'ahc'al, ya xco bahel ta Arabá, ya x'oquin ochel ta Mar Muerto. C'alal ya x'och ta mar, ya xlecub yu'un te ha'e.

⁹Spisil te bintic cuxajtic te ya xnuxinic ta bayuc ya xbahtic te cheb muc'ul-ha'etic, ya xcuxajic; c'ax bayel chayetic ya xc'oht como tey ochem a te ha'e, como ya xlecub te ha' yu'un. Ya xcuxaj spisil bayuc ya xbaht te muc'ul-ha'.

¹⁰Ay jtsac-chayetic ta sti'il, c'alal En-gadi c'alal ta En-eglaim tey ya st'imic a te stsaco-chayique. Bayel ta chahp chayetic, hich te bin ut'il te chayetic ta Muc'ul Mar.

¹¹Pero te nicnic ahch'al soc te pampam ha'etic yu'un ma ba ya xlecubic, ha sloq'uesojibal ats'am ya xhilic.

¹²Ta jujujehch sti'il te muc'ul-ha' ya xcol spisil ta chahp te'etic te ya yac'ticlan sit. Ma ba ya xluhbaj ya'binal soc spisil ora ay sit. Ta jujun u ya yac'ticlan sit, como te ya'lel yac ta loq'uel tal ta ch'ul awilal. Te sit ya xtuhun yu'un we'elil soc te ya'binal ya xtuhun yu'un pox.

¹³Hich yaloj te Jehová, te Ajwalil: Ha te sti'il te q'uinal te yac awa'be yich'ic te lahchaychahp sts'umbal Israel. Te José cha'sehp ya yich'.

¹⁴Pajal ya me apucticlanic; ha yu'un te la jach jc'ab soc la jcal ta jamal te ya ca'be te ame'atatic; ha yu'un ha te q'uinal ini te yac awich'ic hilel.

¹⁵Te sti'il te q'uinal ta stojol norte, ha te hahchem ta Muc'ul Mar ta sbehlal Hetlón, ya xc'ax bahel ta Zedad,

¹⁶Berota, soc Sibraim te ay ta ohlil yu'un te sti'il Damasco soc te sti'il Hamat; ya xbaht ta Hazar-haticón te ay ta sti'il Haurán.

¹⁷Ha yu'un te sti'il ta stojol norte ya xhahch ta mar c'alal ta Hazar-enán, ta stojol norte yu'un te sti'il Damasco, soc ta sti'il Hamat te ay ta stojol norte.

¹⁸Te sti'il ta stojol banti ya xloc' tal c'ahc'al, ya xhahch bahel ta ohlil yu'un Haurán soc Damasco, ya xc'ax ta sti'il bahel te muc'ul-ha' Jordán ta ohlil yu'un Galaad soc te sq'uinal Israel, c'alal ta mar te ay ta stojol banti ya xloc' tal c'ahc'al c'alal ta Tamar; ha te sti'il ta stojol banti ya xloc' tal c'ahc'al.

¹⁹Te sti'il ta stojol sur, ya xhahch ta Tamar, ya xc'ax ta ha'etic yu'un Meriba-cades; ya xc'ax ta uc'um yu'un Egipto, ya xc'oht c'alal ta Muc'ul Mar. Ha te sti'il ta stojol sur.

²⁰Te sti'il ta stojol smahlib c'ahc'al, ha sti'il ya xc'oht te Muc'ul Mar c'alal ta stojol te ochibal yu'un Hamat. Ha te sti'il ta stojol smahlib c'ahc'al.

²¹Ha yu'un ya me apuctilambe ta awohlilic, chican te jaychahp ay yu'un Israel.

²²Yac apasic seña ta na'el scuenta spucticlanel te q'uinal ta awohlilic soc te jyanlumetic te nahinemic ta awohlilic, te ayinem yal-snich'nabic ta awohlilique. Hichuc me ta awo'tanic te pajal ayic soc te snich'nab Israel; pajal yac apasbeyic seña ta na'el soc te ha'exe, yu'un ya yich'ic sq'uinalic ta yohlil te chahpalchahp yu'un Israel.

²³Ta jchahp yu'un Israel banti ya xnahin te jyanlumetic, tey yac awa'beyic yich' a te sq'uinalic, xchi te Jehová, te Ajwalil.