Read Tzeltal Ezequiel 48 Bible Online

Ezequiel 48 - Tzeltal bible

Ezequiel 48

¹Hich ay te sbihilic te chahpalchahp yu'un Israel: Te jsehp q'uinal ya yich' te Dan: ta stojol norte ya xhahch bahel ta sbehlal Hetlón te ya xbaht ta Hamat, c'alal ta Hazar-enán te ay ta sti'il Damasco te ay ta stojol norte, nopol ta Hamat, c'alal ta stojol banti ya xloc' tal c'ahc'al c'alal ta stojol smahlib c'ahc'al.

²Ta sti'il sq'uinal Dan, c'alal ta stojol banti ya xloc' ta c'ahc'al c'alal ta stojol smahlib c'ahc'al, ha te jsehp q'uinal yu'un Aser.

³Ta sti'il sq'uinal Aser, c'alal ta stojol banti ya xloc' ta c'ahc'al c'alal ta stojol smahlib c'ahc'al, ha te jsehp q'uinal yu'un Neftalí.

⁴Ta sti'il sq'uinal Neftalí, c'alal ta stojol banti ya xloc' ta c'ahc'al c'alal ta stojol smahlib c'ahc'al, ha te jsehp q'uinal yu'un Manasés.

⁵Ta sti'il sq'uinal Manasés, c'alal ta stojol banti ya xloc' ta c'ahc'al c'alal ta stojol smahlib c'ahc'al, ha te jsehp q'uinal yu'un Efraín.

⁶Ta sti'il sq'uinal Efraín, c'alal ta stojol banti ya xloc' ta c'ahc'al c'alal ta stojol smahlib c'ahc'al, ha te jsehp q'uinal yu'un Rubén.

⁷Ta sti'il sq'uinal Rubén, c'alal ta stojol banti ya xloc' ta c'ahc'al c'alal ta stojol smahlib c'ahc'al, ha te jsehp q'uinal yu'un Judá.

⁸Ta sti'il sq'uinal Judá, c'alal ta stojol banti ya xloc' ta c'ahc'al c'alal ta stojol smahlib c'ahc'al, ha te jsehp q'uinal ta banti yac ap'isic oxpic soc lajunwinic yoxbahc' (25,000) xuhc'ubil[68] sjamalil; te snahtil ha pajal soc te yantic q'uinaletic, c'alal ta stojol banti ya xloc' tal c'ahc'al c'alal ta stojol smahlib c'ahc'al, ta yohlil ay te templo.

⁹Te jsehp q'uinal te yac awaq'uic yu'un Jehová ha oxpic soc lajunwinic yoxbahc' (25,000) xuhc'ubil snahtil soc jpic soc ho'bahc' (10,000) xuhc'ubil[69] sjamalil.

¹⁰Te jsehp ch'ul q'uinal yu'un te sacerdotehetic ha oxpic soc lajunwinic yoxbahc' (25,000) xuhc'ubil ta stojol norte soc jpic soc ho'bahc' (10,000) xuhc'ubil sjamalil ta stojol smahlib c'ahc'al, jpic soc ho'bahc' (10,000) xuhc'ubil ta stojol banti ya xloc' tal c'ahc'al soc oxpic soc lajunwinic yoxbahc' (25,000) xuhc'ubil ta stojol sur. Ta yohlil ay te ch'ul awilal yu'un Jehová.

¹¹Te ch'ultesbil sacerdotehetic te ha sts'umbalic Sadoc te jun yo'tan hilic ta jtojol, te ma ba howiyic te c'alal howiyic te sts'umbal Israel, hich te bin ut'il la spasic te levitahetic,

¹²ha'ic ya yich'ic te jsehp q'uinal te ac'bil ta yohlil te yan q'uinal, ha ch'ultesbil ya xc'oht, slac'oj sba soc te sq'uinal te levitahetique.

¹³Ta sti'il te sq'uinal te sacerdotehetic ay te sq'uinal te levitahetic ha oxpic soc lajunwinic yoxbahc' (25,000) xuhc'ubil sjamalil soc jpic soc ho'bahc' (10,000) xuhc'ubil sjamalil. Spisil te snahtil ha oxpic soc lajunwinic yoxbahc' (25,000) xuhc'ubil soc te sjamalil ha jpic soc ho'bahc' (10,000) xuhc'ubil.

¹⁴Ma ba ya schonic soc ma ba ya sjelic, ma ba ya xc'ax ta stojol te tsahbil q'uinal ini, como ch'ultesbil yu'un te Jehová.

¹⁵Te j'ohlil yoxlajunbahc' (5,000) xuhc'ubil[70] sjamalil te hilem yu'un te oxpic soc lajunwinic yoxbahc' (25,000) xuhc'ubil, ma ba ch'ultesbil stuquel, ya xtuhun yu'un te pueblo banti ya xnahinic soc yu'un aquiltic. Ta yohlil ay te muc'ul pueblo.

¹⁶Hich ay te sp'isol: ta stojol norte ho'winic slahchaybahc' (4,500) xuhc'ubil,[71] ta stojol sur ho'winic slahchaybahc' (4,500) xuhc'ubil, ta stojol banti ya xloc' tal c'ahc'al ho'winic slahchaybahc' (4,500) xuhc'ubil, ta stojol smahlib c'ahc'al ho'winic slahchaybahc' (4,500) xuhc'ubil.

¹⁷Te aquiltic ta sjoyobal te muc'ul pueblo, ta stojol norte lajuneb yoxlajunwinic (250) xuhc'ubil,[72] ta stojol sur lajuneb yoxlajunwinic (250) xuhc'ubil, ta stojol banti ya xloc' tal c'ahc'al lajuneb yoxlajunwinic (250) xuhc'ubil, ta stojol smahlib c'ahc'al lajuneb yoxlajunwinic (250) xuhc'ubil.

¹⁸Te q'uinal te hilem te slac'oj sba soc te ch'ultesbil q'uinal ha jpic soc ho'bahc' (10,000) xuhc'ubil, ta stojol banti ya xloc' tal c'ahc'al, soc jpic soc ho'bahc' (10,000) xuhc'ubil ta stojol smahlib c'ahc'al; ya xtuhun yu'un awal-ts'unubil te ya xtuhun yu'un swe'el te mach'atic ya x'a'tejic ta muc'ul pueblo.

¹⁹Te mach'atic ya x'a'tejic ta muc'ul pueblo, te talemic ta chahpalchahp yu'un Israel, ya me schahpanic te q'uinale.

²⁰Spisil te jsehp q'uinal te parte ac'bil, oxpic soc lajunwinic yoxbahc' (25,000) xuhc'ubil ha te jsehp q'uinal te yac awaq'uic yu'un te ch'ul awilal soc yu'un te sq'uinal te muc'ul pueblo.

²¹Ha yu'un te príncipal ya xc'oht te cha'sehp q'uinal te hilem ta jujujehch te ch'ultesbil q'uinal soc te q'uinal yu'un te muc'ul pueblo: ha te oxpic soc lajunwinic yoxbahc' (25,000) xuhc'ubil ta stojol te jsehp ch'ul q'uinal c'alal ta sti'il te q'uinal ta stojol banti ya xloc' tal c'ahc'al, soc te oxpic soc lajunwinic yoxbahc' (25,000) xuhc'ubil ta stojol yan jehch yu'un te jsehp ch'ul q'uinal c'alal ta sti'il te q'uinal ta stojol smahlib c'ahc'al; ha yu'un te príncipal. Te jsehp ch'ul q'uinal soc te ch'ul awilal ya xhil ta yohlil.

²²Hich te q'uinal yu'un te levitahetic soc yu'un te muc'ul pueblo ya xhil ta yohlil te q'uinal yu'un te príncipe; te jsehp q'uinal yu'un te príncipe ay ta ohlil yu'un te sti'il sq'uinal Judá soc te Benjamín.

²³Te yantic jchap yu'un Israel: te jsehp q'uinal yu'un Benjamín ya xc'oht c'alal ta stojol banti ya xloc' tal c'ahc'al c'alal ta stojol smahlib c'ahc'al.

²⁴Te jsehp q'uinal yu'un Simeón slac'oj sba soc te sq'uinal Benjamín c'alal ta stojol banti ya xloc' tal c'ahc'al c'alal ta stojol smahlib c'ahc'al.

²⁵Te jsehp q'uinal yu'un Isacar slac'oj sba soc te sq'uinal Simeón c'alal ta stojol banti ya xloc' tal c'ahc'al c'alal ta stojol smahlib c'ahc'al.

²⁶Te jsehp q'uinal yu'un Zabulón slac'oj sba soc te sq'uinal Isacar c'alal ta stojol banti ya xloc' tal c'ahc'al c'alal ta stojol smahlib c'ahc'al.

²⁷Te jsehp q'uinal yu'un Gad slac'oj sba soc te sq'uinal Zabulón c'alal ta stojol banti ya xloc' tal c'ahc'al c'alal ta stojol smahlib c'ahc'al.

²⁸Ta sti'il sq'uinal Gad ta stojol sur, ya xhahch ta Tamar ya xc'oht c'alal ta ha'etic yu'un Meriba-cades, ya xc'ax ta Uc'um yu'un Egipto c'alal ta Muc'ul Mar.

²⁹Ha te q'uinal te yac awa'be yich'ic te chahpalchahp yu'un Israel ta scuenta spasel seña ta na'el; ha te bin ya yich'ic, xchi te Jehová, te Ajwalil.

³⁰Ha ini te loq'uibaletic yu'un te muc'ul pueblo: ta stojol norte ho'winic slahchaybahc' (4,500) xuhc'ubil, snahtil.

³¹Te ochibaletic yu'un te muc'ul pueblo ya yich'beyic sbihil te chahpalchahp yu'un Israel. Te oxeb ochibaletic ta stojol norte: ha te ochibal yu'un Rubén, yu'un Judá soc yu'un Leví.

³²Ta stojol banti ya xloc' tal c'ahc'al, te ha ho'winic slahchaybahc' (4,500) xuhc'ubil, ay oxeb ochibaletic: ha te ochibal yu'un José, yu'un Benjamín soc yu'un Dan.

³³Ta stojol sur, te ha ho'winic slahchaybahc' (4,500) xuhc'ubil, ay oxeb ochibaletic: ha te ochibal yu'un Simeón, yu'un Isacar soc yu'un Zabulón.

³⁴Ta stojol smahlib c'ahc'al, te ha ho'winic slahchaybahc' (4,500) xuhc'ubil, ay oxeb ochibaletic: ha te ochibal yu'un Gad, yu'un Aser soc yu'un Neftalí.

³⁵Ta sjoyobal te muc'ul pueblo ha cha'pic soc ho'bahc' (18,000) xuhc'ubil.[73] Te sbihil te muc'ul pueblo ta hich ora bahel, ha Jehová-sama,[74] xchi te Jehová.