Read Tzeltal Ezequiel 6 Bible Online

Ezequiel 6 - Tzeltal bible

Ezequiel 6

¹Tal ta jtojol te sc'op Jehová, hich la yalbon:

²Snich'anat winic, t'ojana bahel asit ta stojol te witsetic yu'un Israel, hala sc'op-jalwanej ta scontrahinel,

³hich xawalbe: ¡Witsetic yu'un Israel, a'iya awa'iyic te sc'op Jehová, te Ajwalile! Te Jehová, te Ajwalil, hich ya yalbe te witsetic, tsehletic, sjuclejetic soc te spamlejtic: Ilawil, ho'on nix ya cac' taluc te espada ta atojolic soc ya jimbeyex te toyol awilaletic awu'unique.

⁴Ya yich' jinel te scajtajib ta chiq'uel mahtanil awu'unic, soc ya yich' wuyel te scajtajib ta chiq'uel pom awu'unic; soc ya cac' te ya xyahlic ta stojol te loc'ombahetic awu'unic te mach'atic awu'unic te ya xlajic ta milele.

⁵Ya ca'be te schamen baq'uetalic te snich'nab Israel ta stojol te loc'ombahetic yu'unic, soc ya jpucbeyex abaquelic ta sjoyobal te scajtajib ta chiq'uel mahtanil awu'unique.

⁶Ta bayuc te ya xnahinex, jochol ya xhilic te pueblohetic soc ya yich'ic lajinel te toyol awilaletic awu'unic, scuenta yu'un jimbil soc jochol ya xhilic te scajtajib ta chiq'uel mahtanil awu'unique. Ya yich'ticlan wuyel soc jinel te loc'ombahetic awu'unic, te loc'ombahetic yu'un te c'ahc'al awu'unic ya yich'ic wuyticlanel soc ya yich'ic lajinel te ya'tel ac'abique.

⁷Ya xlajic ants-winiquetic ta awohlilic; ya me ana'ic te ho'on Jehovahon.

⁸Pero ay mach'atic cuxul ya xhilic cu'un, ay mach'atic awu'unic te ya xcolic ta espada ta yohlil te nacionetic te c'alal yac awich'ic puhquel bahel ta yantic q'uinaletic.

⁹Ha'ex te ya xloq'uex ta ahnel ya me ana'onic ta nacionetic ta banti ya xbahex ta chuquel; como c'ax jwocol ta scaj te ay ta yo'tanic antsiwej te hich la yihquitayonic hilel, soc ta scaj sitic te la st'unic te loc'ombahetic yu'unique. Ha'ic nix ya xq'uexawic ta scaj te bintic chopol la spasic ta scuenta spisil te bintic ilobtic sba yu'unique.

¹⁰Ya me sna'ic te ho'on Jehovahon; ma tojoluc nax te la jcal te ya cac' tal ta stojolic te bin chopol ini, xchi.

¹¹Hich yaloj te Jehová, te Ajwalil: Pac'a ac'ab soc pujilana awoc, hich me xawal: ¡Ay swocol! xchihat yu'un spisil te bintic ilobtic sba yu'un te sna Israel. Como ya xyahlic ta scuenta espada, wi'nal soc jmilawal-chamel.

¹²Te mach'a namal, ay ya xcham ta jmilawal-chamel; te mach'a nopol ay, ya xlaj ta espada; te mach'a cuxul ya xhil, ya xcham ta wi'nal. Hich me ts'acal ya xc'oht te quilimba ta stojolique.

¹³Ya me ana'ic te ho'on Jehovahon, c'alal limilic te schamen baq'uetalic ta yohlil te loc'ombahetic yu'unic, ta sjoyobal te scajtajib ta chiq'uel mahtanil yu'unic, ta spisil te toyol tsehletic, ta spisil te ba witsetic, ta ye'tal spisil te'etic te pimic ya'binal, soc ta ye'tal spisil jihte'etic te bayel sc'abc'ab, ha te banti la schic'beyic pom te loc'ombahetic yu'unique.

¹⁴Ya jach jc'ab ta scontrahinel, soc ta bayuc ya xnahinic ya cac' te c'ax hich jochol soc jimbil ya xc'oht te bin ut'il te jochol taquin q'uinal c'alal ta Diblat. Hich me ya sna'ic a te ho'on Jehovahon, xchi.