Read Tzeltal Ezequiel 7 Bible Online

Ezequiel 7 - Tzeltal bible

Ezequiel 7

¹Tal ta jtojol te sc'op Jehová, hich la yalbon:

²Ha'at, snich'anat winic, puca ta halel ta stojol te sq'uinal Israel te hich yaloj te Jehová, te Ajwalil: ¡Ha slajibal! ¡Talix te slajibal ta stojol te schanxuhcul te q'uinale!

³C'ohtix ta atojol te slajibal, ya jticon tal ta atojol te quilimba, ya jchahpambat ha chican bin apasoj, soc ya ca'bat castigo yu'un spisil te bintic ilobtic sba awu'une.

⁴Ma ba ya jpasbat perdón, ma ba ya jna'batix yo'bolil aba. Ya ca'bat atoj yu'un te bin behil at'unoj, te bin ilobtic sba ay ta awohlil; hich ya me ana'ic te ho'on Jehovahon, xchi.

⁵Hich yaloj te Jehová, te Ajwalil: ¡Ay me wocol, ilawil, ya me xtal wocol!

⁶¡Ya xtal slajibal, ya xtal te slajibale; hahchix scontrahimbelat, ya me xtal!

⁷¡C'ohtix aworahil, ha'at te nahinemat ta q'uinal! ¡C'ohtix yorahil, nopolix te sc'ahc'alel: ha sc'ahc'alel xiwel, ma ha'uc yu'un yutsil q'uinal ta witsiltic!

⁸Yo'tic ta jts'ihn ya jmal cohel te quilimba ta atojol, ya cac' lajuc sc'ahc'al co'tan ta atojol; ya jchahpambat ha chican bin apasoj, soc ya ca'bat castigo yu'un spisil te bintic ilobtic sba awu'une.

⁹Ma ba ya jpasbat perdón, ma ba ya jna'batix yo'bolil aba. Ya ca'bat atoj yu'un te be at'unoj soc te bin ilobtic sba ay ta awohlil; hich yac ana'ic a te ho'on Jehovahon te ya cac' castigo.

¹⁰¡Ya xtal sc'ahc'alel! ¡Ya me xtal! C'ohtix yorahil; nichinix te nahbate'el, yaxubenix te toybahile.

¹¹Hahchemix te uts'inwanej hich te bin ut'il xul yu'un bin chopol. Mayuc mach'a ya xhil yu'unic, ma ha'uc te tsobol yu'unic, ma ha'uc jtuhluc mach'a ay yu'unic, soc mayuc mach'a te ya yoq'uetay.

¹²C'ohtix yorahil, talix te sc'ahc'alele. ¡Ma me xtse'ejin te mach'a ya xmambaj, ma me x'oc' te mach'a ya xchombaj! como te ilimba ay ta stojol spisilic.

¹³Como te mach'a ay bin la schon ma ba ya suhtix tal ta stojol te bin la yich' chonel, aunque cuxul ya xhilic; como te nahalsitil ta stojol spisilic ma ba ya xlaj sc'oblal. Ta scaj smulic, mayuc mach'a ya xhu' ya scoltay scuxlejal.

¹⁴Ya yoq'uesinic te corneta soc ya schahpanic spisil; pero mayuc mach'a ya xloc' bahel ta guerra, como ay ta stojol spisilic te quilimba.

¹⁵Ta sti'il te pueblo ay espada, ta yutil ay jmilawal-chamel soc wi'nal. Te mach'a ay ta aquiltic ya xlajic ta espada, te mach'a ay ta pueblo ya xlajinot ta wi'nal soc jmilawal-chamel.

¹⁶Te mach'atic cuxul ya xhilic hich ya xloq'uic ta ahnel ta witsiltic te bin ut'il stsuhmutetic yu'un te spamlejetic, spisilic ya x'ahcanajic ta scaj te smulique.

¹⁷Ya xlaj yip sc'ab spisil, soc ya xlaj yip spisil sjol yacan hich te bin ut'il ha'.

¹⁸Ya me slapic ch'ixal-pac' soc ya xmucotic yu'un tulan xiwel; ay q'uexlal ta spisil sit yelaw, soc quits'bil spisil stsotsel sjolic.

¹⁹Ya me sch'ojic ta callehetic te plata yu'unic, soc p'ajbil ya xc'oht te oro yu'unique. Te oro o te plata yu'unic ma xhu' ya x'ac'otic ta libre yu'un ta sc'ahc'alel te yilimba Jehová. Ma xc'ax swi'nalic soc ma xnoj sch'uhtic, como ha nix ta scaj te oro te yahlic ta mulil.

²⁰Te st'ujbilal te sch'ahlelic la sc'atp'unic ta toybahil, la spasic a te loc'ombahetic yu'un te bintic ilobtic sbahic yu'unique; ha yu'un ya jc'atp'umbe ta c'a'pal te sch'ahlelique.

²¹Ya cac' ta sc'ab jyanlumetic yu'un ya spojic, ha pojbil biluc ya xc'oht yu'un te mach'atic chopolic ta q'uinal, hich ya sbohlobtesbeyic sc'oblal.

²²Ya jq'uej jsit quelaw ta stojolic, hich ya sbohlobtesic te lugar cu'un te bayel sc'oblal ta co'tan; ya x'ochic j'eleq'uetic tey a, ha ya sbohlobtesic.

²³Pasa jun cadena, como te q'uinal nojel ta mulil scuenta smalel ch'ich', soc te pueblo nojel ta uts'inel.

²⁴Ha yu'un ya cac' taluc te mach'atic c'ax chopol yo'tanic ta nacionetic, ya me yich'beyic te nahetic yu'unique. Hich ya cac' lajuc stoybahil te mach'atic ay yipic, soc ya yich'ic bohlobtesel te ch'ul awilaletic yu'unique.

²⁵¡Ya xtal te jinele! Ya me slehic te lamal q'uinal, pero ma ba ya stahic.

²⁶Ya xtal xc'ax jinel, ya xtal xc'ax te bin ya yich' halel te ma na'biluc teme melele. Ya slehbeyic suhtib te jalwanej, soc namal ya xhil te Ley ta stojol te sacerdote, soc namal ya xhil te j'ac'-o'tanil ta stojol te mamaletique.

²⁷Ya me x'oc' te ajwalil, te jtsobaw ya me slap mel-o'tan, soc ya xnihc sc'abic te ants-winiquetic yu'un te q'uinale. Hich ya jpasbe te bin ut'il ay te be yu'unic, soc hich ya jchahpanic te bin ut'il ya xchahpanwanique. Hich me ya sna'ic a te ho'on Jehovahon, xchi.