Read Tzeltal Ezequiel 8 Bible Online

Ezequiel 8 - Tzeltal bible

Ezequiel 8

¹Ta yo'ebal c'ahc'al yu'un te swaquebal u, ta swaquebal ha'bil, huculon ta jna soc huculic ta jtojol a te mamaletic yu'un Judá, la yac' sc'ab ta jtojol te Jehová, te Ajwalil.

²La jquil te bin pajal soc winic yilel. Ta sch'uyomba cohel hich yilel te bin ut'il c'ahc', ta sch'uyomba mohel hich yilel te bin ut'il sts'anabul te sch'ulet bronce.

³La shach sc'ab, la stsacon ta stsotsel jol; te espíritu la slicon mohel ta ohlil yu'un ch'ulchan bahlumilal, soc ta scuenta nahalsitil yu'un Dios la yic'on bahel ta Jerusalén, ta ochibal te ay ta stojol norte ta amac' ta yutil, ta banti ay te yawil te loc'omba te ya yac' xut'et-o'tanil.

⁴Tey ay a te yutsilal te Dios yu'un Israel, hich te bin ut'il la jquil ta jnahalsit ta spamlej.

⁵Hich la yalbon: Snich'anat winic, toya asit ta stojol norte, xchi. Hich la jach jsit ta stojol norte, tey ta stojol norte, ta yochibal te scajtajib ta chiq'uel mahtanil, la jquil te loc'omba te ya yac' xut'et-o'tanil.

⁶Hich la yalbon: Snich'anat winic, ¿ma bal yacuc awil te bin yac spasbelic, ha te bintic bayel ilobtic sbahic te yac spasbelic te sna Israel, te ya yac' te ya xnamijon bahel ta stojol te ch'ul awilal cu'une? Pero ya to awil yan te c'ax to xan hich ilobtic sbahic a, xchi.

⁷La yic'on bahel ta yochibal te yamaq'uil, la jquil te ay banti hotol te sts'ahcule.

⁸Hich la yalbon: Snich'anat winic, hota te ts'ahque, xchi. Hich la jot te ts'ahque, tey la jta ochibal a.

⁹Hich la yalbon: Ochan, ilawil te bintic ilobtic sba yac spasbelic, xchi.

¹⁰Ha yu'un ochon bahel, la jquil ta bayuc ta ts'ahc bombil ta lop'tayel spisil ta chahp te chambahlametic staslajan ya xbehenic ta lum soc yantic chambahlametic te bohloben sc'oblalic, soc spisil ta chahp te loc'ombahetic yu'un te sna Israel.

¹¹Tey ta stojolic ay lajuneb schanwinic (70) ta jtuhl mamaletic ta sna Israel, soc te Jaazanías snich'an Safán ay ta yohlilic. Jujutuhl stsacoj ta sc'abic schic'ojibal pom, yac ta hahchel mohel sch'ahilel pom.

¹²Hich la yalbon: Snich'anat winic, ¿awiloj bal te bin muquen yac spasbelic te mamaletic ta sna Israel, ta tuhlultuhl bombil ta lop'tayel sloc'ombahic ta stsalul snahic? Yu'un hich ya yalic: Ma ba ya yilotic te Jehová, la yihquitayix te q'uinale, xchi.

¹³Patil hich la yalbon: Ya to awil yantic te c'ax to xan hich ilobtic sbahic a, xchi.

¹⁴La yic'on bahel ta yochibal te sna Jehová, te ay ta stojol norte. Tey la jquil hucajtic antsetic a, yac yoq'uetaybelic te Tamuz.

¹⁵Hich la yalbon: ¿Ya bal awil, snich'anat winic? Ya to awil yantic te c'ax to xan hich ilobtic sbahic a, xchi.

¹⁶La yic'on bahel ta amac' ta yutil te ay ta sna Jehová; tey ta yochibal te templo yu'un Jehová, ta ohlil yu'un te ochibal soc te scajtajib ta chiq'uel mahtanil, ay ho'eb scha'winic (25) ta tuhl winiquetic swalac'patiyejic te templo, te sit yelawic ay ta stojol ta banti ya xloc' tal c'ahc'al, snijanej sbahic, yac sch'uhuntaybelic te c'ahc'ale.

¹⁷Hich la yalbon: ¿La bal awil, snich'anat winic? Ma tic'uc a te yac spasbelic te bintic ilobtic sba te sna Judá. Ya snojesic ta uts'inwanej te q'uinal, bayel ya yac' ilinucon. Ilawil, ya yaq'uic ta sni'ic te jchej ya'binal sc'ab te'.

¹⁸Ha yu'un ya me x'a'tejon soc sc'ahc'al quilimba; ma ba ya jpasbe perdón, ma ba ya jna'be yo'bolil sbahic. Aunque tulan ya x'awonic ta jchiquin, ma ba ya ca'iybe sc'opic, xchi te Jehová.