Read Tzeltal Ezequiel 9 Bible Online

Ezequiel 9 - Tzeltal bible

Ezequiel 9

¹Patil la jca'iy tulan aw, hich la yal: ¡Huliquix te mach'atic ya ya'beyic castigo te pueblo, jujutuhl yich'oj tal ta sc'abic ya'tejibic yu'un jinel! xchi.

²Tal wactuhl winiquetic ta sbehlal te ochibal ta ahc'ol te ay ta stojol norte, jujutuhl yich'oj ta sc'abic ya'tejibic yu'un jinel. Ta yohlilic ay jtuhl winic te slapoj saquil lino-pac', ay a'tejibal yu'un ts'ihbajel ta sch'uyomba. C'alal ochic talel, la stehc'an sbahic ta nopol te scajtajib ta chiq'uel mahtanil pasbil ta bronce.

³Te yutsilal te Dios yu'un Israel tohy mohel ta sba te querubín, tey nix te banti ay, baht ta yochibal te templo. Te Jehová la yic' tal te winic te slapoj lino-pac', te ay a'tejibal yu'un ts'ihbajel ta sch'uyomba,

⁴hich la yalbe: C'axan ta yohlil te pueblo, ha te Jerusalén, a'beya seña ta sti'ba te mach'atic ya x'ahcanajic soc ya x'awonic ta scaj spisil te bintic ilobtic sba te ya yich' pasel tey a, xchi.

⁵La jca'iy te hich la yalbe te yantique: C'axanic ta pueblo, t'unahic bahel, milahic; ma xapasbeyic perdón, ma xana'beyic yo'bolil sbahic.

⁶Milticlanahic mamaletic, queremetic, ach'ixetic, alaletic soc antsetic, pero ma me xawuts'inic te mach'atic yich'oj te señahe. Ya me xhahchex ta ch'ul awilal cu'un, xchi. Ha yu'un nahil hahchic ta banti ay te mamaletic ta stojol te templo.

⁷Patil hich la yalbe: Bahanic, bohlobtesbeyahic sc'oblal te templo, nojesahic ta chamen baq'uet te amaq'uetic, xchi. Hich loq'uic bahel ta smilel te mach'atic ayic ta pueblo.

⁸Te c'alal yacalic ta smilticlanel a, te jtuquel xanix hilon, la jpahcan jba c'alal ta lum soc awonon, hich la jcal: ¡Cajwal, Jehová! ¿ya bal ajin spisil te mach'atic hilemic yu'un Israel, ha te yac amal cohel ta Jerusalén te awilimba? xchihon.

⁹Hich la yalbon: C'ax muc' te schopolil te sna Israel soc Judá; te q'uinal nojel ta smalel ch'ich' soc te pueblo nojel ta bin chopol; como hich yalojic: Te Jehová la yihquitayix hilel te q'uinal, ma ba ya yil, xchihic.

¹⁰Ha yu'un ma ba ya jpasbe perdón, ma ba ya jna'be yo'bolil sbahic, ya cac' c'ohtuc ta sjolic te bintic spasojic, xchi.

¹¹Hich te winic te slapoj lino-pac', te ay a'tejibal yu'un ts'ihbajel ta sch'uyomba, suht talel, hich la yal: La jpasix spisil te bintic la awa'bon jpas, xchi.