Read Tzeltal Daniel 2 Bible Online

Daniel 2 - Tzeltal bible

Daniel 2

¹Ta schebal ha'bil yochel ta ajwalil a te Nabucodonosor la ya'iy wayich; bayel la smel yo'tan soc ma ba tal swayel yu'un.

²Hich te ajwalil la sticonlan ta iq'uel tal te jpas-señahetic, jna'ojeletic, jmonawetic soc te mach'atic ay sp'ijilic, yu'un ya yalbeyic sc'oblal te swayiche. Hich c'oht stehc'an sbahic ta stojol te ajwalile.

³Te ajwalil hich la yalbe: Ay jwayich, jmeloj co'tan yu'un, ya jc'an ya jna'be scuentahil, xchi.

⁴Ha yu'un te mach'atic ay sp'ijilic hich la yalbeyic te ajwalil ta arameo: ¡Ajwalil, te yacuc xcuxajat sbahtel q'uinal! Halbeya te a'batetic awu'un te awayiche, hich ya calbatcotic te bin ya sc'an ya yal, xchihic.

⁵Te ajwalil hich la yalbe te mach'atic ay sp'ijilic: Hich jnopoj: Teme ma ba yac awalbonic te bin a te la jwayichtay soc teme ma ba yac awalbonic te bin ya sc'an ya yal, yac awich'ic sesenel soc busul ya xhil te anahique.

⁶Pero teme yac awalbonic te bin la jwayichtay soc te bin ya sc'an ya yale, ya ca'beyex amahtanic, yac awich'ic c'uxultayel soc ich'el ta muc'. Ha yu'un halbonic te bin la jwayichtay soc te bin ya sc'an ya yal, xchi.

⁷La sjaq'uic xan: Te ajwalil ac'a yalbe te swayich te a'batetic yu'une, hich ya calbatcotic te bin ya sc'an ya yal, xchihic.

⁸La sjac' te ajwalil: Ya jna' ta lec te yac ac'anic te ya xnahtij xan te tiempohe, como yac ana'ic bin jnopoj te ya jpase.

⁹Teme ma ba yac awalbonic te bin la jwayichtay, junax te bin ya xc'oht ta atojolic. Achapojic te yac awa'bonic lotil suhtib soc bintic chopol, yu'un hich ya xc'ax yorahil a. Halbonic te wayichil, hich ya jna' a te ya xhu' awu'unic te yac awalbonic te bin ya sc'an ya yal, xchi.

¹⁰La sjaq'uic te mach'atic ay sp'ijilic: Mayuc jtuhluc ta bahlumilal te ya xhu' ya yal te bin yac sc'ambel te ajwalile. Soc mayuc jtuhluc ajwalil o príncipal te hich ya sc'ambe jtuhluc jpas-señahil, jmonaw o te mach'a ay sp'ijile.

¹¹Como mero wocol te bin ya sc'an te ajwalil, mayuc mach'a ya xhu' ya yalbe te ajwalil, ha nax stuquel te diosetic, pero ma ba nahinemic ta yohlil te winiquetique, xchihic.

¹²Ha yu'un te ajwalil soc sc'ahc'al yo'tan soc yilimba la yal mandar te ya yich'ic milel spisil te mach'atic ay sp'ijilic ta Babilonia.

¹³Puhc bahel te mandar te ya yich'ic milele. La slehic te Daniel soc te smohloltac yu'un ha'ic nix ya yich'ic milel.

¹⁴Te Daniel la yutsil c'opon soc sp'ijil yo'tan te Arioc, te capitán yu'un soldadohetic te ya scanantayic te ajwalil, te loq'uemic bahel ta smilticlanel te p'ijil winiquetic yu'un Babilonia.

¹⁵Hich la yalbe te Arioc te capitán yu'un te ajwalil: ¿Bin scuentahil te tulan mandar la yal te ajwalil? xchi. Hich te Arioc la ya'be sna' te Daniel te bin scuentahile.

¹⁶Hich te Daniel baht ta stojol te ajwalil, la sc'ambe te yacuc x'a'bot jtebuc tiempo yu'un ya yalbe sc'oblal te swayiche.

¹⁷Patil te Daniel baht ta sna, la ya'be sna'ic te smohloltac Ananías, Misael soc te Azarías, bin ut'il ay te c'ope,

¹⁸yu'un yacuc sc'ambeyic c'uxultayel yu'un Dios ta ch'ulchan sc'oblal te bin wocol ta na'el ini, scuenta yu'un te Daniel soc te smohloltac ma ba ya yich'ic milel soc te yantic p'ijil winiquetic yu'un Babilonia.

¹⁹Hich ta ahc'abal a'bot sna' ta nahalsit te Daniel te bin wocol ta na'ele. Ha yu'un te Daniel la yalbe yutsil sc'oblal te Dios ta ch'ulchane,

²⁰hich la yal: Bayeluc me yutsil sc'oblal sbahtel q'uinal te sbihil te Diose, como ha yu'un stuquel te p'ijil-o'tanil soc te yip u'elile.

²¹Ha ya syanijtes te tiempohetic soc te ha'biletic; ya sloq'ues soc ya yotses ajwaliletic, ya ya'be sp'ijil yo'tan te mach'atic ay sp'ijilic, ya ya'be sna'ojibal te mach'atic ay bintic sna'ojique.

²²Ya yac' ta na'el te bin wocol ta na'el soc te bin muquen ay; ya sna' te bin ay ta yihc'al q'uinal, te sacal q'uinal nahinem ta stojol.

²³Ha'at Diosat yu'un te jme'jtat, ya calbat wocol soc ya calbat yutsil ac'oblal, como la awa'bon sp'ijil co'tan soc quip, yo'tic la awa'bonix jna' te bin la jc'ambatcotic, la awa'botcotic jna'cotic te swayich te ajwalile, xchi.

²⁴Hich te Daniel baht ta stojol te Arioc, te ha pasbil ta mandar yu'un te ajwalil te ya smilticlan te p'ijil winiquetic yu'un Babilonia, hich la yalbe: Ma xamilticlan te p'ijil winiquetic yu'un Babilonia. Ic'awon bahel ta stojol te ajwalil, ya calbe te bin scuentahil te swayiche, xchi.

²⁵Ha yu'un te Arioc ora la yic' bahel ta stojol ajwalil te Daniel, hich la yalbe: La jta ta yohlil te judiohetic te ic'bilic loq'uel tal ta slumalic te ya xhu' ya yalbe ya'iy te ajwalil te bin scuentahil te swayiche, xchi.

²⁶Te ajwalil la yalbe te Daniel, te Beltsasar yan sbihile: ¿Ya bal xhu' awu'un yac awalbon te bin la jwayichtay, soc te bin sc'oblale? xchi.

²⁷La sjac' te Daniel: Mayuc ni jtuhluc p'ijil winic o te mach'a ay bin ya sna' ta scuenta te c'ahc'al, u, eq'uetic, mayuc jpas-senahil o jna'ojel te ya xhu' ya ya'be sna' te ajwalil te bin wocol ta na'ele.

²⁸Pero ay jtuhl Dios ta ch'ulchan te ya yac' ta na'el te bintic wocol ta na'el, ha la ya'be sna' te ajwalil Nabucodonosor te bin ya xc'oht ta pasel ta patil. Te awayich soc te anahalsit te la awil te c'alal ayat ta awayib, hich ay:

²⁹Te c'alal ayat ta awayib, ajwalil, tal ta awo'tan sna'el te bintic ya xc'oht ta pasel ta patil. Te mach'a ya yac' ta na'el te bin wocol ta na'el, la ya'bat ana' te bin ya xc'oht ta pasele.

³⁰Ho'on a'boton jna' te bin wocol ta na'el, ma yu'unuc te c'ax hich ay sp'ijil co'tan a te bin ut'il te yantic winiquetic, ha nax yu'un te hich ya x'a'bot te ajwalil te ya sna'be sc'oblal soc yu'un yac ana'be scuentahil te bintic anopoj ta awo'tane.

³¹Ta awayich, ajwalil, la awil ay muc'ul loc'omba; mero muc' te loc'omba soc mero xlipet; teq'uel ta atojol soc xiweltic sba ta ilel.

³²Te sjol te loc'omba, pasbil ta lequil oro; te stahn soc te sc'ab pasbil ta plata; te sch'uht soc te ya' pasbil ta bronce;

³³te yacan pasbil ta hierro; te yoc pasbil ta hierro soc chic'bil lum.

³⁴Te c'alal yac awilbel a, t'ohch talel jun ton, mayuc mach'a t'ohchot tal yu'un, ha hul smajbe yoc te loc'omba te pasbil ta hierro soc chic'bil lum, la swuyticlan.

³⁵La yich'ic wuyticlanel te hierro, chic'bil lum, bronce, plata soc te oro, hich c'oht te bin ut'il suhlil trigo ta swuyojibal ta yorahil snahtil c'ahc'al, jc'axel lichot bahel ta ic', mayuc bin chican hilel. Pero te ton te la smaj te loc'omba c'atp'uj ta muc'ul wits te la snojes spisil te bahlumilale.

³⁶Ha te wayichil ini. Soc ya calbecotic sc'oblal te swayich te ajwalile.

³⁷Ha'at, ajwalil, ha'at ajwalilat yu'un ajwaliletic; como te Dios ta ch'ulchan la yotsesat ta ajwalil, la ya'bat awu'el, awip soc awutsilal.

³⁸Bayuc ya xnahinic ants-winiquetic, chambahlametic ta q'uinal soc mutetic te ya xwihlic ta toyol, la ya'bat ta ac'ab, la ya'bat acuentahin spisil. Ha'at te jolalat te pasbil ta oro.

³⁹Ta patil awu'un ya xchicnaj yan jchahp ajwaliletic te peq'uelix awu'un; ta patil ya xchicnaj yoxchahpal ajwaliletic te pajalic soc bronce te ya scuentahin spisil te bahlumilale.

⁴⁰Te schanchahpal ajwaliletic pajal yipic soc hierro. Hich te bin ut'il te hierro ya sjinticlan soc ya swuyticlan spisil, hich ya sjinticlan soc ya swuyticlan spisil.

⁴¹Te la awil te yoc soc te yalatac yoc te pasbil ta chic'bil lum yu'un jpac'ojom soc ta hierro, ha jchahp ban c'alal scuentahinej ajwalil te sjatoj sbahic; pero yich'beyej jtebuc yip te hierro, hich te bin ut'il la awil te capal ta hierro soc ta chic'bil lum.

⁴²Hich te bin ut'il te yalatac yoc pasbilic ta hierro soc ta chic'bil lum, ha nix hich te jchahp ban c'alal scuentahinej te ajwalil ay banti ay yip soc ay banti mayuc yip.

⁴³Hich te bin ut'il la awil te hierro capal ta chic'bil lum, hich ya scap sbahic ta scuenta nuhpunel, pero ma ba junax ya xc'ohtic, como te hierro ma xhu' ya scap sba soc te chic'bil lume.

⁴⁴Te yorahil te ajwaliletic ini te Dios ta ch'ulchan ya me shach jchahp ban c'alal ya scuentahin jtuhl ajwalil te mayuc bin ora ya xlaj, soc ma ba ya x'ac'ot hilel ta sc'ab yan nación; ha ya swuyticlan soc ya slajinlan spisil te jchahp ban c'alal scuentahinejic te ajwaliletic ini, pero sbahtel q'uinal ya xhil stuquel,

⁴⁵hich te bin ut'il la awil te t'ohch talel ton ta wits, te mayuc mach'a t'ohchot yu'un, te la swuyticlan te hierro, bronce, chic'bil lum, plata soc te oro. Te muc'ul Dios la ya'be yil te ajwalil te bin ya xc'oht ta pasel ta patil. Smelelil te wayichil soc smelelil te sc'oblale, xchi.

⁴⁶Hich te ajwalil Nabucodonosor la snijan cohel sjol c'alal ta lum ta stojol Daniel, la yich' ta muc', soc la yal mandar te ya x'a'bot mahtaniletic soc pom.

⁴⁷Te ajwalil hich la yalbe te Daniel: Melel te Dios awu'unic ha Dios yu'un yantic diosetic, ha Ajwalil yu'un ajwaliletic soc te mach'a ya yac' ta na'el bintic wocol ta na'el, como hu' awu'un te la awac' ta na'el te bintic wocol ta na'el ini, xchi.

⁴⁸Te ajwalil la stohytesbe ya'tel te Daniel, la ya'be bayel mahtaniletic, la ya'be ya'tel ta gobernador yu'un spisil te jsehp q'uinal Babilonia soc jtsobaw yu'un spisil te p'ijil winiquetic yu'un Babilonia.

⁴⁹Te Daniel la sc'ambe te ajwalil te yacuc ya'be scuentahinic te a'teliletic ay ta pasel ta jsehp q'uinal Babilonia te Sadrac, Mesac, soc te Abed-nego. Te Daniel hil ta a'tel ta banti ay ta a'tel te ajwalile.