Read Tzeltal Daniel 3 Bible Online

Daniel 3 - Tzeltal bible

Daniel 3

¹Te ajwalil Nabucodonosor la pas jun muc'ul loc'omba ta oro, oxwinic (60) xuhc'ubil[1] stoyolil soc waqueb xuhc'ubil[2] sjamalil. La stehc'an ta spamlej yu'un Dura, ta jsehp q'uinal yu'un Babilonia.

²Te ajwalil Nabucodonosor la sticonlan ta iq'uel tal te schebal ajwaliletic, mach'atic toyol ya'telic, gobernadoretic, j'ac'-o'taniletic, tesorerohetic, juecetic, soc spisil mach'atic yich'oj ya'telic ta jujusehp q'uinal, yu'un ya xtalic ta q'uin yu'un te loc'omba te la stehc'an te ajwalil Nabucodonosor.

³Hich la stsob sbahic te schebal ajwaliletic, mach'atic toyol ya'telic, gobernadoretic, j'ac'-o'taniletic, tesorerohetic, juecetic, soc spisil mach'atic yich'oj ya'telic ta jujusehp q'uinal yu'un te q'uin yu'un te loc'omba te la stehc'an te ajwalil Nabucodonosor; la stehc'an sbahic ta stojol.

⁴Te mach'a ay ta scuenta yalel, hich la yal ta aw: Pueblohetic, nacionetic soc spisil ta chahp c'opiletic, hich ay te mandar ta atojolic:

⁵te c'alal yac awa'iyic te sc'op te corneta, flauta, cítara, lira, salterio, gaita, soc spisil te a'tejibaletic yu'un música, ya me aquejan abahic ta stojol soc ya me ach'uhuntayic te loc'omba pasbil ta oro te la stehc'an te ajwalil Nabucodonosor.

⁶Te mach'atic ma ba ya squejan sbahic soc ya sch'uhuntayic, ora ya yich'ic ch'ojel ochel ta horno yu'un c'ahc' te yac ta tihlel, xchi.

⁷Ha yu'un te c'alal la ya'iyic te sc'op te corneta, flauta, cítara, lira, salterio, gaita, soc spisil te a'tejibaletic yu'un música, spisil te pueblohetic, nacionetic soc spisil ta chahp c'opiletic la squejan sbahic soc la sch'uhuntayic te loc'omba pasbil ta oro te tehc'ambil yu'un te ajwalil Nabucodonosor.

⁸Ta hich ora ay caldeo-winiquetic te tal slehbeyic smul te judiohetique.

⁹Hich la yalbeyic te ajwalil Nabucodonosor: ¡Sbahteluc q'uinal cuxulat, ajwalil!

¹⁰Ha'at, ajwalil, awaloj mandar te spisil ants-winiquetic ya me squejan sbahic soc ya me sch'uhuntayic te loc'omba pasbil ta oro te c'alal ya xchicnaj sc'op te corneta, flauta, cítara, lira, salterio, gaita, soc spisil te a'tejibaletic yu'un música,

¹¹soc te mach'a ma ba ya squejan sbahic soc ma ba ya sch'uhuntayic ya me yich' ch'ojel ochel ta horno banti yac ta tihlel c'ahc'.

¹²Ay judio-winiquetic te la awa'be ya'telic ta jsehp q'uinal yu'un Babilonia, ha te Sadrac, Mesac soc Abed-nego; te winiquetic ini ma xyich'at ta cuenta, ajwalil, ma ba ya sch'uhuntayic te diosetic awu'un soc ma ba ya sch'uhuntayic te loc'omba pasbil ta oro te atehc'anej.

¹³Ha yu'un te Nabucodonosor soc yilimba soc sc'ahc'al yo'tan la yal te ya x'ic'bot tal te Sadrac, Mesac soc Abed-nego. Ha yu'un ic'otic tal ta stojol ta ora.

¹⁴Te Nabuconosor hich la yalbeyic: ¿Melel bal, Sadrac, Mesac soc Abed-nego, te ma ba yac awich'ic ta muc' te diosetic cu'un, te ma ba yac ach'uhuntayic te loc'omba pasbil ta oro te jtehc'anej?

¹⁵Yo'tic, teme yac awa'iybeyic sc'op te corneta, flauta, cítara, lira, salterio, gaita, soc spisil te a'tejibaletic yu'un música, ¿ya bal aquejan abahic soc ya bal ach'uhuntayic te loc'omba te jpasoje? Como teme ma ba yac ach'uhuntayique, ora nax yac awich'ic ch'ojel ochel ta horno banti yac ta tihlel c'ahc'. ¿Mach'a diosil ya xhu' ya scoltayex loq'uel ta jc'ab? xchi.

¹⁶Te Sadrac, Mesac soc Abed-nego hich la sjac'beyic sc'op te ajwalil Nabucodonosor: Mayuc sc'oblal te ya jsuhtbatcotic suhtib te c'op ini.

¹⁷Te Dios cu'uncotic, te cac'oj jbahcotic ta a'batinel yu'une, ya xhu' ya scoltayotcotic loq'uel ta horno banti yac ta tihlel c'ahc', soc ya xhu' ya scoltayotcotic loq'uel ta ac'ab, ajwalil.

¹⁸Teme ma'uque, na'a me, ajwalil, te ma ba ya cac' jbahcotic ta a'batinel yu'un te diosetic awu'un soc ma ba ya jch'uhuntaycotic te loc'omba atehc'anej, xchihic.

¹⁹Hich te Nabucodonosor bayel ilin, yanij sit yelaw ta stojol te Sadrac, Mesac soc Abed-nego, la yal mandar te ya yich' xan q'uixnayel huqueb buelta te sc'ahc'al te horno te c'ahyemic ta spasele.

²⁰Soc la yalbe mandar te soldadohetic yu'un te bayel yipic te ya schuquic te Sadrac, Mesac soc Abed-nego yu'un ya sch'ojic ochel ta horno banti yac ta tihlel te c'ahq'ue.

²¹Hich te winiquetic ini la yich'ic chuquel soc smuc'ul-c'u'ic, stepic, spohtsil sjolic soc sc'u'ic, la yich'ic ch'ojel ochel ta horno banti yac ta tihlel te c'ahq'ue.

²²Te bin ut'il ora la sc'an pasel te mandar yu'un te ajwalil soc te c'ax c'ahc'ubenix te horno, milotic ta yat c'ahc' te mach'atic la schuquic te Sadrac, Mesac soc Abed-nego.

²³Te oxtuhl winiquetic ini, ha te Sadrac, Mesac soc Abed-nego, chuculic a yahlic cohel ta yohlil te horno banti yac ta tihlel c'ahc'.

²⁴Te Nabucodonosor xcham yo'tan, ora la stehc'an sba soc hich la yalbe te j'ac'-o'taniletic yu'un: ¿Ma bal oxtuhluc winiquetic te chucul ch'ojotic ochel ta c'ahc'? xchi. Melel, ajwalil, xchihic.

²⁵Pero ya quil chantuhl winiquetic te colemic, te ayic ta behel ta yohlil te c'ahc', pero mayuc bin ya xpasbotic yu'un; soc te schantuhlul hich yilel te bin ut'il snich'an te diosetic, xchi te ajwalil.

²⁶Hich te Nabucodonosor nopoj bahel ta sti'il te horno banti yac ta tihlel c'ahc', hich la yawtay: Sadrac, Mesac, Abed-nego, a'batex yu'un te Dios te mero toyol ay, la'ic, loc'anic talel, xchi. Hich te Sadrac, Mesac soc Abed-nego loq'uic talel ta yohlil te c'ahc'.

²⁷Te schebal ajwaliletic, te gobernadoretic, capitanetic soc te j'ac'-o'taniletic la stsob sbahic tal ta yilel te winiquetic; la yilic te mayuc bin pasbot yu'un te c'ahc' te sbaq'uetalic, jxuht' ma ba c'ahc' te stsotsel sjolic, mayuc bin pasbot te sc'u' spaq'uic, ni ma chicanuc yic' te ch'ahile.

²⁸Hich la yal te Nabucodonosor: Bayel me yutsil te Dios yu'un Sadrac, Mesac soc Abed-nego, te la sticon tal ch'ul a'bat yu'un ta scoltayel te a'batetic yu'un te jun yo'tanic ta stojole. Ma ba la spasic bin la yal ta mandar te ajwalil, manchuc ya xlajic, ma ba ya yac' sbahic ta a'batinel ta stojol yan diosetic soc ma ba ya sch'uhuntayic, ha nax stuquel te Dios yu'unique.

²⁹Ha yu'un ya cal ta mandar te biluc pueblohil, nacionil o c'opil te ya sbohlc'optay te Dios yu'un Sadrac, Mesac soc Abed-nego ac'a yich'ic butsticlanel soc ac'a yich' busanel ta jinel te sna, como mayuc yan dios te hich ya xhu' ya xcoltaywan, xchi.

³⁰Hich te ajwalil la stoybe ya'telic te Sadrac, Mesac soc Abed-nego ta jsehp q'uinal yu'un Babilonia.