Read Tzeltal Daniel 4 Bible Online

Daniel 4 - Tzeltal bible

Daniel 4

¹Ho'on, ajwalil Nabucodonosor, ta stojol spisil te pueblohetic, nacionetic soc c'opiletic te nahinemic ta spisil te q'uinal: Ayuc me bayel lamal q'uinal yac awa'iyic.

²Ya jc'an ya calbeyex sc'oblal te señahiletic soc jchahp a'teliletic la spasbon te Dios te mero toyol ay.

³¡C'ax muc' te señahiletic yu'un soc c'ax bayel yip te jchahp a'teliletic yu'une! Sbahtel q'uinal ay ta ajwalil; te cuentahinel yu'un stalel ay ta cajalcaj ts'umbalil.

⁴Ho'on, Nabucodonosor, jun co'tan ayon ta jna soc lec co'tan yu'un te bayel bintic ay cu'une.

⁵La jca'iy wayich te la ya'bon xiwel. C'alal ayon ta jwayib a la ya'bon xiwel te bintic tal ta jol soc te nahalsitiletic.

⁶Ha yu'un la jcal ta mandar te ya xtalic ta jtojol spisil te p'ijil winiquetic yu'un Babilonia scuenta yu'un ya yalbonic sc'oblal te jwayiche.

⁷Talic te jpas-señahetic, jmonawetic, caldeohetic soc jna'ojeletic, la jcalbe ya'iyic te jwayich, pero ma ba hu' yu'unic te ya yalbonic te sc'oblale.

⁸Ta slajibal tal ta jtojol te Daniel, te Beltsasar yan sbihil, te hich sbihil te dios cu'une, ay ta yo'tan te espíritu yu'un te ch'ul diosetic. La jcalbe ya'iy te jwayich, hich la jcal:

⁹Beltsasar, jtsobawat yu'un te jpas-señahetic, jna'oj te ay ta awo'tan te espíritu yu'un te ch'ul diosetic soc te mayuc bintic wocol ta na'el te ma ba yac ana'e. Halbon ca'iy te nahalsitil la jquil ta jwayich soc te sc'oblale.

¹⁰Hich ay te nahalsitil la jca'iy te c'alal ayon ta jwayib: La jquil ta yohlil te q'uinal jtehc' te' te mero toyol.

¹¹Te te' muc'ub bahel soc tulan c'oht, te sni'il c'oht c'alal ta ch'ulchan, chican ta ilel ta spisil te q'uinale.

¹²Mero t'ujbil te ya'binal socbayel te sit, tic' ya sta swe'elic ta spisilic a. Te ha'mal chambahlametic la stahic yaxinal ta ye'tal, ta sc'abc'ab la spas spechechic te mutetic, soc spisil te bintic cuxajtic tey la sta swe'elic a.

¹³La jquil ta nahalsitil, te c'alal ayon ta jwayib a, ay ch'ul j'il-q'uinal te yac ta cohel tal ta ch'ulchan.

¹⁴Hich tulan la yal: Ts'etahic te te' soc set'beyahic te sc'abc'ab, jixbeyahic te ya'binal soc pucbeyahic te site. Ac'a ahnuquic bahel te chambahlametic te ayic ta ye'tal, soc te mutetic ayic ta sc'abc'ab.

¹⁵Pero ihquitaybeyahic ta lum te schumante'el soc te slohp', chucbil ta hierro soc ta bronce ta yohlil te ha'maltic yu'un te q'uinale. Ac'a yahluc ts'ujul yu'un ch'ulchan ta sba, soc ac'a sjoquin te chambahlametic ta ha'mal ta q'uinal.

¹⁶Ac'a yich' jeltaybeyel yo'tan, ac'a yich' a'beyel yo'tan chambahlam; ac'a c'axuc huqueb ha'bil.

¹⁷Te castigo ha smandar te j'il-q'uinaletic, te mach'atic ch'uhltesbilic la yalic te bin chapale, scuenta yu'un te mach'atic cuxajtic ya me sna'ic te Dios te mero toyol ay scuentahinej te ban c'alal scuentahinej te winiquetique, ya ya'be te mach'a ya sc'an ya ya'be, ya yotses ta jcuentahinwanej te mach'a mero peq'uel ay.

¹⁸Ho'on, te ajwalil Nabucodonosor, la jquil te wayich ini. Ha'at, Beltsasar, halbon ca'iy te sc'oblale, como mayuc jtuhluc te p'ijil winiquetic ta ban c'alal jcuentahinej te ya xhu' yu'un sna'beyel sc'oblal. Pero te ha'at ya xhu' awu'un como nahinem ta awo'tan te espíritu yu'un te ch'ul diosetic, xchihon.

¹⁹Hich te Daniel, te Beltsasar yan sbihil, xch'ayet yo'tan, a'bot xiwel yu'un te bin la snope. Ha yu'un la yal te ajwalil: Beltsasar, ma me xiwat yu'un te wayichil o te sc'oblale, xchihon. La sjac' te Beltsasar: Ajwalil cu'un, te ha'uc yu'un acontratac te wayich, soc te ha'uc ya xc'oht te sc'oblal ta stojol te mach'atic ya scontrahinate.

²⁰Te te' te la awil, te muc' c'oht soc te ay yip, te c'oht c'alal ta ch'ulchan te sni'il, te chican ta ilel ta spisil q'uinal,

²¹te t'ujbil ya'binal soc te bayel sit, te tic' ya sta swe'elic tey a spisilic, te banti nahinemic te ha'mal chambahlametic ta ye'tal soc te ya spas spechechic mutetic ta sc'abc'abe,

²²ha'at nix, ajwalil, te muc'ubat soc te la awich' awip. Te amuc'ul c'ohem c'alal ta ch'ulchan, soc te cuentahinel awu'un c'ohem c'alal ta sti'il te q'uinale.

²³La awil, ajwalil, te ay ch'ul j'il-q'uinal te co tal ta ch'ulchan soc hich la yal: Ts'etahic te te' soc lajinahic; pero ihquitaybeyahic hilel ta lum te schumante'el soc te slohp', chucbil ta hierro soc ta bronce ta yohlil te ha'maltic; ac'a c'ohtuc sts'ujulil ch'ulchan ta sba, soc ac'a sjoquin ha'mal chambahlametic ha to c'alal ya xc'ax huqueb ha'bil, xchi.

²⁴Hich ay te sc'oblale, ajwalil, soc te bin yaloj ta mandar te Mach'a mero toyol te c'ohem ta stojol te ajwalil cu'une:

²⁵Ya me awich' loq'uesel ta stojol te ants-winiquetic, ya xnahinat ta yohlil te ha'mal chambahlametic; ha'mal yac awe' hich te bin ut'il j'a'tel-wacaxetic, soc ya me yahts'esbat abaq'uetal te sts'ujulil ch'ulchan. Ya xc'ax huqueb ha'bil ha to c'alal yac ana' te Mach'a mero toyol ay ha toyol xan ya'tel ta stojol ban c'alal scuentahinej winiquetic, soc ya ya'be ya'tel ta cuentahinwanej te mach'a ya sc'an ya ya'be.

²⁶Te mandar te ya yich' ihquitayel hilel ta lum te schumante'el soc slohp' te te', ha ya yac' ta na'el te ya to xcha'ochat xan ta ajwalil te c'alal yac ana' te ha ya xcuentahinwan te ch'ulchane.

²⁷Ha yu'un, ajwalil, ich'a ta cuenta te bin ya calbat, toja amul ta scuenta spasel te bin toj, soc toja te bin chopol ta scuenta te yac ac'uxultay te mach'atic ayic ta uts'inel, hich wan ya xnahtij te lamal q'uinal yac awa'iy, xchi.

²⁸Ta spisil ini c'oht ta stojol te ajwalil Nabucodonosor:

²⁹C'alal c'ax lahchayeb (12) u, te ajwalil yac ta behel ta sba te sna ajwalil ta Babilonia,

³⁰hich la yal: ¿Ma bal ha'uc ini te muc'ul Babilonia te la jpas ta scuenta bayel quip banti ya xnahin ajwalil, soc scuenta yich'el ta muc' te cutsilale? xchi.

³¹Yac to ta c'op a te ajwalil, chicnaj c'op ta ch'ulchan te hich la yal: Hich ya yalbat ac'oblal, ajwalil Nabucodonosor: La awich'ix loq'uesel ta awa'tel ta ajwalil.

³²Yac awich' loq'uesel ta yohlil te ants-winiquetic, yac ajoquin ta nahinel ha'mal chambahlametic, yac awe' ha'mal hich te bin ut'il wacax. Ya xc'ax huqueb ha'bil ha to c'alal yac ana' te Mach'a mero toyol ay ha toyol xan ya'tel ta stojol ban c'alal scuentahinej ants-winiquetic, soc ya ya'be ya'tel ta cuentahinwanej te mach'a ya sc'an ya ya'be, xchi.

³³Ha nix ta yorahil a c'oht ta pasel te bin halbot sc'oblal te Nabucodonosor. La yich' loq'uesel bahel ta stojol te ants-winiquetic, la swe' ha'mal hich te bin ut'il wacaxetic, t'ux sbaq'uetal yu'un te sts'ujulil ch'ulchan, ha to c'alal nahtub te stsotsel sjol hich te bin ut'il sc'uc'umal jxic, soc te yehch'ac hich c'oht te bin ut'il yehch'ac mutetic.

³⁴C'alal ts'acay te yorahil, ho'on Nabucodonosor, la jquil mohel ta ch'ulchan, la jna' xan q'uinal. La jcalbe wocol te Mach'a mero toyol ay, la jcalbe yutsil sc'oblal soc la jquich' ta muc' te Mach'a cuxul scuenta sbahtel q'uinal, hich la jcal: Sbahtel q'uinal ay te cuentahinel yu'un, ay ta ajwalinel ta cajalcaj ts'umbalil.

³⁵Te mach'atic nahinemic ta bahlumilal hich c'ohemic te mayuc sc'oblalic ta stojol; ha ya spas te bin ya sc'an yo'tan ta stojol tsobolic ta ch'ulchan soc te mach'atic nahinemic ta bahlumilal. Mayuc mach'a ya xhu' ya scombe sc'ab o te hich ya yalbe: ¿Bin yac apas? te xchihe.

³⁶Ha nix yorahil a te la jna' xan q'uinal, te suht ta jtojol te smuc'ul yutsil te bin ut'il ajwalilon, te quich'el ta muc' soc smuc'ul jc'oblal. Tal slehonic te gobernadorehetic soc te j'ac'-o'taniletic cu'un; cha'ochon xan ta ajwalil soc c'ax hich to xan muc'ub ca'tel a te bin ut'il ta nahil to.

³⁷Yo'tic, ho'on Nabucodonosor, ya calbe wocol, ya jtoybe sc'oblal soc ya calbe yutsil sc'oblal te Muc'ul Ajwalil ta ch'ulchan, como smelelil spisil bin ya spas soc toj te behetic yu'une; ya xhu' ya spehc'an te mach'atic toyol yac'oj sbahic, xchi.