Read Tzeltal Daniel 6 Bible Online

Daniel 6 - Tzeltal bible

Daniel 6

¹Lec la ya'iy te Darío te ya ya'be ya'telic wacwinic (120) ta tuhl schebal ajwaliletic yu'un ya scuentahinic ta spisil ban c'alal scuentahinej te ajwalile.

²La yac' oxtuhl jtsobaw yu'unic, te jtuhle ha te Daniel; te schebal ajwaliletic ya x'ilbot ya'telic yu'un te oxtuhlic scuenta yu'un ma ba ya sta swocol a te ajwalil.

³Te Daniel lec xan ya'tel te bin ut'il te schebal ajwaliletic soc te gobernadoretic como yich'oj espíritu te c'ax lec xan a, hich te ajwalil la snop te ya ya'be scuentahin spisil ban c'alal scuentahinej.

⁴Te gobernadoretic soc te schebal ajwaliletic la slehic bin ut'il ya slehbeyic smul ta scuenta ya'tel ta stojol te ajwalil; pero ma ba hu' yu'unic stahbeyel smul o falta yu'un, como jun yo'tan, hich mayuc bin chopol la stahic o te ma ts'acaluc la spas te ya'tele.

⁵Ha yu'un hich la yalic: Ma ba ya jtahtic bin ut'il ya jlehbetic smul te Daniel, ha nax teme ay bin ya jtahbetic smul ta scuenta te ley yu'un te Dios yu'une, xchihic.

⁶Ha yu'un te gobernadoretic soc te schebal ajwaliletic la stsob sbahic ta stojol te ajwalil, hich la yalbeyic: ¡Sbahtel q'uinal ac'a cuxajuc te ajwalil Darío!

⁷Spisil te gobernadoretic yu'un te ban c'alal jcuentahinejtic, te j'il-a'teliletic, schebal ajwaliletic, príncipaletic soc capitanetic la schap sc'opic te ay bin ya yal ta mandar te ajwalil soc ya yac' te ya xc'oht ta pasel, ha te mach'ayuc a te ay bin ya sc'ambe jtuhl dios o jtuhl winic ta lajuneb scha'winic (30) c'ahc'al, te ma ba atuquel nax ya sc'ambat, ya yich' ch'ojel ochel ta sch'en chojetic.

⁸Yo'tic, ajwalil, pasa ta mandar soc pasa firmar scuenta yu'un ma xhu' ya yich' yanijtesel, hich te bin ut'il ay te ley yu'un Media soc Persia, te ma xhu' ta lajimbeyel sc'oblal, xchihic.

⁹Ha yu'un, te ajwalil Darío la yac' sfirma ta mandar.

¹⁰Te c'alal la ya'iy te Daniel te yich'oj firma te mandare, baht ta sna, la sjam te ventanahetic ta banti ya xway, te ayic ta stojol bahel te Jerusalén, la squejan sba oxeb buelta jujun c'ahc'al, la sc'opon Dios soc la yalbe wocol, hich te bin ut'il ya spasulan spisil ora.

¹¹Hich te winiquetic la stsob sbahic, la stahic te Daniel yac ta sc'oponel Dios soc yac ta yalbeyel wocol ta stojol te Dios yu'une.

¹²Hich bahtic ta stojol te ajwalil, la yalbeyic sc'oblal te mandar yu'un te ajwalil, hich la yalbeyic: ¿Ma bal lajuc awal mandar te mach'ayuc a te ay bin ya sc'ambe jtuhl dios o jtuhl winic ta lajuneb scha'winic (30) c'ahc'al, te ma ba atuquel nax ya sc'ambat, ya yich' ch'ojel ochel ta sch'en chojetic? xchihic. La sjac' te ajwalil: Melel hich ay, hich te bin ut'il ay te ley yu'un Media soc Persia, te ma xhu' ta lajimbeyel sc'oblal, xchi.

¹³Hich la sjac'beyic te ajwalil: Te Daniel, te jtuhl te ic'ot loq'uel tal ta chuquel ta Judá, ma ba ya yich'at ta cuenta, ajwalil, o te mandaril te la awac' afirma a, oxeb buelta jujun c'ahc'al ya sc'opon te Dios yu'une, xchihic.

¹⁴C'alal hich la ya'iy te ajwalil, bayel la smel yo'tan yu'un, la snop te ya scoltay te Daniel. Ha to c'alal mahl c'ahc'al la snop bin ya yut ya scoltay.

¹⁵Pero te winiquetic talic ta stojol te ajwalil, hich la yalbeyic: Ana'oj, ajwalil, te bin ut'il ay te ley yu'un Media soc Persia, te mayuc halbil mandaril o ley te ya spas te ajwalil te ya xhu' ta lajimbeyel sc'oblal, xchihic.

¹⁶Ha yu'un te ajwalil la yal mandar te ya sticonic ta iq'uel te Daniel, hich la sch'ojic ochel ta sch'en te chojetique. Te ajwalil hich la yalbe te Daniel: Te Dios awu'un, te spisil ora awac'oj aba ta a'batinel yu'une, ac'a scoltayat, xchi.

¹⁷La yich'ic tal ton, la ya'beyic ta sti'il te ch'ene. Te ajwalil la ya'be sellohil ta sch'ocow soc ta sch'ocow te príncipaletic scuenta yu'un ma ba ya xyanij te bin chapal sc'oblal te Daniel.

¹⁸Patil baht ta sna te ajwalil, ma ba we' a baht ta swayib; ma ba la yich'ic tal a'tejibaletic yu'un música ta stojol, soc ma ba och swayel.

¹⁹Te ajwalil hahch ta buen sab, ora baht ta sch'en chojetic.

²⁰Te c'alal nopoj ta ch'en, smeloj yo'tan a la yawtay te Daniel, hich la yalbe: Daniel, a'batat yu'un te cuxul Dios, te Dios awu'un, te spisil ora awac'oj aba ta a'batinel yu'une, ¿hu' bal yu'un te la scoltayat ta ye te chojetic? xchi.

²¹La sjac' te Daniel: ¡Sbahteluc q'uinal cuxulat, ajwalil!

²²Te Dios cu'un la sticon tal ch'ul a'bat yu'un ya smacbe ye te chojetic scuenta yu'un ma ba ya yuts'inonic, como mayuc jmul ta stojol, soc mayuc bin chopol jpasoj ta atojol, ajwalil, xchi.

²³Te ajwalil buen tse'el yo'tan yu'un, la yac' ta loq'uesel tal ta ch'en te Daniel. Hich la sloq'uesic ta ch'en te Daniel, mayuc banti ehchenajem, como ha smuc'ulinej yo'tan te Dios yu'une.

²⁴Patil te ajwalil la yal mandar ta iq'uel tal te winiquetic te la slehbeyic smul te Daniel, la yich'ic ch'ojel ochel ta sch'en chojetic soc yal-snich'nabic soc yihnamic. Ma to ba stahojic cohel a tsacotic yu'un te chojetic, la swuyticlambeyic spisil sbaquelic.

²⁵Hich te ajwalil Darío la sts'ihbabe spisil te pueblohetic, nacionetic soc c'opiletic ta spisil q'uinal, hich la yal: Ayuc bayel lamal q'uinal yac awa'iyic.

²⁶Ho'on ya cal tulan mandar te ta spisil te ban c'alal jcuentahinej spisilic ya me xiwic soc ya me yich'ic ta muc' te Dios yu'un Daniel. Como ha te cuxul Dios soc sbahtel q'uinal ay. Te ban c'alal cuentahimbil yu'un mayuc bin ora ya xlaj, soc te cuentahinel yu'un stalel ya xhalaj.

²⁷Ha ya xcoltaywan soc ya x'ac'awan ta libre, ya spas señahetic soc jchahp a'teliletic; ha la scoltay te Daniel ta yip te chojetic, xchi.

²⁸Te Daniel lec c'oht te c'alal ay ta ajwalil te Darío soc te c'alal ay ta ajwalil te Ciro te persa-winique.