Read Tzeltal Oseas 10 Bible Online

Oseas 10 - Tzeltal bible

Oseas 10

¹Te Israel ha ts'usubil te bayel ya'binal te ya yac' bayel sit. C'alal p'ohl yu'unic te site, ha nix hich p'ohl te scajtajib ta chiq'uel mahtaniletic; c'alal p'ohl te bintic la yac' te sq'uinalic, ha nix hich p'ohl te loc'ombahetic yu'unique.

²Cheb yo'tanic, yo'tic ya xtahbot smulic. Te Jehová ya sjin cohel te scajtajib ta chiq'uel mahtaniletic soc ya sjinticlambe te loc'ombahetic yu'unique.

³Hich me ya yalic yo'tic: Mayuc ajwalil cu'untic como ma ba quich'ojtic ta muc' te Jehová. Pero ¿bin ya xhu' ya spas te ajwalil ta jtojoltic? xchihic.

⁴Ha nax puro c'op, ya stojol halic ta jamal c'alal ya spasic chapbil-c'op; ha yu'un te chahpanel yu'unic hich ya xcol te bin ut'il te ch'ahco' ta banti chahpambil te q'uinale.

⁵Te mach'atic nahinemic ta Samaria ya xiwic ta scaj te jcolel toro ta Bet-avén. Ya x'oc' te pueblo ta scaj te jcolel toro, ha nix hich te sacerdotehetic te tse'el yo'tanic yu'un te yutsilal, te ya xch'ay bahele.

⁶Ya x'ich'ot bahel ta Asiria te jcolel toro scuenta smahtan te muc'ul ajwalil. Ya xhil ta q'uexlal te Efraín, te Israel ya xq'uexaw yu'un te j'ac'-o'tanil yu'une.[15]

⁷Ya xch'ay bahel te ajwalil yu'un Samaria hich te bin ut'il tut te' ta sba te ha'e.

⁸Te toyol awilaletic yu'un Avén, te ha smul te Israel, ya me yich'ic jinel; ya xcol ch'ixetic ta sba te scajtajib ta chiq'uel mahtaniletic yu'unique. Hich me ya yalbeyic te witsiltic: ¡Mucawotcotic! xchihic; soc ya me yalbeyic te tsehletic: ¡Cohan tal ta jtojolcotic! xchihic.

⁹C'alal ta yorahil Gabaa la ata amul, Israel; ¡tey hilic a ta stojol te mulile! ¿Ma bal yacuc xtahot yu'un guerra ta Gabaa te mach'atic chopolique?

¹⁰Ya ca'be castigo te bin ora ya sc'an co'tan; ya stsob tal sbahic te nacionetic ta scontrahinel te c'alal ya yich'ic castigo yu'un te cha'chahp smulique.

¹¹Te Efraín hich c'ohem te bin ut'il c'ahytesbil wacax te ya smulan ya swuy trigo. Pero ya ca'be yugo ta t'ujbil snuc'; ya jchucbe yugo ta snuc' te Efraín, te Judá ya me stuc te lum, soc te Jacob ya spahman te lume.

¹²Ts'unahic te bin toj ta pasel, tsobahic te c'uxul-o'tanil; chahpanahic lum te ma to tucbiluc, como yorahilix slehel te Jehová, ha to c'alal ya xtal soc ya yac' tal ta atojolic te bin toj ta pasel hich te bin ut'il ha'al.

¹³Pero ha'ex la ats'unic te bin chopol, soc la atsobic te bin ma stojiluc, la awe'be sit te lote. Te bin ut'il la smuc'ulin awo'tanic te be awu'unic soc te ay tsobol soldadohetic awu'un,

¹⁴ya xhahch juyetel ta pueblohetic awu'un, soc ya xjihn spisil te ahnibal ts'ahquetic awu'une, hich te bin ut'il te Salmán la sjin te Bet-arbel ta yorahil guerra, te c'alal la yich'ic butsticlanel te naniletic soc te yalataque.

¹⁵Hich ya xc'oht ta atojol, Bet-el, ta scaj smuc'ul te amule. Ta sacubel q'uinal jc'axel ya yich' jinel te ajwalil yu'un Israel.