Read Tzeltal Oseas 13 Bible Online

Oseas 13 - Tzeltal bible

Oseas 13

¹C'alal c'opoj te Efraín, ayin xiwel; toybot sc'oblal ta Israel, pero la sta smul ta scuenta Baal, hich cham.

²Yacalic ta spasel xan mulil ta ora ini; ya spasic loc'ombahetic ta uhltesbil plata, ha chican bin yilel ya smulan yo'tan, ¡spisilic ha ya'tel mach'atic ya sna'ic spasel! Hich ya xhalbot sc'oblalic: Te mach'atic ya yaq'uic chic'bil mahtaniletic, ya yuhts'uyic torohetic, xchi sc'oblalic.

³Ha yu'un hich ya xc'ohtic te bin ut'il sab lum ta sacubel q'uinal, hich te bin ut'il ts'ujul ta sacubel q'uinal te ya sch'ay bahel; hich te bin ut'il suhlil trigo te ya xlichot bahel ta swuyojibal, hich te bin ut'il ch'ahil te ya xloc' ta sbe.

⁴Pero Ho'on Jehovahon te Dios awu'un c'alal ayat to ta sq'uinal Egipto; mayuc yan dios te yac ana'be sba, mayuc yan jcoltaywanej, ho'on nax jtuquel.

⁵La jcanantayat ta jochol taquin q'uinal, ta q'uinal te taquine.

⁶Noj sch'uhtic ta aquiltic, c'alal noj sch'uhtic hahch toybahil ta yo'tanic; hich ch'ayon ta yo'tanic.

⁷Ha yu'un hich ya xc'ohon ta stojolic te bin ut'il choj, ya jmacliy hich te bin ut'il c'an bo'olay choj ta be.

⁸Ya jta ta lehel hich te bin ut'il me' oso te pojbil yalatac, ya jlombe stahn, tey ya jwe' a hich te bin ut'il choj, ya xbutsticlanot yu'un ti'awal chambahlam.

⁹Ch'ayatix, Israel, pero ay ta jcuenta te coltayel awu'une.

¹⁰¿Banti ay te ajwalil awu'un, yu'un ya scoltayat ta spisil te pueblohetic awu'une? ¿Banti ay te jtsobawetic awu'un, te hich la awalbe sc'oblal: A'bon ajwalil soc príncipaletic, te xchihate?

¹¹Soc quilimba la jca'bat ajwalil, soc sc'ahc'al co'tan la jloq'uesbat.

¹²Chucbilix te schopolil te Efraín, q'uejbilix te smule.

¹³Ya xtal sc'uxul ta stojol hich te bin ut'il ants te ya x'ayin yal, pero ha jtuhl nich'anil te mayuc sp'ijil, como ta yorahil ma ba la yac' sba yu'un ya x'ayin.

¹⁴Ya cac' ta libre ta sc'ab te stsobojibal mach'atic chamenic, ya jcoltay loq'uel ta lajel. Ho'on, jlajinwanejon awu'un, lajel; ho'on, jinawalon awu'un, stsobojibal mach'atic chamenic.[19] Ma ba ya jna'be yo'bolil sbahic.

¹⁵Aunque ya xp'ohl ta yohlil te yermanotac, ya xtal te ic' ta banti ya xloc' tal c'ahc'al, te ic' yu'un Jehová te ya xtal ta jochol taquin q'uinal, ya xtaquij te sloq'uib-ha' yu'un, ya xtup' banti ya xloc' te ha' yu'une. Ha ya spojbe spisil bintic ay ta yawil sc'ulejal te t'ujbilique.

¹⁶Te Samaria ya me yich'be smul como la stoy sba ta stojol te Dios yu'une. Ya xlajic ta espada, te alaletic yu'un ya yich'ic majticlanel ta lum, soc ya yich'ic jamticlanel te antsetic te swoloj yalic.