Read Tzeltal Oseas 5 Bible Online

Oseas 5 - Tzeltal bible

Oseas 5

¹Sacerdotehetic, a'iya awa'iyic ini, sna Israel, ac'a achiquinic, sna ajwalil a'iya awa'iyic: Ha'ex awu'unic te castigo, como yaquil c'ohemex ta Mizpa, limbil yaquil ta sba Tabor c'ohemex,

²ha c'ubul hotbil ch'en ta spamlej Sitin;[14] ha yu'un ya ca'be castigo ta spisilic.

³Ya jna'be sba te Efraín; te Israel ma yu'unuc ma jna'be sba. Yo'tic, Efraín, awac'oj aba ta antsiwej, bohlobtesbil te Israel, xchi.

⁴Te ya'telic ma xyaq'uic te ya suhtic tal ta stojol te Dios yu'unique, como ha nax ya sc'anic antsiwej, ma sna'beyic sba te Jehová.

⁵Te stoybahil te Israel ya xhalot yu'un ta scontrahinel; te Israel soc Efraín ya sc'ohchin sbahic ta smulic, soc ha nix hich te Judá, pajal ya sc'ohchin sba soc.

⁶Ya xbahtic soc te tuminchijetic soc wacaxetic yu'unic ta slehel te Jehová, pero ma ba ya stahic, ¡como ihquitayotic yu'un!

⁷Ma junuc yo'tanic ta stojol Jehová, como ay scha'nich'anic; ta junax u pajal ya xlajic soc te sq'uinalique.

⁸¡Oq'uesinahic te xulubil ta Gabaa, te corneta ta Ramá! ¡Ac'ahic ta a'iyel aw ta Bet-avén! ¡Wic'a asit, Benjamín!

⁹Ya yich' jinel Efraín ta sc'ahc'alel castigo; ta chahpalchahp yu'un Israel ya cac' ta na'el te bin smelelile.

¹⁰Te príncipaletic yu'un Judá hich ayic te bin ut'il mach'atic ya syanijtesbeyic smojonil te q'uinale; ¡pero ya jmal te quilimba ta stojolic hich te bin ut'il ha'!

¹¹Uts'imbil te Efraín, tembil ta castigo, como la sc'an la st'un bahel te bintic tojol ayic.

¹²Hich ya xc'ohon ta stojol Efraín te bin ut'il chan te ya sjoch'obtes, hich te bin ut'il sjoch'ol te sna Judá.

¹³C'alal Efraín ya yil te ay ta chamel, soc te Judá ya yil sc'a'emal, hich te Efraín ya xbaht ta Asiria ta sc'anel coltayel ta stojol te muc'ul ajwalil; pero ma xhu' ya slecubtesex, ma xhu' ya spoxtaybeyex te sc'a'emal.

¹⁴Como hichon te bin ut'il choj ta stojol Efraín, hichon te bin ut'il jcolel choj ta stojol te sna Judá; ho'on nix ya jbutsticlan, hich ya xloc'on bahel; ya jtsacticlan bahel, mayuc mach'a ya xhu' ya scoltay loq'uel ta jc'ab.

¹⁵Ya suhton bahel ta banti cawil, ha to c'alal ya sna'ic te smulic soc ya slehbonic jsit quelaw. ¡Te c'alal ay swocolic a ya me slehonic! xchi.