Read Tzeltal Oseas 6 Bible Online

Oseas 6 - Tzeltal bible

Oseas 6

¹La'ic, suhtucotic ta stojol Jehová; ha nix la stsacotic, pero ya spoxtayotic; la yehchentesotic, pero ya spotsbotic.

²Li' ta cheb c'ahc'al ya ya'botic xan jcuxlejaltic, ta yoxebal c'ahc'al ya shachotic, hich ya xcuxajotic ta stojol.

³Ac'a jna'betic sba te Jehová; ya xtal ta jtojoltic hich smelelil te bin ut'il ya xloc' tal te c'ahc'ale; ya xtal ta jtojoltic hich te bin ut'il te ha'ale, hich te bin ut'il te ha'al ta yorahil sit soc ta yorahil shahchel snahtil c'ahc'al te ya yahts'es te q'uinale.

⁴Ya yal te Jehová: ¿Bin ya jpasbat ta atojol, Efraín? ¿Bin ya jpasbat ta atojol, Judá? Te sc'uxul awo'tanic hich c'ohem te bin ut'il tocal ta sab, hich c'ohem te bin ut'il te ts'ujul ta sacubel q'uinal te ya xch'ay bahele.

⁵Ha scuentahil te la jset'ticlan ta scuenta te jalwanejetic, la jmilticlan ta scuenta te jc'ope, te castigo ya ca'be hich ya xtihl tal te bin ut'il sacal q'uinal.

⁶Como ha ya jc'an c'uxul-o'tanil, ma ha'uc chic'bil mahtanil, c'ax hich ya jc'an te yac ana'be sba Dios te bin ut'il scohtol chic'bil mahtaniletic.

⁷Pero hich te bin ut'il Adán, la sc'axuntayic te chapbil-c'op; ma junuc yo'tanic ta jtojol tey a.

⁸Te Galaad ha pueblo te chopol ya'telic, yat'inejic ch'ich'.

⁹Hich te bin ut'il j'eleq'uetic ya smacliyic jtuhl winic, hich ya spas jchahp sacerdotehetic, ya xmilawanic soc ya spasic bintic ilobtic sba ta be te ya xbaht ta Siquem.

¹⁰La jquil ta sna Israel te bintic c'ax chopol: tey la ya'iy antsiwej a te Efraín, soc la sbohlobtes sba te Israel.

¹¹Soc ha'at nix ta acuenta, Judá, chapalix te yac awich' tsobel, te c'alal ya cac' suhtic tal ta chuquel te pueblo cu'une.