Read Tzeltal Oseas 7 Bible Online

Oseas 7 - Tzeltal bible

Oseas 7

¹Te c'alal yac jpoxtaybel a te Israel, chicnaj smul te Efraín soc schopolil te Samaria, como la ya'iyic lo'loywanej; ya x'och bahel te j'eleq'uetic, soc te jchahp j'eleq'uetic ya ya'iyic elec' ta calle.

²Ma sna'ic te jna'oj spisil te bintic chopol spasojique. Yo'tic joytaybiliquix yu'un te ya'telic te ayic ta jtojol.

³Ta scuenta schopolilic ya ya'beyic tse'el yo'tan te ajwalil, soc te príncipaletic ta scuenta te slotique.

⁴Spisilic ha j'antsineletic; hich c'ohemic te bin ut'il horno te ay sc'ahc'al, te ma ba ya x'a'bot xan sc'ahc'al yu'un te mach'a ya ya'be sc'ahc'al te c'alal wots'bilix a te harina ha to c'alal ya xpajub.

⁵Ta sc'ahc'alel te q'uinal yu'un te ajwalil cu'untic, te príncipaletic la ya'beyic chamel ta scuenta sc'ahc'al te vino; jun yac'oj sba soc te jlabanwanejetique.

⁶Ya schap ta yo'tanic shachel c'op, hich te bin ut'il ya yich' chahpanel te horno; sjunal ahc'abal ya xway te mach'a ya ya'be sc'ahc'al te horno, pero ta sab ya xtihl hich te bin ut'il c'ahc' te yac ta tihlele.

⁷Spisilic hich sc'ahc'alic te bin ut'il horno, ya slajinic te jtsobawetic yu'unique. Hich yahlic spisil te ajwaliletic yu'unic, mayuc mach'a ya sc'oponon.

⁸Te Efraín la scap sba soc te jyanlumetic; hich c'ohem te bin ut'il pimil pan te jehch nax ta'ajem.

⁹Lajimbot yip yu'un jyanlumetic, pero ma ba ya sna'. Sacubenix te stsotsel sjol pero ma ba ya sna'.

¹⁰Te stoybahil Israel ha nix ya xhalot yu'un; pero ma ba ya suhtic tal, ma ba ya slehic te Jehová te Dios yu'unique.

¹¹Te Efraín hich c'ohem te bin ut'il stsuhmut, ma sna' q'uinal: ya yawtay Egipto, ya xbaht ta stojol Asiria.

¹²Te c'alal ya xbahtic tey a, ya jlim bahel jyac ta stojolic; hich ya cac' cohuc tal te bin ut'il mutetic ya xwihlic ta toyol, ya ca'be castigo hich te bin ut'il halbil ta tsoblej yu'unique.

¹³¡Obol sbahic! como la yihquitayonic hilel; ya xtal jinel ta stojolic, como la stoy sbahic ta jtojol. Ya jc'an ya jcoltay, pero ya yalic lot ta jtojol.

¹⁴Ma ba la yawtayon soc spisil yo'tanic te c'alal oq'uic ta swayibic; la stsob sbahic ta scuenta trigo soc vino, la stoy sbahic ta jtojol.

¹⁵Aunque ho'on la jnohptes soc la jca'be yip sc'abic, la schahpanic bin chopol ta scontrahimbelonic.

¹⁶Suhtic, pero ma ha'uc ta stojol te Mach'a mero toyol ay; hich c'ohemic te bin ut'il lo'loywanej t'ihmalte'. Yahlic ta espada te príncipaletic yu'unic ta scaj stoybac'opic; ha ya xtse'layotic yu'un ta sq'uinal Egipto.