Read Tzeltal Joel 1 Bible Online

Joel 1 - Tzeltal bible

Joel 1

¹Te sc'op Jehová te tal ta stojol Joel snich'an Petuel.

²A'iya awa'iyic ini, mamaletic, a'iya awa'iyic spisil mach'atic nahinemic ta q'uinal. ¿Ay bal hich c'ohem ta pasel ta aworahil o ta yorahil te ame'atatique?

³Halbeya ya'iy ini te awal-anich'nabic, soc ac'a yalbeyic ya'iy te yal-snich'nabic, soc te snich'nabic ac'a yalbeyic te yan caj ts'umbalil.

⁴Te bin ma ba laj yu'un te yol la swe' te tut c'ulub; te bin ma ba laj yu'un te tut c'ulub la swe' te xc'aj; te bin ma ba laj yu'un te xc'aj la swe' te c'ulube.

⁵Cuxa awo'tanic, jyacubelex, oc'anic; ahcanajanic apisilic te yac awuch'ic vino, como pojbilix loq'uel ta awehic.

⁶Como jun pueblo te bayel yip soc tsobolic mohix talel ta jq'uinal; te sbaquel yehic pajal soc sbaquel yehic choj, te scha'amic pajal soc scha'amic choj.

⁷La slajimbon te ts'usubil cu'un, soc la set'bon te higuera cu'un; la scho'bon spat, la sch'oj cohel, sac hil te sc'abc'ab yu'un.

⁸Oc'an hich te bin ut'il ach'ix te slapoj sc'u' scuenta mel-o'tan yu'un te smamalal c'alal ach'ix to a.

⁹Ch'ay bahel ta sna Jehová te mahtanil harina soc te malbil mahtanil; te sacerdotehetic te ya x'a'tejic ta stojol Jehová ayic ta mel-o'tan.

¹⁰Jimbilix te c'altic, ay ta mel-o'tan te q'uinale, como laj te trigo, taquijix te yach'il vino, ch'ayix te aceite.

¹¹Mela awo'tanic, ha'ex te ya x'a'tejex ta q'uinal; ahcanajanic, ha'ex te ya x'a'tejex ta ts'usubiltic, mela awo'tanic yu'un te trigo soc te cebada, como ch'ay te sit te awal-ts'unubile.

¹²Taquijix te ts'usubil soc ch'ay te higuera; ha nix hich te granado, te xahn soc te manzana, spisil te te'etic ta q'uinal taquijemiquix. Hich laj te yutsil q'uinal ya ya'iyic te ants-winiquetique.

¹³Lapahic pac' yu'un mel-o'tan, oc'anic, sacerdotehetic, ahcanajanic, ha'ex te ya x'a'tejex ta scajtajib ta chiq'uel mahtanil; la'ic, wayanic ta pac' yu'un mel-o'tan, ha'ex te ya x'a'tejex ta stojol te Dios cu'une; como loq'uemiquix ta sna te Dios cu'untic te mahtanil harina soc te malbil mahtanil.

¹⁴Puca ta halel te ya scom swe'elic, hala ta tsoblej, tsoba abahic ta sna Jehová te Dios awu'unic, te mamaletic soc spisil mach'atic nahinemic ta q'uinal, c'oponahic te Jehová.

¹⁵¡Ay me wocol ta hich ora! como nopolix te sc'ahc'alel yu'un Jehová; hich ya xtal te bin ut'il te jinel yu'un te Mach'a spisil ya xhu' yu'un.

¹⁶¿Ma bal la yich' loq'uesel ta jtojoltic te we'elil, te tse'el-o'tanil soc te yutsil q'uinal ta sna te Dios cu'untique?

¹⁷Te awalil c'a' ta surcohil, jochol hilic te yawil trigo, jimbiliquix banti q'uejbil te sit awal-ts'unubil, como taquijem te trigo.

¹⁸¡Bayel awonic te chambahlametic! ¡Xmo xyal te jtsob wacaxetic, como mayuc ac ya swe'ic! Ha nix hich ay swocolic schahpal te tuminchijetique.

¹⁹Ha'at, Jehová, ya cawtayat; como lajix ta chiq'uel ta c'ahc' te ya'malel te jochol q'uinal, soc lajix ta c'ahq'uel spisil te te'etic ta q'uinal.

²⁰Ha nix hich ya x'awonic ta atojol te ha'mal chambahlametic, como tup'ix ya'lel te uc'umetic, soc lajix ta c'ahc' te aquiltic ta jochol taquin q'uinal.