Read Tzeltal Joel 2 Bible Online

Joel 2 - Tzeltal bible

Joel 2

¹Oq'uesinahic corneta ta Sión, ac'a ta na'el ta ch'ul wits cu'un. Ac'a nihcuc spisil te mach'atic nahinemic ta q'uinal, yu'un ya xtal te sc'ahc'alel yu'un Jehová, yu'un nopolix.

²Ha sc'ahc'alel yihc'al q'uinal soc ahc'abal, sc'ahc'alel tocal soc spimil yihc'al q'uinal. Hich te bin ut'il ya slim bahel ta witsiltic te sacubel q'uinal, hich ya xtal jchahp soldadohetic te c'ax bayelic soc ay yipic; mayuc hich chicnajem ta ilel soc mayuc hich ya xchicnaj ta patil ta bayel ha'bil ta cajalcaj ts'umbalil.

³Spisil ya xlaj ta c'ahc' ta stojolic, soc ya xlaj ta yat c'ahc' ta spatic. Te q'uinal hich yilel te bin ut'il ts'umbil q'uinal Edén te c'alal ma to ba c'axemic a, ta spatic hich ya xc'oht te bin ut'il jochol taquin q'uinal; mayuc bin ya xcol hilel ta stojolic.

⁴Hich yilelic te bin ut'il cawuhetic, hich ya x'ahnimajic te bin ut'il mach'atic mohemic ta cawu.

⁵Hich xnilet sc'opic te bin ut'il carretahetic te c'alal ya xwihlic bahel ta witsiltic; pajal soc xju'et yat c'ahc' te ya schic' taquin ha'maletic, pajal soc jchahp soldadohetic te ay yipic te chapalic ta guerra.

⁶Te pueblohetic ya xiwic ta stojolic, ya sacub spisil sit yelawic.

⁷Hich ya x'ahnamajic te bin ut'il soldadohetic, hich te bin ut'il soldadohetic ya xmohic ta ts'ahc; te jujune toj ya xbaht ta sbehic, ma ba ya xhowiyic ta be.

⁸Ma ba ya sten sbahic, jujun ya stojlin bahel banti ya xbaht; aunque ya x'a'bot espada, ma ba ya sjin sbahic te scholet ayique.

⁹Ya yochintayic te pueblo, ya x'ahnimajic ta sba ts'ahc, ya xmohic ta nahnatic, ya x'ochic ta ventana hich te bin ut'il j'eleq'uetic.

¹⁰Te lumq'uinal ya snihc sba ta stojolic, te ch'ulchan ya syuc' sba yu'unic; te c'ahc'al soc te u ya x'ihc'ub, ya xch'ay sts'anabul te eq'uetique.

¹¹Te Jehová ya yal mandar ta stojol te soldadohetic yu'un, c'ax muc' te campamento yu'unic, soc bayel yipic ya sch'uhunic spasel te smandare. Muc' soc xiweltic sba te sc'ahc'alel yu'un Jehová; ¿mach'a ya xcuhch yu'un?

¹²Yo'tic ini, xchi te Jehová, suhtanic tal ta jtojol soc spisil awo'tanic, suhtanic ta jtojol ta spisil awo'tanic, coma awe'elic, mela awo'tanic soc oc'anic.

¹³Jata awo'tanic, ma ha'uc xach'i' te ac'u'ique, suhtanic tal ta stojol Jehová te Dios awu'unique, como ay sc'uxul yo'tan, soc ya sna' yo'bolil jbahtic, ma orahuc ya x'ilin soc ay bayel sc'uxul yo'tan, c'ux ya ya'iy te ya yac' castigo.

¹⁴¡Ya wan suht sc'op soc ya wan yac' hilel bendición: ha te mahtanil harina soc malbil mahtanil yu'un Jehová, te Dios awu'unique!

¹⁵¡Oq'uesinahic corneta ta Sión, pucahic ta halel te ya scom swe'elic, halahic te ya me stsob sbahic;

¹⁶tsobahic te pueblo, ch'ultesahic te tsoblej, tsobahic te mamaletic, tsobahic te alaletic, ha nix hich te chu'alaletique; ac'a loc'uc tal ta swayib te querem nuhpunel to, ac'a loc'uc tal te ach'ix ta jtsahl yu'un nuhpunel!

¹⁷Te sacerdotehetic, ha te a'batetic yu'un Jehová, ac'a oq'uicuc ta ohlil yu'unte yochibal te templo soc te scajtajib ta chiq'uel mahtanil, hich ac'a yalic: Jehová, pasbeya perdón te pueblo awu'une, ma xawac' ta labanel te bin ay awu'un, yu'un ya x'u'untayot yu'un te nacionetique. ¿Bin yu'un te hich ya yalic ta yohlil te pueblohetic: Banti ay te Dios yu'unic, te xchihique?

¹⁸Te Jehová, te bin ut'il xut'et yo'tan ta scuenta te q'uinal yu'un, ya me sna'be yo'bolil sba te pueblo yu'une.

¹⁹Te Jehová hich ya sjac'be sc'op te pueblo yu'une: Ya jticombeyex trigo, yach'il vino soc aceite, tic' ya xnoj ach'uhtic yu'un; mayuquix bin ora ya cac' te yac awich'ic labanel ta yohlil te nacionetique.

²⁰Ya cac' namijuc bahel ta atojolic te soldadohetic talemic ta norte, ya jticon bahel ta jochol taquin q'uinal: te nahil ay yu'unic ya x'ochic bahel ta mar ta stojol sloq'uib c'ahc'al, te patil ay yu'unic ya x'ochic ta mar ta stojol smahlib c'ahc'al. Ya xc'a'ic soc ya xmo stuhil, muc' bintic spasticlanejic.

²¹Ma me xiwat, lumq'uinal, tse'eluc awo'tan soc ayuc yutsil awo'tan, como te Jehová ay bintic muc' ya spasticlan.

²²Ma me xiwex, ha'mal chambahlametic, como ya xyaxubix xan te aquiltic ta jochol taquin q'uinal; ya xcha'ac' xan sit te te'etic, te higuera soc te ts'usubil ya me yac' xan sitic.

²³Ha nix hichex, yal-snich'nabex Sión, tse'eluc me awo'tanic, ayuc me yutsil awo'tanic ta stojol Jehová te Dios awu'unique, como la ya'beyexix tal te shahchibal ha'al ta yorahil, soc ya me sticon tal ta atojolic te ha'al ta yorahil scomil c'ahc'al soc ta yorahil snahtil c'ahc'al, hich te bin ut'il ta nahil to.

²⁴Ya xnoj ta trigo te swuyojibaletic, jc'axel ya xnoj te yawil vino soc aceite.

²⁵Ya jeltaybeyex te ha'biletic te lajinot yu'un te yol, te tut c'ulub, xc'aj soc te c'ulube, ha te tsobol soldadohetic cu'un te la jticombeyex ta atojolique.

²⁶Ya me xwe'ex ha to c'alal ya xnoj ach'uhtic, soc ya me awalbeyic yutsil sc'oblal te sbihil te Jehová te Dios awu'unic, te c'ax lec bintic la spasbeyex; mayuquix bin ora ya xtahot yu'un q'uexlal te pueblo cu'une.

²⁷Ya me ana'ic te ayon ta yohlil te Israel, soc te ho'on Jehovahon te Dioson awu'unic, mayuc yan; mayuquix bin ora ya xtahot yu'un q'uexlal te pueblo cu'une.

²⁸Ta patil ya jmal cohel te Espíritu cu'un ta stojol spisil ants-winiquetic, ya me yalic sc'op-jalwanej te aquerem-nich'nabic soc te awantsil-nich'nabic; te mamaletic awu'unic ay bin ya swayichtayic, soc te queremetic awu'unic ya me yilic nahalsitiletic.

²⁹Ha nix hich te a'batetic soc te criadahetic ya jmalbe cohel ta stojolic te Espíritu cu'un ta hich ora.

³⁰Ya cac' chicnajuc jchahp a'teliletic ta ch'ulchan soc ta bahlumilal, ha te ch'ich', c'ahc' soc spimil ch'ahil.

³¹Ya x'ihc'ub te c'ahc'al, soc ya xc'atp'uj ta ch'ich' te u, te c'alal ma to xc'oht a te sc'ahc'alel Jehová te muc' soc te xiweltic sbahe.

³²Spisil te mach'atic ya sc'opon Jehová ta scuenta sbihil ya me xcolic; como ta wits Sión soc ta Jerusalén ay me colel, hich te bin ut'il yaloj te Jehová, ta yohlil te mach'atic cuxulic hilel ay mach'atic ya x'ic'otic yu'un Dios.