Read Tzeltal Amós 1 Bible Online

Amós 1 - Tzeltal bible

Amós 1

¹Ha sc'op Amós, jtuhl jcanan-tuminchij ta Tecoa, te la yalbe sc'oblal te Israel ta yorahil Uzías ajwalil yu'un Judá, soc te Jeroboam snich'an Joás, ajwalil yu'un Israel, cheb ha'bil ma to xtal nihquel a.

²Hich la yal: Ya x'awon Jehová c'alal ta Sión, ya yac' ta a'iyel sc'op c'alal Jerusalén, te aquiltic yu'un te jcanan-tuminchijetic ya xtaquij soc ya xtaquij te ba wits Carmelo.

³Hich yaloj te Jehová: Ta scuenta oxchahp mulil yu'un Damasco, ta scuenta chanchahp, ma ba ya jcom te castigo yu'une; como la swuyticlanic te Galaad ta swuyojibal pasbil ta hierro.

⁴Ya ca'be sc'ahc'al te sna Hazael, ha ya slajinlan te tulan ts'ahquetic yu'un Ben-adad.

⁵Ya jwac'ticlambe sc'atal-te'el te ochibaletic yu'un Damasco; ya jlajinlan te mach'atic nahinemic ta spamlej yu'un Avén, soc te jcuentahinwanejetic yu'un Bet-edén; soc te pueblo yu'un Siria ya me yich'ic iq'uel bahel ta Kir, xchi te Jehová.

⁶Hich yaloj te Jehová: Ta scuenta oxchahp mulil yu'un Gaza, ta scuenta chanchahp, ma ba ya jcom te castigo yu'une; como la yic' bahel ta chuquel spisil te jun pueblo yu'un ya ya'be ta sc'ab Edom.

⁷Ya ca'be sc'ahc'al te ts'ahquetic yu'un Gaza, ha ya slajinlan te tulan ts'ahquetic yu'une.

⁸Ya jlajinlan te mach'atic nahinemic ta Asdod, soc te jcuentahinwanejetic yu'un Ascalón; ya cac' xan jc'ab ta scontrahinel Ecrón, soc ya me xlaj te filisteohetic te cuxul hilemique.

⁹Hich yaloj te Jehová: Ta scuenta oxchahp mulil yu'un Tiro, ta scuenta chanchahp, ma ba ya jcom te castigo yu'une; como la yac' ta sc'ab Edom jun pueblo, ma ba la yich' ta cuenta te chapbil-c'op ta stojol mach'atic yermano sbahic.

¹⁰Ya ca'be sc'ahc'al te ts'ahc yu'un Tiro, ha ya slajinlan te tulan ts'ahquetic yu'une.

¹¹Hich yaloj te Jehová: Ta scuenta oxchahp mulil yu'un Edom, ta scuenta chanchahp, ma ba ya jcom te castigo yu'une; como la snuts bahel ta espada te yermano, ma ba la yac' ta ilel sc'uxul yo'tan; u'untaybil spisil ora yu'un te sc'ahc'al yo'tan, stalel sq'uejoj yilimba.

¹²Ya ca'be sc'ahc'al te Temán, ha ya slajinlan te tulan ts'ahquetic yu'un Bosra, xchi.

¹³Hich yaloj te Jehová: Ta scuenta oxchahp mulil yu'un Amón, ta scuenta chanchahp, ma ba ya jcom te castigo yu'une; como la sjambe sch'uht ta espada te antsetic yu'un Galaad te swoloj yalic, yu'un ya smuc'ubtes xan te sq'uinale.

¹⁴Ya ca'be sc'ahc'al te ts'ahc yu'un Rabá, ha ya slajinlan te tulan ts'ahquetic yu'un, soc xnilet ta yorahil guerra, soc tulan ic' ta yorahil ic'al-ha'al.

¹⁵Te ajwalil yu'un ya x'ic'ot bahel ta chuquel, soc spisil te príncipaletic yu'une, xchi te Jehová.