Read Tzeltal Amós 3 Bible Online

Amós 3 - Tzeltal bible

Amós 3

¹A'iya awa'iyic te bin ya yal te Jehová ta scontrahinelex, snich'nabex Israel, ta scontrahinel spisil mach'atic ay awu'unic te la jloq'ues tal ta sq'uinal Egipto:

²Ta yohlil spisil te pueblohetic ta bahlumilal; ha'ex nax atuquelic te la jtsahex ha yu'un ya ca'beyex castigo yu'un spisil te bin chopol apasojique.

³¿Pajal bal ya xbehen te chebic teme ma ba pajal yo'tan sbahic?

⁴¿Ya bal x'awon choj ta ha'maltic, teme mayuc bin stsacoj? ¿Ya bal x'awon te tut choj ta sch'en teme mayuc bin stsacoj?

⁵¿Ya bal xch'ay cohel ta yaquil ta lum te mut teme mayuc bin ya slo'loy tal a? ¿Ya bal smac sba te yaquil ay ta lum teme mayuc bin ochem tey a?

⁶¿Ya bal yich' oq'uesinel corneta ta pueblo te ma ba ya xnihquic ants-winiquetic yu'un? ¿Ay bal wocol ya xc'oht ta pueblo te ma ba ticombil yu'un Jehová?

⁷Mayuc bin ya spas te Jehová teme ma ba ya ya'be sna'ic te a'batetic yu'un, ha te jalwanejetic, te bin muquen ay ta yo'tan.

⁸Teme awon te choj ¿mach'a a te ma ba ya xi'e? Teme ay bin ya yal te Jehová ¿mach'a a te ma ba ya yal sc'op-jalwanej?

⁹Pucahic ta halel ta tulan ts'ahquetic yu'un Asdod soc ta tulan ts'ahquetic yu'un te sq'uinal Egipto, hich me xawalbeyic: Tsoba abahic ta witsiltic yu'un Samaria, ilawilic te bayel c'op ta yohlil soc te uts'inel tey a.

¹⁰Ma sna'ic spasel bin toj, xchi te Jehová; ya stsobic ta tulan ts'ahquetic yu'unic bintic elc'ambil soc te bintic pojbile.

¹¹Ha yu'un hich yaloj te Jehová te Ajwalil: Bayuc ya xtal acontratac, ya sjimbat cohel te tulan ts'ahquetic awu'un soc ya spojic bahel sbiluc te ahnibal ts'ahquetic awu'une, xchi.

¹²Hich yaloj te Jehová: Hich te bin ut'il te jcanan-tuminchij ya spojbe loq'uel ta ye choj cheb yoc o sti'il schiquin, hich ya xcol te israeletic te nahinemic ta Samaria, te ya shuhcan sbahic ta sti'il swayib soc ta lequil huctajibal.

¹³A'iya awa'iyic soc halahic testigo-c'op ta scontrahinel te sna Jacob, xchi te Jehová, te Dios te scuentahinej spisil:

¹⁴Te bin c'ahc'alil ya ca'be castigo yu'un smul te Israel, ya jinticlan te scajtajib ta chiq'uel mahtaniletic ta Bet-el; ya yich' set'el loq'uel te xulubiletic yu'un te scajtajib ta chiq'uel mahtanil, ya xch'ay cohel ta lum.

¹⁵Ya jin cohel te na banti ya xnahinic ta yorahil sic soc te na banti ya xnahinic ta yorahil q'uixin q'uinal, soc ya xlajic te nahetic ch'albilic ta marfil; bayel nahetic ya yich'ic jinel, xchi te Jehová.