Read Tzeltal Amós 5 Bible Online

Amós 5 - Tzeltal bible

Amós 5

¹A'iya awa'iyic te c'op ini scuenta mel-o'tan te ya cal ta atojolic, sna Israel:

²Yahlix te ach'ix Israel, ma xhu' ya xhahchix; ihquitayot hilel ta sq'uinal, mayuc mach'a ya xhahchot yu'un.

³Como hich yaloj te Jehová, te Ajwalil: Te pueblo te ya xloc' bahel ta guerra soc jmil (1,000) ta tuhl, ha xanix ho'winic (100) ya suhtic talel; te pueblo te ya xloc' bahel soc ho'winic (100) ta tuhl, ha xanix lajuntuhl ya suhtic tal ta sna Israel, xchi.

⁴Pero te Jehová hich ya yalbe te sna Israel: Lehawonic, hich ya xcuxajex;

⁵ma me xbahex ta Bet-el, ma me x'ochex bahel ta Gilgal, ma me xc'axex bahel ta Beerseba, como te Gilgal ya me x'ic'ot bahel ta chuquel soc te Bet-el jimbil ya xc'oht, xchi.

⁶Lehahic te Jehová, hich ya xcuxajex; teme ma'uque, ha ya xc'ax bahel ta sna José hich te bin ut'il c'ahc', ya xlajinot yu'un, mayuc mach'a ta Bet-el te ya stup'.

⁷¡Ay me awocol ha'ex te yac ac'atp'unic ta bin ch'a te stojil chahpanel, soc te yac ach'ojic ta lum te bin stojil ta pasele!

⁸Te mach'a la spas te Xana-ec' soc te Cruz-ec', te ya sc'atp'un ta sacal q'uinal te yihc'al q'uinal soc ya yac' ta ahc'abal te c'ahc'alele, te ya yic' tal te ya'lel te mar soc ya smal ta sba te lumq'uinal: ha Jehová te sbihile.

⁹Ha ya sticon bahel jinel ta stojol te bin tulan, ya yac' c'ohtuc jinel ta stojol te ahnibal ts'ahc.

¹⁰La sp'ajic te jtsitsawetic te ayic ta yochibal te pueblo, soc la yihlayic te mach'a smelelil bin ya yal.

¹¹Te bin ut'il yac apehc'ambeyic sc'oblal te pobre soc yac ac'ambeyic spatanil te trigo, ma ba ya xnahinex ta nahetic la apasic ta walubil ton, soc ma ba yac awuch'beyic te vino yu'un te t'ujbil ts'usubiletic la ats'unique.

¹²Como ya jna' te bayel bin chopol apasojic soc te bayel amulique; yac awuts'inic te mach'a toj yo'tan, yac awich'ic taq'uin te la achon abahic a, soc ta chapajibaletic yac awac' ch'ayuc te bin ya sc'an te pobre.

¹³Ha yu'un te mach'a ya sna' stsahtayel mayuc bin ya yal ta hich ora, como chopol te yorahile.

¹⁴Lehahic te bin lec, ma ha'uc te bin chopol, scuenta yu'un hich ya xcuxajex; hich te Jehová Dios te scuentahinej spisil, ya sjoquinex, hich te bin ut'il yac awalique.

¹⁵Ihlayahic te bin chopol, c'ux me xawa'iy ta awo'tanic te bin lec, soc a'beya yich' yip te stojil chahpanel ta chapojibal; te Jehová te Dios te scuentahinej spisil ya wan sc'uxultay te jayeb ya xhilic yu'un José.

¹⁶Ha yu'un hich yaloj te Jehová Dios te scuentahinej spisil: Ay me oq'uel ta spisil te plazahetic, soc ta spisil callehetic hich me ya yalic: ¡Ay! ¡Ay! xchihic. Ya yiq'uic tal ta oq'uel te j'a'tel ta q'uinal, soc ya yiq'uic tal ta oq'uel te mach'atic ya sna'ic oq'uel.

¹⁷Ay oq'uel ta spisil ts'usubiletic, yu'un ya xc'axon ta awohlil, xchi te Jehová.

¹⁸¡Obol sbahic te mach'atic ya sc'anic te sc'ahc'alel yu'un Jehová! ¿Bin yu'un yac ac'anic te sc'ahc'alel yu'un Jehová? ha sc'ahc'alel yihc'al q'uinal, ma sacal q'uinaluc.

¹⁹Hich ya xc'oht te bin ut'il mach'a ya x'ahn loq'uel ta stojol choj, ya sta sba soc oso; o hich te bin ut'il te mach'a ya x'och ta sna soc ya yich' yip sc'ab ta pahc', ya xti'ot ta chan.

²⁰Te sc'ahc'alel yu'un Jehová, ¿ma bal ha'uc yihc'al q'uinal, ma ha'uc sacal q'uinal; te ha ahc'abal, te mayuc sts'anabul?

²¹La jp'aj, la jquihlay te q'uinetic awu'unic, ma jmulan te tsoblejetic awu'unique.

²²Teme yac awa'bonic te chic'bil mahtaniletic soc te mahtaniletic harina, ma ba ya jtsacbeyex, soc ma ba ya quil te mahtaniletic scuenta lamal q'uinal yu'un te juhp'en chambahlametic awu'unique.

²³Loq'uesa ta jtojol te bayel xjuyet c'ayojetic awu'un, ma ba ya ca'iybe sc'op te arpahetic awu'une.

²⁴Pero ac'a oquinuc cohel te stojil chahpanel hich te bin ut'il ha', soc ac'a oquinuc cohel te bin toj ta pasel hich te bin ut'il be-ha' te ma xquehchaj ta oc.

²⁵¿La bal awa'bonic milbil mahtanil soc yan mahtaniletic te cha'winic (40) ha'bil ta jochol taq'uin q'uinal, ha'at, snahat Israel?

²⁶La acuchic bahel te nahilpac' templo yu'un Moloc soc te Quiún te loc'ombahetic awu'unic, te ec' yu'un te diosetic awu'unic te la apasique.

²⁷Ha yu'un ya caq'uex bahel ta chuquel ta sjehchelul Damasco, xchi te Jehová, te ha Dios te scuentahinej spisil te sbihile.