Read Tzeltal Amós 8 Bible Online

Amós 8 - Tzeltal bible

Amós 8

¹Ha la ya'bon quil ini te Jehová te Ajwalil: jun moch te nojel ta sit awal-ts'unubil te sc'analixe.

²Hich la sjoc'obon: ¿Bin yac awil, Amós? xchi. Jun moch te nojel ta sit awal-ts'unubil te sc'analix, xchihon. La yalbon te Jehová: Talix yorahil slajibal te Israel te pueblo cu'une; ma ba ya jpasbeyix perdón.

³Ta hich ora te c'ayojetic ta templo ya sutp'ijic ta ahcan, xchi te Jehová te Ajwalil. Bayel chamen baq'uet ya xc'oht, ya yich'ic ch'ojel loq'uel ta bayuc, mayuc mach'a ya xc'opoj.

⁴A'iya awa'iyic ini, ha'ex te yac ats'o'ic ta teq'uel te mach'atic mayuc bin ay yu'unic soc te yac ajinic te pobrehetic ta q'uinal,

⁵te hich yac awalic: ¿Bin ora ya xc'ax te q'uin yu'un yach'il u, yu'un ya jchontic te sit awal-ts'unubil; soc bin ora ya xc'ax te sc'ahc'alel cux-o'tan, yu'un ya jamtic te yawil trigo? Ya jtutubtes te sp'isol, ya jtoybetic te stojol soc ya jlo'loytic ta sp'isojibal yalal;

⁶ya jmantic ta taq'uin te pobrehetic, ya jeltic ta jchahp zapato te mach'atic mayuc bin ay yu'unic, soc ya jchontic te sts'ubil te trigohe, xchihex.

⁷Te Jehová hich la yal ta jamal ta scuenta te yutsilal Jacob: Ma ba ya xch'ayix ta co'tan te bin spasojic, xchi.

⁸¿Ma bal yacuc xnihc sba te q'uinal yu'un? ¿Ma bal yacuc x'oc' spisil mach'atic nahinemic tey a? Ya xmo bahel spisil te q'uinal hich te bin ut'il te muc'ul-ha' Nilo; ya syuc' sba soc ya xco bahel hich te bin ut'il te muc'ul-ha' yu'un Egipto.

⁹Ta hich ora, xchi te Jehová, te Ajwalil, ya cac' te ya xmahl c'ahc'al ta ohlil c'ahc'al, c'alal saquix q'uinal a ya jmuc ta yihc'al q'uinal.

¹⁰Ya jsutp'in ta oq'uel te q'uinetic awu'unic soc spisil te c'ayojetic awu'unic ya jsutp'in ta mel-o'tan; ya cac' te yac alapic c'u'ul scuenta mel-o'tan soc ya yich' quits'el spisil stsotsel ajolic. Ya cac' te hich ya xc'oht te q'uinal te bin ut'il oq'uel yu'un te mach'a ch'ayem te hip jtuhl snich'an, soc te slajibal hich ya xc'oht te bin ut'il ch'a te sc'ahc'alele.

¹¹Ya xtalix sc'ahc'alel, xchi te Jehová, te ya jticon tal wi'nal ta q'uinal; ma ha'uc te wi'nal yu'un we'elil, o te taquinti'il yu'un ha', ha wi'nal ta ya'iyel te sc'op Jehová.

¹²Xmeletic ta behel ta mar c'alal ta yan mar, c'alal ta norte c'alal ta banti ya xloc' tal c'ahc'al; ya xbehenic ta slehel te sc'op Jehová, pero ma ba ya stahic.

¹³Ta hich ora te t'ujbil ach'ixetic soc te queremetic ya xch'ay yo'tanic yu'un taquinti'il.

¹⁴Te mach'atic ay bin ya yalic ta jamal ta scuenta te mulil yu'un Samaria, te hich ya yalic: Ta scuenta te Dios awu'un, Dan, xchihic; soc: Ta scuenta te sbehlal Beerseba, te xchihique, ya me xyahlic, mayuquix bin ora ya xhahchiquix.