Read Tzeltal Amós 9 Bible Online

Amós 9 - Tzeltal bible

Amós 9

¹La jquil te Cajwaltic teq'uel ta sts'ehl te scajtajib ta chiq'uel mahtanil, hich la yal: Maja te sni'il te bahlal oy, ac'a syuq'uilan te puertahetic, wuyticlana cohel ta sjol spisilic. Te mach'atic cuxul ya xhilic ya jmilticlan ta espada; mayuc mach'a ya x'ahnic bahel, mayuc mach'a ya xcol.

²Aunque ya sjoq'uic c'alal ta stsobojibal mach'atic chamenic, tey ya jtsacticlan ta jc'ab a; aunque ya xmohic bahel c'alal ta ch'ulchan, tey ya jcohtes tal a.

³Teme ya snac' sbahic ta ba wits yu'un Carmelo, tey ya jle a soc ya jtsacticlan; aunque ya snac' sbahic ta jtojol c'alal ta sc'ubulil mar, tey ya calbe ta mandar te chan te ya sti'e.

⁴Teme ya x'ic'otic bahel ta chuquel yu'un te scontratac, tey ya jticon bahel a te espada te ya xmilotic yu'un. Ya cac' jsit ta stojolic yu'un ya jpasbe te bin ma lecuc, ma ha'uc te bin leque.

⁵Te Ajwalil, te Jehová te scuentahinej spisil, ya stij te q'uinal, ya x'uhl yu'un, soc ya x'oq'uic spisil te mach'atic ya xnahinic tey a; spisil te q'uinal ya xnoj bahel hich te bin ut'il muc'ul-ha', soc ya xco bahel hich te bin ut'il te muc'ul-ha' yu'un Egipto.

⁶Ha la spas sna ta ch'ulchan soc la ya'be yich' yip te sjamalil ch'ulchan ta yahc'olal te lumquinale; ha ya yic' tal te ha'etic yu'un te mar, soc ya smal bahel ta sba te lumq'uinal: ha Jehová te sbihile.

⁷Snich'nabex Israel, ¿Ma bal hichuc ayex ta jtojol te bin ut'il te etiopiahetic? xchi te Jehová. ¿Ma bal lajuc quic' loq'uel tal te Israel ta sq'uinal Egipto, te filisteohetic ta Caftor, soc te arameohetic ta Kir?

⁸Te sit te Jehová te Ajwalil ay ta stojol te mulawil nación, ya jtup' bahel ta sba te lumq'uinal, pero ma ba ya jlajin spisil te sna Jacob, xchi te Jehová.

⁹Como ya cal ta mandar te ya yich' chihchinel te sna Israel ta yohlil spisil te nacionetic, hich te bin ut'il ya yich' chihchinel trigo ta schihchinojibal, ma ba ya xch'ay jp'ijuc ta lum.

¹⁰Spisil te jmulawiletic ta pueblo cu'un ya xlajic ta espada, te hich ya yalic: Ma ba ya xnohpoj tal, ma ba ya stahotic te bin chopol, te xhihique.

¹¹Ta hich ora ya jcha'hach te snahilpac' David te yahleme. Ya jmacbe te banti jamajtic, ya jcha'pas xan banti jihnem, hich ya jcha'pas xan te bin ut'il ta nahil to,

¹²scuenta yu'un te mach'atic yich'ojbonic te jbihile ya me yu'untayic te mach'atic hilemic yu'un Edom soc spisil te nacionetic, xchi te Jehová te ya spas ini.

¹³Ya me xtal yorahil, xchi te Jehová, te mach'a ya stuc lum ya sta c'ohel te mach'a ya stsobe sit, soc te mach'a ya sts'o' ta teq'uel ts'usub ya sta c'ohel te mach'a ya ya'iy ts'umbajel. Ta witsiltic ya xt'uhlaj cohel yach'il vino soc ya x'oquin cohel ta spisil te tsehletique.

¹⁴Ya quic' suhtel tal te pueblo Israel cu'un te bahemic ta chuquel; ha ya scha'pasic xan te pueblohetic te jihnemic soc tey ya xnahinic a; ya sts'unic ts'usubiletic soc ya me yuch'beyic te vino yu'une; ya sts'unic awal-ts'unubiletic soc ya me swe'beyic te site.

¹⁵Ya jts'unticlan ta sq'uinalic, mayuquix bin ora ya yich'iquix bulel loq'uel ta q'uinal te la jca'be, xchi te Jehová te Dios awu'une.