Read Tzeltal Jonás 3 Bible Online

Jonás 3 - Tzeltal bible

Jonás 3

¹Tal te sc'op Jehová scuenta schebal buelta ta stojol Jonás, hich la yalbe:

²Hahchan, bahan ta muc'ul pueblo Nínive. Halbeya ya'iy te bin ya calbat, xchi.

³Hich hahch te Jonás, baht ta Nínive, hich te bin ut'il halbot yu'un te Jehová. Mero muc'ul pueblo te Nínive, oxeb c'ahc'al ta behentayel ta jehch ta jehch.

⁴Te Jonás hahch bahel ta yutil te muc'ul pueblo, jun c'ahc'al behen ochel, hich yac ta yalel: Ta cha'winic c'ahc'al ya me xlaj te Nínive, xchi.

⁵Te ants-winiquetic yu'un Nínive la sch'uhunic te Diose, la yalic mandar te ya scom swe'elic soc la slapic pac' scuenta mel-o'tan, muc' biq'uitetic.

⁶Te c'alal c'oht te c'op ta stojol te ajwalil yu'un Nínive, la stehc'an sba ta banti hucul, la schol loq'uel te sc'u', la slap pac' scuenta mel-o'tan soc la shuhcan sba ta tan.

⁷Hich la spuc ta halel ta Nínive: Ta scuenta smandar te ajwalil soc te mach'atic muc' ya'telic: Ma me ayuc mach'a ya xwe', ants-winiquetic, chambahlametic, wacaxetic soc tuminchijetic, ma me x'a'bot swe'elic o ha' te ya yuch'ique.

⁸Ac'a smuc sbahic ta pac' scuenta mel-o'tan, ants-winiquetic soc chambahlametic, soc ac'a yawtayic te Dios ta spisil yip yo'tanic. Jujutuhl ac'a yihquitayic hilel te chopol be yu'un soc te uts'inel ya spasique.

⁹Ya wan suht sc'op te Diose, ya wan sch'ay te sc'ahc'al yilimba, hich ma ba ya xlajotic, xchi.

¹⁰Te Dios la yil te bin la spasic, ha te la suhtes yo'tanic yu'un te chopol be yu'unique, hich la suht sc'op yu'un te bin chopol yaloj te ya spasbe.