Read Tzeltal Números 10 Bible Online

Números 10 - Tzeltal bible

Números 10

¹Te Jehová la yalbe te Moisés:

²Pasa cheb cornetahetic ta plata tembilic ta martillo; ha ya xtuhun awu'unic yu'un stsobel te pueblo soc yu'un shachel te campamento.

³C'alal ya yich' oq'uesinel schebal, spisil te pueblo ya stsob sbahic tal ta atojol ta yochibal te Nahilpac' Templo yu'un tahojibal.

⁴Yan teme junax ya yich' oq'uesinel, ha ya stsob sbahic ta atojol te príncipaletic, ha te jtsobawetic yu'un jujuchahp te Israel.

⁵Te c'alal yac awoq'uesin scuenta tijel hachel,[17] ha ya xhahchic bahel te campamentohetic te ayic ta stojol banti ya xloc' tal c'ahc'al.

⁶Soc ta schebal buelta te yac awoq'uesin scuenta tijel hachel, ha ya xhahchic bahel te campamentohetic te ayic ta stojol sur. Ya yich' oq'uesinel scuenta tijel hachel yu'un ya xhahchic bahel.

⁷Pero scuenta stsobel te pueblo, oq'uesina, pero ma ha'uc te oq'uel scuenta tijel hachel.

⁸Te sts'umbal Aarón, ha te sacerdotehetic, ya yoq'uesinic te cornetahetique. Ha mandar awu'unic te ma xlaj sc'oblal ta cajalcaj ats'umbalic.

⁹Te c'alal ayex ta aq'uinalic soc ya xloq'uex bahel ta guerra soc acontra te ya xtal scontrahinex, ya me awoq'uesinic cornetahetic scuenta tijel hachel. Hich ya xna'botex yu'un Jehová te Dios awu'unic soc ya xcolex ta sc'ab acontrahic.

¹⁰Ha nix hich ta yorahil yutsil q'uinal awu'unic, ta q'uinetic awu'unic soc ta jujun shachel u, yac awoq'uesinic cornetahetic yu'un te scohtol chic'bil mahtaniletic awu'unic soc te milbil mahtaniletic scuenta lamal q'uinal. Ha sna'ojibal awu'unic ta stojol te Dios awu'unique. Ho'on Jehovahon te Dioson awu'unic, xchi.

¹¹Ta schebal u yu'un te schebal ha'bil, ta jtahb c'ahc'al yu'un te u, hahch bahel te tocal ta sba te Nahilpac' yu'un te Testigo-c'op,

¹²hich te snich'nab Israel loq'uic bahel tey ta jochol taquin q'uinal Sinaí, chahpalchahp behenic bahel. Te tocal quehchaj ta behel ta jochol taquin q'uinal Parán.

¹³Ha primera buelta te hahchic bahel ta scuenta smandar Jehová te halbot te Moisés.

¹⁴Ha nahil behen bahel te bandera yu'un te campamento yu'un te snich'nab Judá, ta scuenta jujutsohb yu'unic. Te Naasón snich'an Aminadab, ha jtsobaw yu'un te jtsohb soldadohetic yu'unique.

¹⁵Te jtsobaw yu'un te jtsohb soldadohetic yu'un te snich'nab Isacar, ha Natanael snich'an Zuar.

¹⁶Soc te jtsobaw yu'un te jtsohb soldadohetic yu'un te snich'nab Zabulón, ha Eliab snich'an Helón.

¹⁷C'alal pacticlambilix a te spac'al te Nahilpac' Templo, hahchic ta behel te snich'nabic Gersón soc Merari, la yich'ic bahel.

¹⁸Patil hahch ta behel te bandera yu'un te campamento yu'un te snich'nab Rubén ta scuenta jujutsohb yu'unic. Te Elisur snich'an Sedeur, ha jtsobaw yu'un te jtsohb soldadohetic yu'unique.

¹⁹Te jtsobaw yu'un te jtsohb soldadohetic yu'un te snich'nab Simeón, ha Selumiel snich'an Zurisadai.

²⁰Soc te jtsobaw yu'un te jtsohb soldadohetic yu'un te snich'nab Gad, ha Eliasaf snich'an Reuel.

²¹Patil hahchic ta behel te coatetic te ya yich'ic bahel te ch'ul biluquetique. Te c'alal ma to xc'ohtic, hu'emix ta tehc'anel a te Nahilpac' Templo.

²²Patil hahch ta behel te bandera yu'un te campamento yu'un te snich'nab Efraín, ta scuenta jujutsohb yu'unic. Te Elisama snich'an Amiud, ha jtsobaw yu'un te jtsohb soldadohetic yu'unique.

²³Te jtsobaw yu'un te jtsohb soldadohetic yu'un te snich'nab Manasés, ha Gamaliel snich'an Pedasur.

²⁴Soc te jtsobaw yu'un te jtsohb soldadohetic yu'un te snich'nab Benjamín, ha Abidán snich'an Gedeoni.

²⁵Patil hahch ta behel te bandera yu'un te snich'nab Dan, ta scuenta te jujutsohb yu'unic, ha te ayic ta slajibal ta behel yu'un spisil te campamentohetique. Te Ahiezer snich'an Amisadai, ha jtsobaw yu'un te jtsohb soldadohetic yu'unique.

²⁶Te jtsobaw yu'un te jtsohb soldadohetic yu'un te snich'nab Aser, ha Pagiel snich'an Ocrán.

²⁷Soc te jtsobaw yu'un te jtsohb soldadohetic yu'un te snich'nab Neftalí, ha Ahira snich'an Enán.

²⁸Hich la schol sbahic ta behel te snich'nab Israel, ta scuenta jujuchahp, te c'alal hahchic ta behel.

²⁹Te Moisés hich la yalbe te Hobab snich'an Reuel, te madian-winic, ha te snihal-mamal: Te ho'otcotic ya xbohotcotic ta banti hich yaloj te Jehová: Ha ya ca'beyex, te xchihe. Con, joquinawotcotic, lec bin ya jpasbatcotic, como te Jehová yaloj ta jamal te lec bin ya xc'oht ta stojol Israel, xchi.

³⁰Ma xbohon; ya suhton bahel ta jq'uinal soc ta stojol te jmohlol-ts'ahquil, xchi te Hobab.

³¹La yal te Moisés: Awocoluc, ma me xawihquitayotcotic, como ha'at awiloj te lugaretic te banti ya sc'an ya jpascotic campamento ta jochol taquin q'uinal, ha sitilat cu'uncotic ya xc'ohat.

³²Teme yac ajoquinotcotic bahele, te c'alal ayix ta jcuentacotic te bintic lec ya ya'botcotic te Jehová, ha nix ya ca'batcotic, xchi.

³³Hich loq'uic bahel ta wits yu'un Jehová, oxeb c'ahc'al behenic bahel. Te scaxahul te chapbil-c'op yu'un Jehová ha nahilij bahel yu'unic oxeb c'ahc'al, yu'un yac slehbel banti ya scux yo'tanic.

³⁴Te tocal yu'un Jehová la yaxintes bahel ta c'ahc'alel te snich'nab Israel te c'alal hahchic ta behel.

³⁵Te c'alal ya xhahch bahel te scaxahul te chapbil-c'op, hich ya yal te Moisés: ¡Hahchan, Jehová! ¡Ac'a spuc sbahic bahel te acontratac, soc ac'a ahnicuc bahel te mach'atic ya yilintayat! xchi.

³⁶Soc te c'alal ya xquehchaj ta behel, hich ya yal: ¡Ayinan, Jehová, ta yohlil te bayelic ta mil te snich'nab Israel! xchi.