Read Tzeltal Números 14 Bible Online

Números 14 - Tzeltal bible

Números 14

¹Ha yu'un spisil te pueblo hahchic ta tulan aw; sjunal ahc'abal oq'uic.

²Spisil te snich'nab Israel la scontrac'optayic te Moisés soc Aarón, hich la yalic: ¡Lec te chamucotic ta Egipto! ¡O lec te ya xchamotcotic li' ta jochol taquin q'uinal ini!

³¿Bin yu'un te la yic'otic tal te Jehová li' ta q'uinal ini yu'un ya yac'otic ta milel ta espada, soc te ya x'och ta c'abal te quihnamtic soc cal-jnich'nabtique? ¿Ma bal ha'uc lec ya suhtotic bahel ta Egipto? xchihic.

⁴Soc la yalbe sbahic: Ac'a jlehtic jtuhl jtsobaw, ya suhtotic bahel ta Egipto, xchihic.

⁵Te Moisés soc Aarón la spahcan sbahic c'alal ta lum ta stojol spisil te pueblo yu'un te snich'nab Israel.

⁶Te Josué snich'an Nun, soc Caleb snich'an Jefone, te ha c'ohtic ta stsahtayel te q'uinal, la sch'i'ticlan sc'u'ic yu'un,

⁷soc hich la yalbeyic spisil te pueblo yu'un te snich'nab Israel: Te q'uinal te c'oht jtsahtaycotic, mero lequil q'uinal.

⁸Teme lec yo'tan cu'untic te Jehová, ya me yic'otic ochel soc ya ya'botic jq'uinalintic te q'uinale; ha q'uinal banti ya x'oquin leche soc chab.

⁹Ha yu'un ma me xatoy abahic ta scontrahinel Jehová soc ma me xaxi'ic te yajwal te q'uinale, como te ho'otic ya me jwe'tic hichuc pan. Mayuquix canantayel yu'unic, yan te ho'otic sjoquinejotic te Jehová; ma me xaxi'ic, xchihic.

¹⁰Ha yu'un spisil te pueblo c'an sch'ojic ta ton yu'un. Pero te yutsilal Jehová chicnaj ta Nahilpac' Templo yu'un tahojibal ta stojol spisil te snich'nab Israel.

¹¹Te Jehová la yalbe te Moisés: ¿Jayeb xan tiempo te ya spehc'ambon jc'oblal te pueblo ini? ¿Jayeb xan tiempo te ma ba ya sch'uhunonic, aunque bayel ta chahp a'teliletic la jpasix ta yohlilic?

¹²Ya quehchenteslan ta jmilawal-chamel soc ya jlajinlan; yan te ha'ate jun nación ya xc'ohat cu'un te c'ax hich smuc'ul soc c'ax hich yip a, xchi.

¹³Pero te Moisés la sjac'be sc'op te Jehová: Ya me ya'iyic ta ora te egipciohetic, como la aloq'ueslan tal ta yohlilic te pueblo ini ta scuenta awu'el;

¹⁴soc ya me yich' halbeyel ta stojol te mach'atic nahinemic ta q'uinal ini, te ya'iyejiquix te ha'at, Jehová, ayat ta yohlil te pueblo ini, te awac'oj aba ta ilel ta sitil, Jehová, soc te axintesbilic ta tocal awu'un, te ya xnahilijat bahel yu'unic ta bahlal tocal ta c'ahc'alel soc ta bahlal c'ahc' ta ahc'abal.

¹⁵Teme yac amil te pueblo ini hichuc jtuhl winic, te nacionetic te ya'iybeyejat ac'oblal hich me ya yalic:

¹⁶Te bin ut'il ma ba hu' yu'un Jehová te ya yotses bahel ta q'uinal te jc'axel yalojix ta jamal te ya ya'be, hich la smilticlan hilel ta jochol taquin q'uinal, xchihic me yu'un.

¹⁷Yo'tic, ya calbat wocol te yacuc xchicnaj ta ilel te yu'el te Cajwaltic, hich te bin ut'il awalojix ta jamal:

¹⁸Te Jehová ma orahuc ya x'ilin soc ay bayel sc'uxul yo'tan, ya spas perdón yu'un mulil soc toybahil, pero xuht' ma xyal te mayuc smul te mach'a ay smul, soc te smul te me'iltatiletic ya yac' c'ohtuc ta stojol te yal-snich'nabic c'alal ta yoxcajal soc schancajal, te xchihate.

¹⁹Pasbeya perdón yu'un smulic te pueblo ini ta scuenta te smuc'ul sc'uxul awo'tan, hich te bin ut'il la apasbe perdón te pueblo ini c'alal loq'uic tal ta Egipto c'alal ora, xchi.

²⁰Ha yu'un la yal te Jehová: La jpasbeyix perdón, hich te bin ut'il la awale.

²¹Pero hich te bin ut'il smelelil te cuxulon soc te ya xnoj ta bahlumilal te cutsilale,

²²spisil te mach'atic la yilbonic cutsilal soc te jchahp a'teliletic la jpas ta Egipto soc ta jochol taquin q'uinal, te la spasonic ta prueba lajuneb buelta soc te ma ba la ya'iybonic te jc'ope,

²³ma ba ya yilic te q'uinal te jc'axel la jcal ta jamal ya ca'be te sme'statique. Ma me ayuc jtuhluc te mach'a la yac' ilinucon te ya xbaht yile.

²⁴Yan te ca'bat Caleb, te bin ut'il yan yilel yo'tan a soc te jun yo'tan la st'unon bahel, ya cac' ochel ta q'uinal te banti c'oht yilix talel, soc te sts'umbal ya me yu'untayic te q'uinale.

²⁵Lec ay, te bin ut'il te amalequetic soc te cananeohetic nahinemic ta spamlej, pajel ya me suhtex bahel, ya xbahex ta jochol taquin q'uinal ta sbehlal Mar Rojo, xchi.

²⁶Te Jehová hich la yalbe te Moisés soc Aarón:

²⁷¿Jayeb xan tiempo ya xcuhch cu'un te chopol pueblo ini te ya scontrac'optayonic? La jca'iybeyix te spartehic te snich'nab Israel te la yalbonique.

²⁸Halbeya ya'iyic: Ho'on cuxulon, xchi te Jehová, te bin la awalic ta jtojol hich ya jpasbeyex.

²⁹Ya xlaj hilel abaq'uetalic li' ta jochol taquin q'uinal ini, spisil te mach'atic la yich'ic ahtayel te ay jtahb (20) ya'bilal bahel te la scontrac'optayonic.

³⁰Ta smelelil mayuc jtuhluc ya x'ochex ta q'uinal te la jtoy jc'ab ta yalel ta jamal te tey ya cac' ya xnahinex a, ha nax te Caleb snich'an Jefone, soc te Josué snich'an Nun.

³¹Pero te awal-anich'anic te la awalic te ya x'ochic ta c'abal, ha ya quic' ochel, ya me sna'beyic sba te q'uinal te ma ba lec la awilic te ha'exe.

³²Pero te ha'exe ya me xhil abaq'uetalic li'i ta jochol taquin q'uinal.

³³Te awal-anich'anic, ha jcanan-tuminchij ya xc'ohtic ta jochol taquin q'uinal cha'winic (40) ha'bil; ha'ic ya scuchbeyex te atoybahilic ha to c'alal ya xcham abaq'uetalic ta jochol taquin q'uinal.

³⁴Hich te bin ut'il halajex cha'winic (40) c'ahc'al ta stsahtayel te q'uinale, hich nix yac atojic te amulique: cha'winic (40) ha'bil, jujun ha'bil ya xc'oht te jujun c'ahc'ale. Hich yac ana'ic a te castigo cu'une.

³⁵Ho'on, Jehovahon, la jcalix. Hich ya jpasbe spisil te pueblo ini te ma lecuc yo'tanic, te jun yac'oj sbahic ta scontrahimbelonique. Li' ta jochol taquin q'uinal ya me xlajic, tey ya xchamic hilel a, xchi.

³⁶Te winiquetic te ticonotic bahel yu'un Moisés ta stsahtayel te q'uinal, te c'alal suhtic tal la yac' stijic ta c'op te Moisés spisil te pueblo yu'un te ma ba lec la yalbeyic sc'oblal te q'uinal,

³⁷ha te winiquetic te ma ba lec hul yalbeyic sc'oblal te q'uinale, lajic ta jmilawal-chamel ta stojol Jehová.

³⁸Yan te Josué snich'an Nun soc te Caleb snich'an Jefone, ha nax cuxul hilic ta spisil te winiquetic te la stsahtayic te q'uinale.

³⁹Te Moisés la yalbe ha'i c'op ini ta stojol spisil te snich'nab Israel, bayel la smel yo'tanic yu'un.

⁴⁰Ta yan c'ahc'al hahchic ta buen sab, mohic bahel ta ba wits, hich la yalic: Li' ayotcotic yu'un ya xmohotcotic bahel ta lugar te halbot sc'oblal yu'un Jehová; como jtahoj jmulcotic, xchihic.

⁴¹Pero la sjac' te Moisés: ¿Bin yu'un yac ac'axuntaybeyic smandar te Jehová? Ha nix hich ma ba lec ya xloq'uex yu'un.

⁴²Ma me xmohex bahel, como ma ba ay ta awohlilic te Jehová; ma me xlajex ta stojol te acontrahique.

⁴³Como te amalequetic soc te cananeohetic tey ya xc'oht atahic a, ya me xlajex ta espada yu'unic. Ta scaj te la awihquitayic st'unel te Jehová, hich ma ba ya sjoquinex, xchi.

⁴⁴Pero la yaq'uic fuersa te ya xmohic bahel ta ba wits, pero te scaxahul te chapbil-c'op yu'un Jehová soc te Moisés ma ba loq'uic bahel ta campamento.

⁴⁵Hich cohic tal te amalec soc te cananeo te nahinemic tey ta wits, la yehchentesic te israeletic soc la slajinic, la snutsic bahel c'alal ta Horma.