Read Tzeltal Números 19 Bible Online

Números 19 - Tzeltal bible

Números 19

¹Te Jehová la yalbe te Moisés soc Aarón:

²Hich ay te bin halbil ta mandaril te la yal te Jehová: Halbeya te snich'nab Israel te ac'a yiq'uic tal jcoht tsajal wacax te mayuc bin jihnem yu'un soc te mayuc cajambil yugo ta snuc'.

³Yac awa'be te sacerdote Eleazar, ha ya sloq'ues bahel ta sti'il campamento soc ya yac' ta milel ta stojol.

⁴Te sacerdote Eleazar ya smul te yal sc'ab ta sch'ich'el, ya stsihtsin huqueb buelta ta stojol te Nahilpac' Templo yu'un tahojibal.

⁵Ya yac' ta chiq'uel te wacax ta stojol, ya yac' ta chiquel te snuhculel, sbaq'uetal, sch'ich'el soc stsa'.

⁶Te sacerdote ya stsac tal cedro, hisopo[34] soc tsajal pac', ya sch'ojticlan ochel ta c'ahc' ta banti yac ta c'ahq'uel te wacaxe.

⁷Patil te sacerdote ya sac' sc'u' soc ya x'atin, hich ya xhu' ya x'och bahel ta campamento; bohloben sc'oblal ya xhil te sacerdote c'alal ta yihc'ubel q'uinal.

⁸Ha nix hich te winic te la schic' te wacax, ya me sac' sc'u' soc ya x'atin, soc bohloben sc'oblal ya xhil c'alal ta yihc'ubel q'uinal.

⁹Te jtuhl winic te lec sc'oblal ha ya sjopbe stanul te wacax, ya yac' ta sti'il te campamento ta jun lugar te lec sc'oblal. Ha ya yich' q'uejel yu'un te pueblo yu'un te snich'nab Israel, yu'un ya xtuhun ta ha' scuenta lecubtesel; ha me lecubtesel yu'un mulil.

¹⁰Te mach'a la sjopbe stanul te wacax, ya me sac' sc'u', soc bohloben sc'oblal ya xhil c'alal ta yihc'ubel q'uinal. Ha mandaril te ma xlaj sc'oblal yu'un te snich'nab Israel soc te jyanlum te nahinem ta yohlilic.

¹¹Te mach'a ya spic te mach'a chamen, bohloben sc'oblal huqueb c'ahc'al.

¹²Ta yoxebal c'ahc'al soc ta shuquebal c'ahc'al ya me slecubtes sc'oblal ta scuenta te ha', hich lec sc'oblal ya xhil.

¹³Teme ay mach'a ya spic te mach'a chamen, teme ma ba ya slecubtes sba, ya sbohlobtesbe sc'oblal te Nahilpac' yu'un Jehová; ya me yich' loq'uesel ta yohlil Israel. Te bin ut'il ma ba tsihtsinot ta ha' scuenta lecubtesel, bohloben me sc'oblal, ya me xhil ta scuenta te sbohlile.

¹⁴Hich ay te mandaril sc'oblal te mach'a ya xcham ta snahilpac': mach'ayuc a te ya x'och ta yutil snahilpac' soc spisil mach'atic tey ayic a, huqueb c'ahc'al bohloben sc'oblalic ya xhil.

¹⁵Spisil te vasijahetic te jamal sti'il, te ma ba macal ta lec, bohloben me sc'oblal.

¹⁶Teme ay mach'a ya spic mach'a milot ta espada ta yohl q'uinal o mach'a hich nax cham, o teme ya spic chamen baq'uet o sbaquel chamen ants-winic o muquenal, huqueb c'ahc'al bohloben sc'oblal ya xhil.

¹⁷Te mach'a bohloben sc'oblal, ya xtsacbot tal jtebuc stanul te wacax la yich' chiq'uel yu'un stojel mulil, ya yich' malel ta ya'lel sloq'uib ha' ta sba te tan ay ta yawil.

¹⁸Te jtuhl winic te lec sc'oblal ya me stsac hisopo, ya smul ta ha', ya stsihtsimbe a te nahilpac', te biluquetic soc te mach'atic tey ayic a, soc te mach'a la spicbe te sbaquel, te mach'a milot, te mach'a hich nax cham o te muquenal.

¹⁹Te mach'a lec sc'oblal ya stsihtsin a ta yoxebal soc ta shuquebal c'ahc'al te mach'a bohloben sc'oblal. Te c'alal ya xlecub sc'oblal ta shuquebal c'ahc'al, ya me sac' sc'u' soc ya x'atin, ya xlecub sc'oblal ta yihc'ubel q'uinal.

²⁰Te mach'a bohloben sc'oblal te ma ba la slecubtes sba, ya me yich' loq'uesel ta yohlil te pueblo, yu'un la sbohlobtesbe sc'oblal te ch'ul awilal yu'un Jehová; bohloben me sc'oblal ta scaj te ma ba tsihtsinot ta ha' scuenta lecubtesel.

²¹Ha mandar te ma xlaj sc'oblal. Te mach'a ya ya'iy tsihtsinwanej ta ha' scuenta lecubtesel ya me sac' sc'u'. Te mach'a ya spic te ha' scuenta lecubtesel, bohloben sc'oblal ya xhil c'alal ta yihc'ubel q'uinal.

²²Spisil te bin ya spic te mach'a bohloben sc'oblal, ya xbohlob sc'oblal. Te mach'a ya spic, bohloben sc'oblal ya xhil c'alal ta yihc'ubel q'uinal, xchi te Jehová.