Read Tzeltal Números 2 Bible Online

Números 2 - Tzeltal bible

Números 2

¹Te Jehová hich la yalbe te Moisés soc Aarón:

²Te snich'nab Israel ya me spasic snahilpaq'uic ta sjoyobal te Nahilpac' Templo yu'un tahojibal, jujutuhl ta banti te bandera yu'unic, ta banti te seña yu'un te sna te sme'statique.

³Te mach'atic ya spasic snahilpaq'uic ta stojol banti ya xloc' tal c'ahc'al: ha te bandera yu'un te campamento yu'un Judá ta jujuchahp yu'unic. Te jtsobaw yu'un te sts'umbal Judá, ha te Naasón snich'an Aminadab.

⁴Te jaytuhlic te ahtaybilic, ha balunpic soc lajunwinic shucbahc' (74,600).

⁵Tey nix ta sts'ehl ya me spasic snahilpac' te sts'umbal Isacar. Te jtsobaw yu'unic ha te Natanael snich'an Zuar.

⁶Te jaytuhlic te ahtaybilic, ha wacpic soc waclajunbahc' (54,400).

⁷Soc te sts'umbal Zabulón, te jtsobaw yu'unic ha te Eliab snich'an Helón.

⁸Te jaytuhlic te ahtaybilic, ha hucpic soc lajunwinic schanbahc' (57,400).

⁹Ta spisil te ahtaybilic ta campamento yu'un Judá ha oxeb scha'winic ta pic soc wacbahc' (186,400), ta scuenta jujuchahp yu'unic. Ha'ic te primero ya xloq'uic bahel.

¹⁰Te bandera yu'un te campamento yu'un Rubén ya xc'oht ta stojol sur, ta scuenta jujuchahp yu'unic. Te jtsobaw yu'un te sts'umbal Rubén, ha te Elisur snich'an Sedeur.

¹¹Te jaytuhlic te ahtaybilic, ha ho'pic soc ho'winic shuclajunbahc' (46,500).

¹²Tey ta sts'ehl ya xc'oht te jchahp yu'un Simeón; te jtsobaw yu'unic ha te Selumiel snich'an Zurisadai.

¹³Te jaytuhlic te ahtaybilic, ha hucpic soc ho'winic sbalunbahc' (59,300).

¹⁴Soc te sts'umbal Gad; te jtsobaw yu'unic ha te Eliasaf snich'an Reuel.

¹⁵Te jaytuhlic te ahtaybilic, ha ho'pic soc lajuneb yoxwinic yo'lajunbahc' (45,650).

¹⁶Ta spisil te ahtaybilic ta campamento yu'un Rubén, ha waxaclajunpic soc lajuneb swaxaclajunwinic swaclajunbahc' (151,450), ta scuenta jujuchahp yu'unic. Ha'ic te schebal ya xloq'uic bahel.

¹⁷Patil ya xbaht te Nahilpac' Templo yu'un tahojibal soc te campamento yu'un te levitahetic ta yohlil te campamentohetique. Te bin ut'il chohlolchohl ay scampamentohic, hich nix ya xbehenic bahel jujuchahp soc te bandera yu'unique.

¹⁸Te bandera yu'un te campamento yu'un Efraín ya xc'oht ta stojol banti ya xmahl c'ahc'al, ta scuenta jujuchahp yu'unic. Te jtsobaw yu'unic, ha te Elisama snich'an Amiud.

¹⁹Te jaytuhlic te ahtaybilic, ha ho'pic soc ho'winic scha'bahc' (40,500).

²⁰Tey ta sts'ehl ya xc'oht te jchahp yu'un Manasés; te jtsobaw yu'unic, ha te Gamaliel snich'an Pedasur.

²¹Te jaytuhlic te ahtaybilic, ha chanpic soc lajunwinic (32,200).

²²Soc te chahp yu'un Benjamín; te jtsobaw yu'unic, ha te Abidán snich'an Gedeoni.

²³Te jaytuhlic te ahtaybilic, ha chanpic soc j'ohlil sbalunbahc' (35,400).

²⁴Ta spisil te ahtaybilic te ayic ta campamento yu'un Efraín, ha oxlajunpic soc ho'winic sbuluchbahc' (108,100). Ha'ic te yoxebal ya xloq'uic bahel.

²⁵Te bandera yu'un te campamento yu'un Dan ya xc'oht ta stojol norte; ta scuenta jujuchahp yu'unic. Te jtsobaw yu'unic, ha te Ahiezer snich'an Amisadai.

²⁶Te jaytuhlic te ahtaybilic, ha hucpic soc ho'lajunwinic shuclajunbahc' (62,700).

²⁷Tey ta sts'ehl ya xc'oht te campamento yu'un te jchahp yu'un Aser; te jtsobaw yu'unic, ha te Pagiel snich'an Ocrán.

²⁸Te jaytuhlic te ahtaybilic, ha ho'pic soc ho'lajunwinic schanbahc' (41,500).

²⁹Soc te jchahp yu'un Neftalí; te jtsobaw yu'unic, ha te Ahira snich'an Enán.

³⁰Te jaytuhlic te ahtaybilic, ha wacpic soc j'ohlil schanlajunbahc' (53,400).

³¹Spisil te ahtaybilic te ayic ta campamento yu'un Dan, ha balunlajunpic soc chanlajunbahc' (157,600). Ha'ic te slajibal ya xloq'uic bahel soc te banderahic yu'unique, xchi te Jehová.

³²Ha'ic ini te snich'nab Israel te la yich'ic ahtayel ta scuenta te jujuchahp sna te statique; ta spisil te ahtaybilic ta jujun campamento, ta scuenta jujuchahp, ha ho'lajuneb schanwinic ta pic soc lajuneb swaxacwinic sbalunbahc' (603, 550).

³³Pero te levitahetic ma ba pajal la yich'ic ahtayel soc te snich'nab Israel, hich te bin ut'il pasot ta mandar yu'un Jehová te Moisés.

³⁴Te snich'nab Israel la spasic hich te bin ut'il spisil te pasot ta mandar yu'un Jehová te Moisés. Hich la spas scampamentohic ta banti ay te sbanderahic, soc hich behenic bahel jujutuhl soc te mach'atic ay yu'un, ha chican te jujuchahp sna te sme'statique.[3]