Read Tzeltal Números 20 Bible Online

Números 20 - Tzeltal bible

Números 20

¹C'ohtic spisil te pueblo yu'un te snich'nab Israel ta jochol taquin q'uinal Zin ta shahchel u, la spas scampamentohic ta Cades. Tey cham a te María, soc tey la yich' muquel a.

²Te bin ut'il mayuc ha' yu'un te pueblo, hich la stsob tal sbahic ta scontrahinel te Moisés soc Aarón,

³hich la yalic ta scontrahinel te Moisés: Ha lec te pajal lajucotic soc te quermanotac te c'alal lajic ta stojol Jehová.

⁴¿Bin yu'un te la awiq'uic tal te pueblo yu'un Jehová li' ta jochol taquin q'uinal ini yu'un ya xlajotcotic soc te chambahlametic cu'uncotique?

⁵¿Bin yu'un la aloq'uesotcotic tal ta Egipto yu'un yac awic'otcotic tal li' ta q'uinal te mero ma lecuc? Ma xcol trigo, higuera, ts'usub soc granada; soc mayuc ha' ya cuch'tic, xchihic.

⁶Te Moisés soc Aarón loq'uic bahel ta stojol te snich'nab Israel, bahtic ta yochibal te Nahilpac' Templo yu'un tahojibal, la spahcan sbahic ta lum. Chicnaj yutsilal Jehová ta stojolic.

⁷Te Jehová la yalbe te Moisés:

⁸Tsaca te nahbate'el soc tsoba tal te snich'nab Israel, ha'at soc te abanquil Aarón. C'opona te muc'ul ton ta scomon sitic, ha me ya yac' loq'uel tal ya'lel; hich yac aloq'ues ha' ta muc'ul ton, yac awa'be yuch'ic ha' soc te schansbahlamic, xchi.

⁹Ha yu'un te Moisés la stsac te nahbate'el ay ta stojol Jehová, hich te bin ut'il halbote.

¹⁰Te Moisés soc Aarón la stsobic tal te pueblo ta stojol te muc'ul ton, soc hich la yal te Moisés: A'iya awa'iyic ta lec, jtoybahetic. ¿Ya bal ac'an ya jloq'uesbeyexcotic ha' ta muc'ul ton ini? la yut.

¹¹Hich te Moisés la stoy mohel sc'ab, la smaj cheb buelta ta snahbate' te muc'ul ton; loc' tal bayel ha', hich la yuch'ic ha' te pueblo soc te schansbahlamique.

¹²Pero te Jehová la yalbe te Moisés soc Aarón: Te bin ut'il ma ba la ach'uhunonic, te ma ba la awich'ic ta cuenta te Ch'ul Dioson ta stojol te snich'nab Israel, ma ba yac awiq'uic ochel ta q'uinal te ca'beyej te pueblo ini, xchi.

¹³Ha sloq'uib ha' Meriba[35] sbihil te banti la shachic bayel c'op te snich'nab Israel ta stojol Jehová, soc hich la yac' sba ta ilel ta yohlilic te ha ch'ul Dios stuquel.

¹⁴C'alal ayic ta Cades te Moisés la sticon bahel winiquetic ta stojol te ajwalil yu'un Edom, hich la yalbe bahel: Hich ya yal te awermano Israel: Ha'at ana'oj spisil te jwocolcotic te c'axemix tal cu'uncotic:

¹⁵ha te bin ut'il te jme'jtatcotic cohic bahel ta Egipto, te tey nahinotcotic bayel ha'bil a, pero te egipciohetic la yuts'inotcotic soc te jme'jtatcotique.

¹⁶Ha yu'un awonotcotic ta stojol Jehová, la ya'iy jc'opcotic, la sticon tal jtuhl ch'ul a'bat, la sloq'uesotcotic tal ta Egipto. Yo'tic li' ayotcotic ta Cades, te pueblo ay ta sti'il te aq'uinale.

¹⁷Ya jc'ancotic ta atojol te yacuc awac'otcotic c'axel bahel ta aq'uinal. Ma ba ya xc'axotcotic ta ts'umbil q'uinal soc ta ts'usubiltic, soc ma ba ya cuch'cotic ya'lel te pozohetique. Tojotcotic bahel ta be yu'un ajwalil, ma ba ya xbohotcotic ta wa'el o ta q'uexam ha to c'alal ya xloc'otcotic bahel ta aq'uinal, xchi te Moisés.

¹⁸Pero la sjac' te ajwalil yu'un Edom: Ma xhu' ya xc'axex ta jq'uinal. Teme hich yac apasic, ya me xloc'otcotic tal soc espada, xchi.

¹⁹Te snich'nab Israel hich la yalbeyic xan: Ha nax ya jt'uncotic te muc'ul be. Teme ay ya cuch'batcotic awa'al soc te jchambahlamcotic, ya jtojcotic; ha nax ac'awotcotic c'axel bahel ta aq'uinal, xchihic.

²⁰Pero la sjac' te ajwalil: Ma xhu' ya xc'axex bahel, xchi. Hich loc' tal te Edom soc bayel soldadohetic te bayel yipic.

²¹Hich te Edom ma ba la yac' c'axel bahel ta sq'uinal te Israel. Ha yu'un te Israel la slehic yan be.

²²Spisil te pueblo Israel loq'uic bahel ta Cades, c'ohtic ta wits Hor.

²³Te Jehová hich la yalbe te Moisés soc Aarón ta wits Hor te ay ta sti'il sq'uinal Edom:

²⁴Ya xchamix[36] te Aarón. Ma ba ya x'och bahel tey ta q'uinal la jca'be te snich'nab Israel, como ha'ex la atoy abahic ta sc'axuntayel jmandar ta banti sloq'uib ha' Meriba.

²⁵Ic'a bahel te Aarón soc te snich'an, ha te Eleazar, ac'a mohicuc bahel ta ba wits Hor.

²⁶Cholbeya sc'u' yu'un sacerdotehil te Aarón, ha xawa'be slap te Eleazar te snich'an, como tey ya xcham a te Aarón, xchi.

²⁷Te Moisés hich la spas te bin ut'il halbot yu'un Jehová. La yilic te pueblo te mohic bahel ta wits Hor.

²⁸Te Moisés la scholbe te sc'u' yu'un sacerdotehil te Aarón, ha la ya'be slap te Eleazar te snich'an. Tey cham a te Aarón ta ba wits. Te Moisés soc te Eleazar cohic tal ta wits.

²⁹C'alal la sna'ic spisil te pueblo te chamix te Aarón, la yoq'uetayic lajuneb scha'winic (30) c'ahc'al spisil ta chahp Israel.