Read Tzeltal Números 21 Bible Online

Números 21 - Tzeltal bible

Números 21

¹Te ajwalil-cananeo yu'un Arad te nahinem ta Neguev, c'alal la ya'iybe sc'oblal te snich'nab Israel te yaquic ta talel ta sbehlal Atarim, la ya'be guerra te Israel soc ay mach'atic la schuquic bahel.

²Ha yu'un te Israel hich la yalbeyic ta jamal te Jehová: Teme yac awac'ticlan ta jc'abcotic te nación ini, jc'axel me ya jlajimbecotic te pueblohetic yu'une, xchihic.

³Te Jehová la ya'iybe sc'opic te Israel, la yac'ticlambe ta sc'abic te cananeohetic; la slajinic soc te pueblohetic yu'unique. La ya'beyic sbihil Horma[37] te lugar.

⁴Patil loq'uic ta wits Hor ta sbehlal Mar Rojo, yu'un ya sjoybetayic te sq'uinal Edom. Ta be chebaj yo'tanic te pueblo.

⁵Hahch scontrac'optayic te Dios soc te Moisés, hich la yalic: ¿Bin yu'un la aloq'uesotcotic tal ta Egipto scuenta yu'un ya xchamotcotic li' ta jochol taquin q'uinal ini? Mayuc we'elil soc mayuc ha'; soc c'axix co'tancotic yu'un te we'elil ini, xchihic.

⁶Hich te Jehová la sticombe tal ti'awal chanetic ta yohlilic, hich lajic ta ti'el ta chan; bayel chamic yu'un te snich'nab Israel.

⁷Ha yu'un te pueblo talic ta stojol Moisés, hich la yalbeyic: La jta jmulcotic ta scontrac'optayel te Jehová soc te ha'ate. C'ambeya Jehová te yacuc sloq'ues te chanetic, xchihic. Hich te Moisés la sc'opombe Dios te pueblo.

⁸Te Jehová la yalbe te Moisés: Pasbeya sloc'omba ti'awal chan, johc'ana ta te'. Te mach'a ya xti'ot ta chan, teme ya yil te chane, hich ya xcuxaj, xchi.

⁹Hich te Moisés la spasbe sloc'omba chan ta bronce, la sjohc'an ta te'. Te mach'a ya xti'ot ta chan, ya yil te chan pasbil ta bronce, hich ya xcuxaj.

¹⁰Te snich'nab Israel cha'hahchic ta behel, c'oht spas scampamentohic ta Obot.

¹¹Hahchic bahel ta Obot, c'oht spas scampamentohic ta Ije-abarim te ay ta jochol taquin q'uinal te ay ta stojol Moab, ta stojol banti ya xloc' tal c'ahc'al.

¹²Cha'hahchic bahel, c'oht spas scampamentohic ta spamlej Zered.

¹³Cha'hahchic bahel, c'oht spas scampamentohic ta jehch te uc'um Arnón te ay ta jochol taquin q'uinal, te hahchem loq'uel ta sq'uinal te amorreohetique. Te Arnón ha smojonic te Moab soc te amorreohetique.

¹⁴Ha scuentahil te hich ya yal ta Libro yu'un Guerrahetic yu'un Jehová: Te bin c'oht ta pasel ta Mar Rojo soc ta uc'umetic yu'un Arnón;

¹⁵soc ta yacan ha' yu'un te uc'umetic te ya xtehc'aj ta Ar soc te ya xc'oht ta loq'uel ta sti'il Moab, xchi.

¹⁶Tey hahchic xan bahel c'alal ta Beer, ha te pozo te banti halbot yu'un Jehová te Moisés: Tsoba tal te pueblo, yu'un ya ca'beyic ha', te xchihe.

¹⁷Ha yu'un Israel la sc'ayojtayic te c'ayoj ini: ¡T'ohman loq'uel tal, ya'lel pozo! C'ayojtayahic te pozo,

¹⁸ha te pozo te la sjoq'uic te mach'atic ich'bilic ta cuenta, te la sjoq'uic te príncipaletic yu'un te pueblo, la sjoq'uic soc sbastonic, xchihic. Ta jochol taquin q'uinal behenic bahel c'alal ta Matana;

¹⁹loq'uic bahel ta Matana, c'ohtic ta Nahaliel; loq'uic bahel ta Nahaliel, c'ohtic ta Bamot;

²⁰loq'uic bahel ta Bamot, c'ohtic ta spamlej ay ta sq'uinal Moab, nopol ta wits Pisga ta banti ya xchicnaj te jochol taquin q'uinal.

²¹Te Israel la sticonic bahel winiquetic ta stojol Sehón te ajwalil yu'un te amorreohetic, hich la yalbeyic:

²²Ya jc'an ya xc'axon bahel ta aq'uinal. Ma ba ya x'ochotcotic bahel ta banti awal-ts'unubiletic o ta ts'usubiletic; ma ba ya jcuch'cotic ha' te ay ta pozohetic. Ya xbehenotcotic bahel ta be yu'un ajwalil, ha to c'alal ya xc'axotcotic bahel ta aq'uinal, xchihic.

²³Pero te Sehón ma ba la yac' c'axel bahel te Israel ta sq'uinal. La stsob spisil swinic, loc' sta te Israel ta jochol taquin q'uinal; c'alal c'oht ta Jahaza, la ya'be guerra te Israel.

²⁴Pero te Israel la smilticlanic ta espada, la yich'beyic sq'uinalic c'alal ta uc'um Arnón ha to ta uc'um Jaboc, c'alal ta sti'il sq'uinal te amonetic, yu'un te amonetic ay bayel yipic ta smojonic.

²⁵Hich te Israel la yich'beyic soc la snahinic spisil te pueblohetic yu'un te amorreohetic, te Hesbón soc spisil te pueblohetic yu'un.

²⁶Te Hesbón ha te muc'ul pueblo yu'un Sehón te ajwalil yu'un te amorreohetique. Te Sehón ay la ya'beyix guerra soc te ajwalil yu'un Moab, la spojbe spisil te sq'uinal c'alal ta Arnón.

²⁷Ha scuentahil te hich ya yalic te mach'atic ya sna'ic yalel p'ijil c'op: ¡La'ic ta Hesbón, ac'a yich' cha'pasel! ¡Ac'a yich' cha'pasel te pueblo yu'un Sehón!

²⁸Yu'un loc' tal c'ahc' ta Hesbón, loc' tal yat c'ahc' ta pueblo yu'un Sehón, te la slajin te Ar yu'un Moab, te mach'atic ich'bilic ta cuenta ta mohel q'uinal ta Arnón.

²⁹¡Ay me awocol, Moab! ¡Ch'ayematix, pueblohat yu'un Quemos! Bahtic ta ahnel te queremetic yu'un, te yantsil-nich'nab bahtic ta chuquel yu'un Sehón ajwalil yu'un amorreohetic.

³⁰Pero la jimbecotic ban c'alal scuentahinej, jihnix te Hesbón c'alal ta Dibón, la jlajincotic c'alal Nofa soc Medeba, xchi.

³¹Hich te Israel nahin ta sq'uinal te amorreohetique.

³²Te Moisés la sticon ta stsahtayel te Jazer. La yu'untayic te tut pueblohetic yu'un soc la stenic loq'uel te amorreohetic te tey nahinemic a.

³³Patil la yaq'uic buelta, mohic bahel ta sbehlal Basán. Te Og, ajwalil yu'un Basán, loc' bahel soc spisil te pueblo yu'un, baht ya'beyic guerra tey ta Edrei.

³⁴Ha yu'un te Jehová la yalbe te Moisés: Ma xaxi', como la jca'batix ta ac'ab soc spisil te pueblo yu'un soc te sq'uinale. Hich yac apasbe te bin ut'il la apasbe te Sehón te ajwalil yu'un amorreohetic te nahinem ta Hesbón, xchi.

³⁵Ha yu'un la smilic soc snich'nab soc spisil ants-winiquetic yu'un; mayuc mach'a cuxul hil. Hich la yu'untaybeyic te sq'uinale.