Read Tzeltal Números 22 Bible Online

Números 22 - Tzeltal bible

Números 22

¹Loq'uic bahel te snich'nab Israel, c'oht spas scampamentohic ta spamlej yu'un Moab, ta ti' muc'ul-ha' Jordán, te snuhp'usitayej sba soc Jericó.

²Te Balac snich'an Zipor, la yil spisil te bin la spasbe te amorreohetic te Israel.

³Te Moab bayel xiw, como bayelic; och bayel xiwel ta yo'tanic yu'un te snich'nab Israel.

⁴Ha yu'un hich la yalbeyic te mamaletic yu'un Madián: Te tsobol winiquetic ini ya me slec'ticlan spisil bintic ay ta joyobaltic hich te bin ut'il ya swe' ac te wacaxe, xchihic. Ha yu'un te Balac snich'an Zipor, te ajwalil yu'un Moab ta hich ora,

⁵la sticon bahel winiquetic ta stojol Balaam snich'an Beor ta Petor, te ay ta nopol muc'ul-ha' Éufrates, te ha slumal nix, hich la yalbe: Ay jun pueblo te loq'uemic tal ta Egipto te ya snojesic te q'uinal soc ya xnahinic nopol ta banti ayon.

⁶Awocoluc, la' me ta ora, bohlobtesbeya sc'oblal te pueblo ini, yu'un c'ax hich yip a te bin ut'il te ho'one. Hich wan ya xhu' cu'un stsalel soc stenel loq'uel ta q'uinal. Ya jna' te mach'a yac ac'ambe bendición ta stojol ya yich' bendición, o te mach'a yac abohlobtesbe sc'oblal, bohloben sc'oblal ya xc'oht, xchi.

⁷Bahtic te mamaletic yu'un Moab soc Madián, yich'ojic bahel ta sc'abic te mahtaniletic scuenta na'ojel. C'ohtic ta stojol Balaam, la yalbeyic te bin la yal te Balac.

⁸Te Balaam hich la yalbe: Wayanic li'i ha ahc'abal ini, ya calbat bin ya yalbon te Jehová, xchi. Hich te príncipaletic yu'un Moab hilic soc te Balaam.

⁹Te Dios tal ta stojol Balaam, la sjoc'obe: ¿Mach'atic a te winiquetic sjoquinejat? xchi.

¹⁰Te Balaam la sjac'be te Diose: Te Balac snich'an Zipor, te ajwalil yu'un Moab, la sticombon tal ta halbeyel:

¹¹Te pueblo te loc' tal ta Egipto ya snojesic te q'uinal. La' me ta ora, ya me abohlobtesbe sc'oblalic, hich wan ya xhu' cu'un te ya ca'be guerra soc ya jten loq'uel, xchi.

¹²Pero halbot yu'un Dios te Balaam: Ma me xbahat soc, ma me xabohlobtesbe sc'oblalic, como yich'ojic bendición, xchi.

¹³Hahch ta sab te Balaam, hich la yalbe te príncipaletic ticombilic tal yu'un Balac: Suhtanic bahel ta alumalic, como te Jehová ma xyac' te ya joquinex bahel, xchi.

¹⁴Hich hahchic te príncipaletic yu'un Moab, suhtic bahel ta stojol Balac, hich c'oht yalbeyic: Te Balaam ma ba la sc'an la sjoquinotcotic tal, xchihic c'ohel.

¹⁵Te Balac la scha'ticon xan yantic príncipaletic te bayelic xan soc muc' xan sc'oblalic.

¹⁶Hich c'oht yalbeyic te Balaam: Hich ya yal te Balac snich'an Zipor: Awocoluc, ma me xawal te ma ba ya xtalat ta jtojol,

¹⁷yu'un bayel ya cac'at ta ich'el ta muc' soc ya jpas spisil te bin yac awalbon. La' me hiche, bohlobtesbeya sc'oblal te pueblo ini, xchihic.

¹⁸Te Balaam hich la yalbe te a'batetic yu'un Balac: Aunque te Balac ya ya'bon te sna nojel ta plata soc oro, ma xhu' ya jc'axontaybe sc'op Jehová te Dios cu'un ta spasel te bin muc' o te bin tut.

¹⁹Awocoluc, wayanic li'i ha ahc'abal ini, yu'un ya ca'iy bin yan ya yalbon te Jehová, xchi.

²⁰Ta ahc'abal tal Dios ta stojol Balaam, hich la yalbe: Teme talem te winiquetic yu'un ya yic'at bahel, hahchan, bahan soc. Pero ha nax me yac apas te bin ya calbat, xchi sc'oblal.

²¹Hich te Balaam hahch ta sab, la smohtesbe smontura te sburra, baht soc te príncipaletic yu'un Moab.

²²Tihl yilimba Dios yu'un te bahte. Te ch'ul a'bat yu'un Jehová la yac' sba ta be scuenta scontrahinel. Te Balaam cajal bahel ta sburra a soc joquinot bahel yu'un cheb a'batetic yu'un.

²³Te burra la yil te ch'ul a'bat yu'un Jehová te ay ta be soc te stsacoj ta sc'ab te espada yu'une, la sjoybetay yu'un, och bahel ta aquiltic. Ha yu'un te Balaam la smaj yu'un ya suht tal ta be.

²⁴Te ch'ul a'bat yu'un Jehová baht stehc'an sba ta sbehlal ts'usubiletic te ay sts'ahcul ta jehch ta jehch.

²⁵Te burra, c'alal la yil te ch'ul a'bat yu'un Jehová, la sten ta ts'ahc, la stembe yoc te Balaam; ha yu'un cha'majot xan yu'un.

²⁶Te ch'ul a'bat yu'un Jehová nahilij xan bahel yu'unic, baht stehc'an sba ta banti mero tut te be, te banti ma xhu'ix ta joybetayel ta q'uexam o ta wa'el.

²⁷Te burra, c'alal la yil te ch'ul a'bat yu'un Jehová, la spahcan sba ta lum ta ye'tal Balaam. Ilin yu'un te Balaam, la smaj ta te'.

²⁸Hich te Jehová la yac' c'opojuc te burra, hich la yalbe te Balaam: ¿Bin jpasbeyejat yu'un te oxeb buelta la amajonix? xchi.

²⁹Te Balaam la sjac'be sc'op te burra: Yu'un la awac'on ta q'uexlal. ¡Te ayuc espada ta jc'ab, la jmilatix te hichuque! la yut.

³⁰La sjac' te burra: ¿Ma bal aburrahucon? Acajtajibon te c'alal la awic'on ha to c'alal ora ini; ¿hich bal c'ahyemon ta spasel ta atojol? xchi. Ma'uc, xchi te Balaam.

³¹Hich te Jehová la sjambe sit te Balaam, la yil te ch'ul a'bat ay ta be te stsacoj ta sc'ab te espada yu'une. Te Balaam la squejan sba, la spahcan sba ta lum.

³²Te ch'ul a'bat yu'un Jehová hich la yalbe: ¿Bin yu'un te la amajix oxeb buelta te aburrahe? Ho'on tal jmacat ta be, como te banti yacat ta bahel ma ba lec ya ca'iy.

³³La yilon te burra, hich la sjoybetayon oxeb buelta. Te manchuc la sjoybetayon, la jmilatix te hichuque, soc ha cuxul hil cu'un stuquel te burra, la yut.

³⁴Ha yu'un te Balaam la yalbe te ch'ul a'bat yu'un Jehová: Jtahoj jmul, ma ba la jna' teme ha'at amacbeyejon jbe. Teme ma ba lec yac awa'iy, ya suhton, xchi.

³⁵Te ch'ul a'bat yu'un Jehová la yalbe te Balaam: Bahan soc te winiquetique, pero ha nax me xawal te bin ya calbat, xchi. Hich te Balaam baht soc te príncipaletic yu'un Balac.

³⁶C'alal la ya'iy te Balac te yac ta talel te Balaam, baht sta tal ta pueblo yu'un Moab te ay ta mojon, ha te uc'um Arnón, ta sti'il te sq'uinale.

³⁷Te Balac la yalbe te Balaam: ¿Ma bal lajuc jticonat ta iq'uel tal? ¿Bin yu'un ma ba talat ta jtojol? ¿Ma bal yacuc xhu' cu'un te ya cac'at ta ich'el ta muc'? xchi.

³⁸Te Balaam la sjac'be sc'op te Balac: Talonix ta atojol. Pero ¿yu'un bal ya xhu' cu'un te biluc nax ya cal? Ha nax ya cal te bin ya yalbon te Diose, xchi.

³⁹Te Balaam baht soc Balac, hich talic ta Quiriat-huzot.

⁴⁰Te Balac la yac' ta milel wacaxetic soc tuminchijetic, la sticonlan ta stojol Balaam soc te príncipaletic te sjoquinej.

⁴¹Ta schebal c'ahc'al te Balac la yic' mohel te Balaam ta Bamot-baal, tey la yil cohel a j'ohlil te pueblo.